Polskich inviestaraŭ u Biełaruś zavablivajuć stabilnaściu i paśpiachovymi prykładami
13 maja ŭ minskim hateli «Reniesans « prajšoŭ sieminar dla polskich inviestaraŭ. Na im biełaruskija čynoŭniki, pradstaŭniki mižnarodnych fondaŭ i tyja, chto ŭžo ukłaŭ hrošy ŭ prasoŭvańnie svaich kampanij i pasłuh na biełaruskim rynku, raskazvali patencyjnym partnioram pra pierśpiektyvy raźvićcia biznesu ŭ Biełarusi.
Adkryŭ sustreču namieśnik ministra zamiežnych spraŭ Polščy Konrad Paŭlik. Jon adznačyŭ, što polskija kampanii ź cikaŭnaściu hladziać na ekanamičnuju situacyju ŭ Biełarusi, i, niahledziačy na niaprosty postkryzisny pieryjad, supracoŭnictva z polskimi biznesoŭcami maje budučyniu.
«My susiedzi. U nas ahulnaja histaryčnaja i kulturnaja spadčyna, tamu nie dziŭna, što polski biznes zacikaŭleny ŭ partniorstvie», — adznačyŭ Paŭlik.
Pradstaŭniki mižnarodnych finansavych arhanizacyj raspaviali na jakich umovach jany dapamahajuć biznesu ŭ Biełarusi, i patłumačyli ŭmovy, na jakich, pry patrebie, inviestary mohuć atrymać hrošy dla raźvićcia svaich pradpryjemstvaŭ na terytoryi našaj krainy. Alaksandr Jaŭsiejčyk, pradstaŭnik Jeŭrapiejskaha banku rekanstrukcyi i raźvićcia, ŭ jakaści prykładu paśpiachovaha mižnarodnaha supracoŭnictva pryvioŭ kampaniju «StadlerRailGroup». Šviejcarskaja kampanija spačatku vyjšła na biełaruski rynak jak pastaŭščyk elektraciahnikoŭ, a zatym, acaniŭšy pierśpiektyvy, nie pabajałasia ŭkłaści hrošy ŭ budaŭnictva ŭłasnaha zavodu pad Minskam.
«Rekłamavali» ajčynny rynak i pradstaŭniki dziaržaŭnych arhanizacyj. Na sieminary vystupili pradstaŭniki mahiloŭskaj i haradzienskaj SEZ, namieśnik dyrektara departamientu źniešnieekanamičnaj dziejnaści MZS RB Rusłan Jesin i prajekt-mieniedžar Nacyjanalnaha Ahienctva Inviestycyi i Pryvatyzacyi Raman Praskałovič.
U pryvatnaści, Praskałovič raspavioŭ, čamu vyhadna vychodzić na biełaruski rynak. Siarod pryčyn jon nazvaŭ padatkovyja lhoty ŭ industryjalnym parku i parku vysokich technałohij, nizki košt pracoŭnaj siły i mahčymaść vychadu na rynak Jeŭrazijskaha sajuzu.
«Adna z našych pieravah – stabilnaść, što asabliva važna ŭ śviecie apošnich padziej u rehijonie», — skazaŭ Praskałovič, prazrysta namiakajučy na padziei va Ukrainie.
U kancy sieminara vystupili tyja, chto ŭžo viadzie biznes ŭ Biełarusi: kiraŭnik biełaruskaj filii mižnarodnaj IT-kampanii»Ericpol» Valery Cylindź i Słavamir Ślak, člen Savieta dyrektaraŭ ZAT «Ideja Bank». Jany abnadzieili aŭdytoryju – vieści spravy ŭ Biełarusi možna, i navat paśpiachova. U jakaści prykłada, Ślak pryvioŭ rost aktyvaŭ svajho banka. Z 2008 pa 2015 hod jany vyraśli amal na 5500%. Pa słovach bankira, isnuje nie šmat krain, dzie možna vyjści na takija pakazčyki.
«Luby biznes składany. A bankaŭskaja sprava asabliva. Ale ŭ Biełarusi zajmacca biznesam całkam mahčyma», — skazaŭ Ślak.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty47
Kamientary