Chirurha buduć sudzić za amputavańnie ruki šaścikłaśniku 

Upraŭleńniem Śledčaha kamiteta pa Viciebskaj vobłaści zavieršana rasśledavańnie kryminalnaj spravy pa fakcie nienaležnaha vykanańnia prafiesijnych abaviazkaŭ miedycynskim rabotnikam Dubrovienskaj centralnaj rajonnaj balnicy. 

Jak paviedamiła BiełaPAN aficyjny pradstaŭnik USK pa Viciebskaj vobłaści Ina Harbačova, śledstvam sabrana dastatkovaja kolkaść dokazaŭ dla pradjaŭleńnia abvinavačańnia ŭraču-chirurhu, zahadčyku chirurhičnaha adździaleńnia, i pryniaćcia rašeńnia ab pieradačy kryminalnaj spravy prakuroru dla nakiravańnia ŭ sud. 

Nahadajem, u žniŭni minułaha hoda va USK pastupiła zajava žycharki Dubrovienskaha rajona ab nienaležnym akazańni miedycynskaj dapamohi jaje małaletniamu synu. Pavodle jaje słoŭ, u vyniku nienaležnaha lačeńnia pierałomu ruki ŭ syna ŭ balnicach rajona i vobłaści ruku padletku amputavali. Pa hetym fakcie Dubrovienskim RASK była praviedziena daśledčaja pravierka. Paśla atrymańnia zaklučeńnia kamisijnaj sudova-miedycynskaj ekśpiertyzy na padstavie vynikaŭ pravierki śledstva pryniało rašeńnie ab raspačynańni spravy na padstavie č. 1 art. 162 KK (nienaležnaje vykanańnie prafiesijnych abaviazkaŭ miedycynskim rabotnikam). 

Śledčaj hrupaj ustanoŭlena, što 25 lipienia 2014 hoda ŭ traŭmatałahičny punkt Aršanskaj centralnaj palikliniki z prykmietami pierałomu levaj ruki byŭ dastaŭleny 11-hadovy žychar Dubrovienskaha rajona, dzie paśla praviadzieńnia nieabchodnych daśledavańniaŭ jamu byŭ nakładzieny hips. Paśla akazańnia pieršaj miedycynskaj dapamohi z dyjahnazam «zakryty pierałom levaj pramianiovaj i łokcievaj kiści ŭ typovym miescy sa źmiaščeńniem askołkaŭ» dzicia adpuścili dadomu na ambułatornaje lačeńnie. 

Z pryčyny paharšeńnia samaadčuvańnia 28 lipienia małaletni sa svajakami źviarnuŭsia na pryjom da ŭrača — zahadčyka chirurhičnaha adździaleńnia Dubrovienskaj centralnaj rajonnaj balnicy. Adnak toj abśledavańnie małaletniaha vykanaŭ nie ŭ poŭnym abjomie, raźvićcio ŭskładnieńnia nie zapadozryŭ, nie pryznačyŭ nieabchodnyja analizy, nie zrabiŭ termamietryju cieła, a pry ŭzmacnieńni acioku nie źniaŭ hipsavuju paviazku i nie raspačaŭ mier da jaho špitalizacyi, što ŭ svaju čarhu pryviało da źmiarćvieńnia (hanhreny) levaj ruki pacyjenta i nieabchodnaści jaje amputacyi. 

Pry rasśledavańni kryminalnaj spravy asobnaja ŭvaha nadavałasia pryčynam i ŭmovam, jakija spryjajuć učynieńniu złačynstva. U adras upraŭleńnia achovy zdaroŭja Viciebskaha abłvykankama nakiravana pradstaŭleńnie ab niedapuščeńni nienaležnaha vykanańnia miedycynskimi rabotnikami prafiesijnych abaviazkaŭ i chałatnaha staŭleńnia da vykanańnia słužbovych instrukcyj. Adnačasova miedycynski rabotnik adchileny ad pasady zahadčyka chirurhičnaha adździaleńnia. 

Kryminalnaja sprava pieradadziena prakuroru dla nakiravańnia ŭ sud.

• 0
• 0
• 0
• 0
• 0
• 0
• 0
• 0