Urešcie Kazulinu dali raźvitacca z žonkaj
A pieršaj hadzinie nočy damoŭ u Miensk z kalonii «Vićba‑3» pryvieźli Alaksandra Kazulina. Palitviaźniu dali trochdzionny adpačynak na čas pachavańnia jaho žonki Iryny, jakaja pamierła 23 lutaha.
Alaksandar Kazulin |
A pieršaj hadzinie nočy damoŭ u Miensk z kalonii «Vićba‑3» pryvieźli Alaksandra Kazulina. Palitviaźnia nie vyzvalili, a tolki dali trochdzionny adpačynak na čas pachavańnia jaho žonki Iryny, jakaja pamierła 23 lutaha.
SMS-paviedamleńnie pra heta brat palitviaźnia skinuŭ na redakcyjny telefon a 1.50.
Praz hadzinu žurnalisty radyjo «Svaboda» ŭbačylisia z Alaksandram Kazulinym u jahonaj kvatery, dzie stajać partrety Iryny z čornymi žałobnymi stužkami. U momant sustrečy były kandydat na prezydenta davaŭ interviju pa telefonie.
Zapomnilisia pieršyja słovy, pačutyja ad Kazulina:
«Byvali dni, kali ja atrymlivaŭ pa 200 listoŭ. Ale jak ni dziŭna, bolšaść ź ich była ź inšych krainaŭ śvietu. Biełarusam jašče treba budzie pračnucca».
U Miensk Alaksandra Kazulina pryvioz na zvyčajnych «Žyhulach» načalnik kalonii Vital Ahniścikaŭ.
Jašče ŭčora hety ž milicyjant zajaviŭ žurnalistam, što rychtuje admovu ŭ vodpusku Kazulinu, pakolki toj «mieŭ čatyry dyscyplinarnyja spahnańni».
Pozna ŭviečary jon užo pakazvaŭ byłomu kandydatu na prezydenta svoj zahad pra vodpusk.
«Vy nie ŭjaŭlajecie, što tady adbyvałasia ŭ kalonii, — zhadvaje Alaksandar Kazulin.— Kalonija była ačeplena AMONam, unutry paŭsiul achova, pierasoŭvańni byli zabaronienyja».
Alaksandar Kazulin apavioŭ, jak daviedaŭsia pra śmierć žonki.
24‑ha ranicaj Vital Ahniścikaŭ vyklikaŭ jaho da siabie u kabinet i pakazaŭ telehramu. Dniom raniej Alaksandar Kazulin prasiŭ dać jamu telefon, kab pazvanić damoŭ, ale telefonu «nie znajšli». I voś jon adčuŭ žudasny bol, što navat nie zmoh jašče raz skazać Irynie słova padtrymki.
«Ja skazaŭ: «Usio! Mianie strymlivała chvaroba žonki, zaraz ništo nie strymlivaje» i adrazu abviaściŭ haładoŭku. Sarvaŭ ź siabie ŭsie turemnyja našyŭki i abviaściŭ, što bolš ich paradkam nie padparadkoŭvajusia. Tady ž napisaŭ zajavu pra haładoŭku na 4‑ch staronkach, dzie usio patłumačyŭ: i pra niezakonny aryšt, i pra nieabchodnaść pajechać na pachavańnie Iryny.»
Vital Ahniścikaŭ u kancy dnia skaža žurnalistam, što jon ničoha nie čuŭ pra haładoŭku, a 25‑ha lutaha z kalonii pryjdzie aficyjnaja infarmacyja i pra toje, što nibyta «Kazulin nie napisaŭ zajavy pra adpačynak».
«Heta zvyčajnaja chłuśnia. Ja pra ŭsio napisaŭ u zajavie i padpisaŭ, jak zvyčajna padpisvajusia: «niezakonna asudžany A. Kazulin».
Alaksandar Kazulin miarkuje, što jahonuju žonku Irynu «padšturchnuła da apošniaj rysy ŭłada».
Spačatku tym, što niezakonna aryštavali i asudzili jaho jak kandydata na prezydenta ŭ 2006 hodzie.
«Alaksandar Łukašenka dobra viedaŭ, što jana ŭžo tady była chvoraja», — zhadvaje spadar Kazulin. Na jaho dumku, Iryna, zastaŭšysia bieź jaho, «straciła na pieražyvańni siły, jakija byli patrebny dla baraćby z chvarobaj».
Apošniaj kroplaj, pavodle Alaksandra Kazulina, byŭ «handal», pra jaki Alaksandar Łukašenka skazaŭ tydzień tamu ŭ Viciebsku. Kali ŭmovaj vyzvaleńnia i sustrečy z čałaviekam, u jakoha rak čaćviortaj stadyi, pastavili terminovy vyjezd abaich za miažu.
«Kali b ja paprasiŭ tady mianie azałacić, azałacili b, tolki kab vyšturchnuć ź Biełarusi», — miarkuje Alaksandar Kazulin.
Na hetyja ŭmovy Alaksandar j Iryna nie pahadzilisia. Płataj stała toje, što jany ŭžo nikoli nie pabačacca.
«U mianie ad hetaha razryvajecca serca», — kaža Kazulin.
Siońniašniuju Biełaruś Alaksandr Kazulin paraŭnoŭvaje z kalonijaj.
«Tolki heta kalonija sučasnaja, madernizavanaja, dzie praviać tyja, chto sam vinavaty ŭ złačynstvach».
Treciaja častka listoŭ na volu i z voli da adrasataŭ nie dachodzić. Bolšaść skarhaŭ na niezakonnyja prysudy i dziejańni administracyi zastajucca tam ža, u turmie. Za kratami šmat achviaraŭ milicejskich ci prakurorskich prypisak, kampanij, eksperymentaŭ.
«Spravakavali haspadara pradać niekalki hałovak maku, a potym pasadzili na 6 hadoŭ», — adna z turemnych historyj, sustretych Kazulinym u «Vićbie‑3».
Pavodle Alaksandra Kazulina jamu, jak kandydatu na prezydenta, karysna było vyvučyć i toj bok žyćcia, jaki adkryvajecca za kratami.
«Zajaŭlaju: treba pierahledzieć dziesiatki tysiač takich voś sfalšavanych kryminalnych spraŭ», — kaža Alaksandar Kazulin.
Jon miarkuje, što jość pramaja suviaź pamiž turemnymi paradkami ŭ Biełarusi i tym faktam, što u svoj čas Alaksandar Łukašenka pracavaŭ u administracyi adnoj ź biełaruskich kalonij.
Ci prystasavaŭsia Alaksandar Kazulin da turemnych paradkaŭ?
Pra siabie jon kaža, što zastaŭsia volnym čałaviekam. Prajšoŭ pakarańni, haładoŭku, izalatar, jaho abmiažoŭvajuć u kantaktach ź inšymi viaźniami, ale jon nie zdajecca.
«Nijakaha pamiłavańnia padpisvać nikoli nia budu», — ćvierdzić Alaksandar Kazulin i sam pierachodzić ŭ ataku:
«Za hetyja try dni padam na Alaksandra Łukašenku ŭ sud za maralnyja pakuty majoj žoncy Irynie».
Taksama palitviazień papiaredžvaje, što praciahnie ŭ kalonii haładoŭku.
«Budu dalej haładavać i patrabavać nia tolki svajho vyzvaleńnia, ale i vyzvaleńnia Andreja Kima. Jon, darečy, šmat pisaŭ mnie ŭ kaloniju, zavočna my dobra znajomy», — kaža Alaksandar Kazulin.
Kamientary