15 hadoŭ bieź Źmitra Zavadskaha

Siońnia, 7 lipienia, roŭna 15 hadoŭ z taho dnia, jak byŭ hvałtoŭna vykradzieny žurnalist Źmicier Zavadzki.

Mienavita takoj ža letniaj ranicaj Źmicier pajechaŭ na słužbovaj mašynie ŭ aeraport sustrakać svajho siabra i kalehu Paŭła Šaramieta i dahetul ab jahonym losie ničoha nie viadoma. Mnostva razoŭ, za hetyja hady, biełaruskija ŭłady zapeŭnivali, što ŭ ich jość niejkija novyja dadzienyja pa spravie, što voś-voś i Źmiciera znojduć. Na pačatku byli zajavy prezidenta, što kamuści «adkruciać hałavu». Ale, nažal, čas niaŭmolna lacić, a tajamnica pakrytaja nieviadomaściu, datyčnaja vykradańnia Źmiciera, tak i zastajecca tajamnicaj, jakuju ŭłady Biełarusi ŭsimi srodkami i siłami sprabujuć nazaŭždy pakinuć nieraskrytaj.

Usie hady nas imknucca ŭvieści ŭ zman, što vinavatyja znojdzieny i niama čaho bolš čakać, majučy na ŭvazie prysud V. Ihnatoviču i M. Maliku. Adnak hetyja ludzi byli asudžanyja tolki za vykradańnie Źmitra, a nie za zabojsta i navat versija, što hetyja ludzi pazbavili jaho svabody, na sudzie vyhladała nie pierakanaŭčaj i nia była pryniata ni siamjoj Zavadzkaha, ni ich pradstaŭnikami. Pa ich słovach, sudu nia ŭdałosia ŭstanavić ni dakładnaha času vykradańnia, ni miesca, nie było i pierakanaŭčaha matyvu. Udava Źmitra Zavadzkaha, Śviatłana, ličyć vielmi dziŭnym toj fakt, što stolki hod Ihnatovič znachodzicca za kratami, asudžany na pažyćciovy termin, a našy śledčyja ź im nie pracujuć (viedajučy jak u našaj krainie zdabyvajuć pakazańni), mienavita viedajuć, što heta nia jon vykradaŭ Źmitra.

Z 2006 hodu sprava ab vykradańni i zabojstvie Źmitra Zavadzkaha była prypyniena, i da hetaha času nie ŭznaŭlałasia. Aktyŭnych śledčych dziejańniaŭ nie viadziecca. Termin daŭnity pa tym artykule pa jakim uzbudžana sprava skončvajecca ŭ hetym hodzie i jość vialikaja vierahodnaść, što spravu mohuć začynić i zdać u archiŭ.

Razmaŭlajučy ŭ hetyja dni ź blizkimi Źmiciera, vyrazna prasočvajecca strašennaja stomlenaść ad usiaho, što adbyvajecca, ale jany jašče mocnyja ducham i praciahvajuć zmahacca, vieračy ŭ pieramohu spraviadlivaści, i žyvuć ŭspaminami ab Źmitry. I hetyja ŭspaminy tych, chto viedaŭ Źmiciera, dahetul nastolki vyraznyja, byccam i nie było hetych piatnaccai hadoŭ bieź jaho.

• 0
• 0
• 0
• 0
• 0
• 0