U Minsku ŭłady i sud admaŭlajuć ŭ praviadzieńni hramadskich słuchańniaŭ pa chłaryravanaj vadzie

Sud Maskoŭskaha rajonu Minska 28 sakavika ahučyŭ vierdykt pa pazovie žycharoŭ Minsku adnosna praviadzieńnia hramadskich słuchańniaŭ ab jakaści pitnoj vady ŭ Maskoŭskim, Frunzienskim i Kastryčnickim rajonach Minsku.

Nahadajem, u žniŭni 2013 hoda minčuki pry padtrymcy inicyjatyvy «Naša Kuncaŭščyna» i arhkamitetu pa stvareńni partyi «Biełaruskaja Chryścijanskaja Demakratyja»sabrali bolš za 500 podpisaŭ z patrabvańniem pravieści hramadskija słuchańni z pryčyny mocnaj chłaryravanaści pitnoj vady ŭ Kastryčnickim, Maskoŭskim i Frunzienskim rajonach Minska. Podpisy byli nakiravanyja ŭładam horada.

Sud pastanaviŭ, što Minharvykankam adkazaŭ aŭtaram zvarotu ŭ terminy, prapisanyja ŭ zakonie, i zhodna sa svajoj kampietencyjaj.

Datyčna ž taho, što minskija ŭłady praihnaravali patrabvańnie pra praviadzieńnie hramadskich słuchańniaŭ, sud patłumačyŭ, što heta nie ŭ kampietencyi Minharvykankamu. 

Miž tym jak možna patłumačyć zajavu pra adsutnaść kampietencyi ŭ Minharvykankama, kali ŭ art. 41 Zakona ab miascovym kiravańni i samakiravańni havorycca, što «vykankamy ŭ miežach svajoj kampietencyi ŭ paradku, ustanoŭlenym zakanadaŭstvam … arhanizujuć abmierkavańnie na adpaviednaj terytoryi važnych pytańniaŭ miascovaha i respublikanskaha značeńnia». 

«My nie patrabavali vydatkavańnia niejkich srodkaŭ ci niečaha zavyšanaha. My prapanoŭvali čynoŭnikam sustrecca ź ludźmi i abmierkavać pytańni, jakija chvalujuć ludziej. Ale minskija čynoŭniki, jakija žyvuć za košt padatkaŭ, chavajucca za papierkami i dźviarmi, i poŭnaściu ihnarujuć intaresy prostych hramadzian», — adznačyŭ adkazny sakratar BCHD Dzianis Sadoŭski

«My praciahniem hetuju i inšyja kampaniju, infarmavać ŚMI i zacikaŭlenych hramadzian pra jaje raźvićcio, kab stvaryć cisk na ŭłady, kab abvieščanyja raniej płany pieravieści da 2018 hodu Maskoŭski, Frunzienski i Kastryčnicki rajony na artezijanskuju vadu, byli vykananyja. Što tyčycca siońniašniaha rašeńnia suda, to my budziem abskardžvać jaho ŭ Mienskim haradskim sudzie», — kaža Dzianis Sadoŭski.

Uvieś hety čas aktyvisty atrymlivali tolki adpiski, maŭlaŭ, vada dobraja i niama ab čym turbavacca. Pry hetym hałoŭnaje patrabavańnie pravieści šyrokija hramadskija słuchańni ihnaravałasia. 

Tady ŭ Hienieralnuju prakuraturu, Administracyju prezidenta i Saviet ministraŭ byli padadzienyja skarhi na dziejańni minskich čynoŭnikaŭ. Adnak zvaroty byli prosta pieranakiravanyja ŭ Minharvykankam, na dziejańni jakoha i skardzilisia minčuki. U vyniku nijakaha adkazu pa sutnaści tak i nie było atrymana. 

U suviazi z hetym ad imia 570 čałaviek dasłali skarhu na Minharvykankam u sud Maskoŭskaha rajona Minska z patrabavańniem pryciahnuć da adkaznaści čynoŭnikaŭ, jakija chałatna vykonvali svaje abaviazki, i hałoŭnaje — ab praviadzieńni šyrokich hramadskich słuchańniaŭ pa prablemie mocnaj chłaryravanaści pitnoj vady ŭ Kastryčnickim, Maskoŭskim i Frunzienskim rajonach Minska. 

• 0
• 0
• 0
• 0
• 0
• 0
• 0
• 0