Prysud Fińkieviču: kab bajalisia!
Žorstki vyrak junaku — heta najpierš mesydž palityčna niaŭrymślivaj moładzi. Piša ŭ svaim błohu Alaksandar Kłaskoŭski.
Ułada adhulała sioletni raŭnd torhu z Eŭraźviazam. Jak pamiatajecie, Miensk nastojliva zandavaŭ hlebu nakont "prahmatyčnaha dyjalohu". Kab pytańni demakratyi, pravoŭ čałavieka i h.d. byli vyniesienyja za dužki. Zrešty, zrabili paru žestaŭ: Statkieviča i Siavierynca vyzvalili trochi raniej, maładafrontaŭcam niejki čas davali tolki štrafy…
Ale stała zrazumieła, što numar nie vyharaje. A tut jašče i Rasieja zrabiła carski padarunak: kredyty, tanny haz na pieršy kvartał nastupnaha hodu… Karaciej, naviersie vyrašyli što imitacyja palityčnaj adlihi pakul što nieaktualnaja.
Zatoje aktualnym jość źbić eŭfaryju siarod "destruktyŭnych elementaŭ". Bo paśla taho jak vosieńskija maršy prajšli biez dručkoŭ, chto-kolviek z apazyjnych lideraŭ staŭ zajaŭlać, što tabu z Kastryčnickaha placu źniataje i ŭsio takoje.
Viadoma, jakija noravy na "chimii". Pry žadańni parušeńni režymu možna znajści ŭ kaho zaŭhodna. Tak što turemnaje pakarańnie Fińkieviča — udar kropkavy. Palityčna niaŭrymślivym chłopcam i dziaŭčatam dajuć zrazumieć: kali što, mała nia zdasca!
Praces pajšoŭ raniej. Zhadajma: pakarali sutkami arhanizataraŭ niadaŭniaha mitynhu pradprymalnikaŭ na Kastryčnickaj. Potym z płoščy brutalna vycisnuli tych, chto pratestavaŭ suprać perspektyvy inkarparacyi napiaredadni vizytu Pucina. Mocna paciarpieŭ Źmicier Chviedaruk.
Zdavałasia b, naadvarot, tyja pratesty na ruku biełaruskamu kiraŭnictvu. Hladzi, Uładzimier Uładzimieravič, narod nia choča vašaha kanstytucyjnaha aktu!
Ale pieravažyła žadańnie davieści, chto ŭ chacie haspadar. Kiroŭnaja viarchoŭka baicca pakazać słabaść. Miensk mentalna nie hatovy hulać navat u "kiravanuju demakratyju". Panuje kancepcyja balansavańnia miž Eŭropaj i Rasiejaj. Siońnia pašenciła niešta vyhandlavać u Kramla. Pra sapraŭdnuju canu dumać nia chočuć. A Eŭropa, maŭlaŭ, nikudy nie padzieniecca…
Biełaruskaje kiraŭnictva adšlifavała da blasku taktyku vykarystańnia sytuacyjnych vyhodaŭ. Ale stratehii niama. Hieapalityčnaha vybaru niama. "Dobrańkaja" Maskva ŭžo ŭviesnu znoŭ voźmie za harlak cenami na haz i h.d.
I pačniecca novy tur torhu z vykarystańniem palityčnych zakładnikaŭ.
Kamientary