«Siabar» raźvitaŭsia z hierojami

Vioŭ raźvitalnuju viečarynu Viktar Šałkievič. Prymali ŭdzieł «Apple tea», «Krambambula», Ihar Varaškievič, Rusia i Alaksandar Kulinkovič.

Nijakich bolš ludziej, rusałak i sabačkaŭ

«Chutka vy nia ŭbačycie ŭ reklamie piva nijakich ludziej, rusałak, ni navat maleńkich sabačkaŭ» — z hetych słovaŭ pačałasia ładžanaja pivavarniaj «Siabar» u Mienskim mižnarodnym adukacyjnym centry viečaryna «Raźvitańnie z hierojami». Ad 22 listapada pačynaje dziejničać novy zakon, jaki zabaraniaje vykarystańnie vobrazaŭ ludziej i žyviołaŭ u reklamie piva. Z hetaj nahody pivavarnia «Siabar» vypuściła admysłovy reklamny rolik dy zładziła viečarynu ŭ honar aktoraŭ, što reklamavali pradukcyju brovaru. Haściam viečaryny prademanstravali ŭsie reklamnyja roliki, zroblenyja za čas isnavańnia pivavarni. U tym liku i šykoŭnuju reklamu piva «Siabar», zroblenuju pa-biełarusku jašče ŭ 2005 h. Jana tak i nie patrapiła na ekrany, bo, pa słovach staršyni naziralnaj rady pivavarnaj kampanii «Siabar» Siarhieja Levina, tvary ŭ persanažaŭ rolika nie zusim biełaruskija. Jany ž sapraŭdy chutčej nahadvajuć niamieckich baŭeraŭ. Na imprezie prysutničała bolšaść hierojaŭ reklamy «Siabra».

Tym časam Siarhiej Levin paabiacaŭ nie parušać zakon i prajavić maksymum vynachodlivaści, kab piva «Babroŭ» znachodziła svaich amataraŭ.

Babroŭ Music Awards

Praciaham aficyjnaj častki było ŭručeńnie admysłovaj premii «Babrova» najlepšamu muzyčnamu žurnalistu. Ad hetaha hodu kampanija raspačynaje ŭłasnuju tradycyju ŭručeńnia muzykalnych premijaŭ. U skład pieršaha žury patrapili muzyčny žurnalist i krytyk Źmicier Padbiareski i pradusar Uładzimier Šablinski. Pieršuju premiju atrymaŭ Siarhiej Šapran, ź jakim U. Šablinski niekali vioŭ na radyjo muzyčnuju prahramu. Sp. Šapran atrymaŭ symbaličny draŭlany mikrafon («Nieabchodnaja ŭ haspadarcy reč — možna bulbu taŭčy» — padkazaŭ, što možna rabić z padarunkam viadučy viečaru Viktar Šałkievič), a taksama hrašovuju premiju ŭ pamiery 5 miljonaŭ rubloŭ. «Naša kampanija maje ŭznaharodžvać usich tych tvorčych asobaŭ, što robiać našaje kulturnaje žyćcio ŭnikalnym, niepadobnym da maskoŭskaha, berlinskaha, praskaha, ci varšaŭskaha» — adznačyŭ S. Levin.

Panajechała haściej

Praciaham viečaru byli vystupy hurtoŭ. Pieršymi zajhrali «Apple tea», a potym estafetu padchapiła «Krambambula», jakaja ździviła mnohich svaimi hlamurnymi ŭborami — chłopcy vyjšli da publiki ŭ kalarovych šubach i vializnych bliskučych akularach. Pad “Sini nos” pačaŭ tančyć navat supracoŭnik Suśvietnaha banku ŭ Biełarusi Krejh Beł. Nieraŭnadušnym da biełaruskaj muzyki byŭ i prysutny tut kiraŭnik adździaleńnia pasolstva Švecyi ŭ Miensku Stefan Eryksan. Paźniej kolki piesień pad akampanement «Jabłyčnaj harbaty» praśpiavali lider «Kramy» Ihar Varaškievič i Rusia z «Indziha». Varaškievič pryjšoŭ raźvitacca z hierojami razam ź Mikałajem Aruciunavym, ź jakim jon arhanizavaŭ supolny prajekt.

Zakryvała viečar «Krambambula», jakaja raźvitałasia z šubami, ale pabolšała za košt lidera «Nejra Dziubiela» Alaksandra Kulinkoviča. Śpiavajučy pra marskoha čałavieka Alaksandar prademanstravaŭ cialniašku i loh na padłohu. Na raźvitańnie ŭsioj zalaj zaśpiavali «Hości». Razam z Volskim zaśpiavali pradusar Jaŭhien Kałmykoŭ i Siarhiej Levin.

Łyžka dziohciu u dziežcy «Siabra»

Nie abyšłosia biez prezentacyi novaha hatunku piva. Hetym razam było pradstaŭlenaje novaje piva «Ice». Navinka pakidaje padvojenaje pačućcio. Kali jakaść napoju ni pakidaje nijakich sumnievaŭ, to afarmleńnie jaho rasčaroŭvaje. Na žal abiacańnie kiraŭnika brovaru zrabić novy brend biełaruskamoŭnym nia spraŭdziłasia. Budziem spadziavacca, što takija brendy źjaviacca ŭ budučyni, bo, jak planuje kampanija, novyja hatunki ŭ chutkim časie buduć źjaŭlacca z zajzdrosnaj rehularnaściu.

U lubym razie, treba padziakavać kampanii i jaje kiraŭnictvu za spravu, jakuju jany robiać. Nasamreč, pry ŭsioj pavazie da inšych biełaruskich brovaraŭ, ciažka pakul ujavić padobnyja mierapryjemstvy ŭ padtrymku svajoj pradukcyi ź ich boku.

Siamion Piečanko

Pavialičyć

Pavialičyć

Pavialičyć

• 0
• 0
• 0
• 0
• 0
• 0
• 0
• 0