Польскіх інвестараў у Беларусь завабліваюць стабільнасцю і паспяховымі прыкладамі
13 мая ў мінскім гатэлі «Рэнесанс « прайшоў семінар для польскіх інвестараў. На ім беларускія чыноўнікі, прадстаўнікі міжнародных фондаў і тыя, хто ўжо уклаў грошы ў прасоўванне сваіх кампаній і паслуг на беларускім рынку, расказвалі патэнцыйным партнёрам пра перспектывы развіцця бізнэсу ў Беларусі.
Адкрыў сустрэчу намеснік міністра замежных спраў Польшчы Конрад Паўлік. Ён адзначыў, што польскія кампаніі з цікаўнасцю глядзяць на эканамічную сітуацыю ў Беларусі, і, нягледзячы на няпросты посткрызісны перыяд, супрацоўніцтва з польскімі бізнэсоўцамі мае будучыню.
«Мы суседзі. У нас агульная гістарычная і культурная спадчына, таму не дзіўна, што польскі бізнэс зацікаўлены ў партнёрстве», — адзначыў Паўлік.
Прадстаўнікі міжнародных фінансавых арганізацый распавялі на якіх умовах яны дапамагаюць бізнэсу ў Беларусі, і патлумачылі ўмовы, на якіх, пры патрэбе, інвестары могуць атрымаць грошы для развіцця сваіх прадпрыемстваў на тэрыторыі нашай краіны. Аляксандр Яўсейчык, прадстаўнік Еўрапейскага банку рэканструкцыі і развіцця, ў якасці прыкладу паспяховага міжнароднага супрацоўніцтва прывёў кампанію «StadlerRailGroup». Швейцарская кампанія спачатку выйшла на беларускі рынак як пастаўшчык электрацягнікоў, а затым, ацаніўшы перспектывы, не пабаялася ўкласці грошы ў будаўніцтва ўласнага заводу пад Мінскам.
«Рэкламавалі» айчынны рынак і прадстаўнікі дзяржаўных арганізацый. На семінары выступілі прадстаўнікі магілёўскай і гарадзенскай СЭЗ, намеснік дырэктара дэпартаменту знешнеэканамічнай дзейнасці МЗС РБ Руслан Есін і праект-менеджар Нацыянальнага Агенцтва Інвестыцыі і Прыватызацыі Раман Праскаловіч.
У прыватнасці, Праскаловіч распавёў, чаму выгадна выходзіць на беларускі рынак. Сярод прычын ён назваў падатковыя льготы ў індустрыяльным парку і парку высокіх тэхналогій, нізкі кошт працоўнай сілы і магчымасць выхаду на рынак Еўразійскага саюзу.
«Адна з нашых пераваг – стабільнасць, што асабліва важна ў свеце апошніх падзей у рэгіёне», — сказаў Праскаловіч, празрыста намякаючы на падзеі ва Украіне.
У канцы семінара выступілі тыя, хто ўжо вядзе бізнэс ў Беларусі: кіраўнік беларускай філіі міжнароднай IT-кампаніі»Ericpol» Валеры Цыліндзь і Славамір Сляк, член Савета дырэктараў ЗАТ «Ідэя Банк». Яны абнадзеілі аўдыторыю – весці справы ў Беларусі можна, і нават паспяхова. У якасці прыклада, Сляк прывёў рост актываў свайго банка. З 2008 па 2015 год яны выраслі амаль на 5500%. Па словах банкіра, існуе не шмат краін, дзе можна выйсці на такія паказчыкі.
«Любы бізнэс складаны. А банкаўская справа асабліва. Але ў Беларусі займацца бізнэсам цалкам магчыма», — сказаў Сляк.
Цяпер чытаюць
Міністр культуры выцягнуў у эфір чарговага Астапа Бэндара. І гэта стала апошняй кропляй: супраць гэтага фермера-хвалька выступіла сям’я20
Каментары