Žurnalistam «Hancavickaha času» admovili ŭ akredytacyi. A niedziaržaŭny štotydniovik «Novy čas» prosić dapamohi ŭ čytačoŭ.
«Hazieta Słonimskaja» na minułym tydni atrymała papiaredžańnie ad Ministerstva infarmacyi. Niedziaržaŭnaje rehijanalnaje vydańnie abvinavacili ŭ parušeńni art. 30 Zakona «Ab druku i inšych ŚMI» — pieravyšeńnie dazvolenych abjomaŭ reklamnaj płoščy (30% ad ahulnaha abjomu numaru).
Hałoŭny redaktar «HS» Viktar Vaładaščuk ličyć papiaredžańnie nieabhruntavanym. 1 lutaha redakcyja hazety nakiravała na adras Mininfarmacyi list z prośbaj admianić sankcyju.
Jak patłumačyŭ Viktar Vaładaščuk pres-słužbie BAŽ, vypusk «Haziety Słonimskaj», da jakoha ŭ Mininfarmacyi ŭźnikli pretenzii (№51 ad 19 śniežnia 2007 h.), vyjšaŭ na 40 staronkach. Zakonnaja płošča pad reklamu ŭ im składała 11628 sm², u toj čas jak reklama była raźmieščana tolki na 11328,25 sm².
Redaktar «HS» padazraje, što Mininfarmacyi paličyła reklamaj infarmacyju pra ŭmovy padpiski na hazetu na nastupny hod i abviestku pra veb-staronku vydańnia.
«Supracoŭniki redakcyi źviarnulisia ŭ Ministerstva handlu da specyjalista pa reklamie, kab udakładnić, ci ličycca takoha rodu infarmacyja reklamaj. Specyjalisty ministerstva miarkujuć, što padobnyja abviestki nie źjaŭlajucca reklamaj. Jany skazali, što adnaznačnaj farmuloŭki na hety kont niama», — raspavioŭ V. Vaładaščuk.
Nahadajem, što 15 studzienia hałoŭny redaktar «HS» byŭ vyklikany ŭ mižrajonnuju Słonimskuju prakuraturu. Nahodaj dla hetaha stali pretenzii da hazety z boku abłasnoha ŭpraŭleńnia justycyi.
Tym časam Hancavicki rajonny Saviet deputataŭ i Hancavicki rajonny vykanaŭčy kamitet admovili ŭ akredytacyi žurnalistam niedziaržaŭnaj hazety «Hancavicki čas».
Z prośbaj ab akredytacyi namieśnika hałoŭnaha redaktara hazety Piatra Huzajeŭskaha, karespandentaŭ Iryny Damarackaj i Śviatłany Małyški redakcyja źviarnułasia ŭ orhany miascovaj ułady 17 studzienia.
«Padčas abmierkavańnia hetaha pytańnia i ŭ adpaviednaści z Zakonam Respubliki Biełaruś… «Ab druku i inšych ŚMI» pryniata rašeńnie admović u akredytacyi pry rajonnym vykanaŭčym kamitecie prapanavanych Vami pradstaŭnikoŭ hazety», — havorycca ŭ liście staršyni rajvykankama Ŭładzimiera Stolara ad 1 lutaha.
Staršynia rajonnaha Savieta deputataŭ Viktar Drozd adkazaŭ na zvarot žurnalistaŭ analahičnym čynam, taksama nijak nie patłumačyŭšy pryčynaŭ svajoj admovy.
Hałoŭny redaktar «Hancavickaha času» Alaksiej Bieły zajaviŭ, što taki adkaz nie staŭ dla jaho niečakanaściu — žurnalisty i siońnia pracujuć biez akredytacyi pry miascovych orhanach ułady. Tym nie mienš, redakcyja źbirajecca abskardžvać admovy ŭ vyšejšych instancyjach.
Varta adznačyć, što žurnalisty vydańnia rehularna sutykajucca z padobnymi prablemami pry atrymańni infarmacyi.
Niedziaržaŭnaja hazeta «Novy čas» apublikavała zvarot da čytačoŭ z prośbaj akazać materyjalnuju padtrymku vydańniu. Nahadajem, što 20 śniežnia sud zadavoliŭ pazoŭ Mikałaja Čarhinca da hazety «Novy čas» i žurnalista Alaksandra Tamkoviča ab abaronie honaru i hodnaści. U vyniku pavodle rašeńnia Pieršamajskaha suda Mienska pryvatnaje pradpryjemstva «Čas navinaŭ», što vydaje hazetu «Novy čas», musić vypłacić M. Čarhincu 50 młn. rubloŭ, žurnalist Alaksandr Tamkovič — 1 młn. rubloŭ.
Kamientary