Niešta niejmaviernaje! BATE — «Roma» — 3:2 FOTY
U Barysavie hetym viečaram rabiłasia niešta niejmaviernaje. BATE ŭ ramkach hrupavoha etapa Lihi čempijonaŭ pieramoh italjanskuju «Romu» ź likam 3:2.
Zdajecca, u biełaruskaj kamandy atrymlivałasia litaralna ŭsio. Pieršy hoł Ihara Stasieviča na 8-aj chvilinie mnohimi moh razhladacca jak vypadkovy. Maŭlaŭ, rassłabilisia italjancy ŭ pačatku hulni. Paśla atrymajecie pa zubach. Nie ŭhadali.
Užo na 13-aj chvilinie Filip Mładzienavič zabiŭ šalony hoł. I razam z tym vielmi prafiesijny. Naš sierb pryniaŭ miač dzieści bližej da centra pola. Prasunuŭsia krychu napierad, u takich situacyjach usie čakajuć dyjahanal na supraćlehły fłanh. Čakaŭ jaje i bramnik «Romy» Vojcech Ščensny, jaki rvanuŭsia na pierachop. A Mładzienavič zamiest pasa ŭdaryŭ prosta ŭ varoty — 2:0.
Varta adznačyć, što ŭ Barysaŭ «Roma» pryjechała krychu ŭ asłablenym składzie. Naprykład, traŭmu atrymaŭ simvał kłuba, słavuty napadajučy Frančeska Toci. Paškodžańnie ŭ baśnijca Edvina Džeka. Ale i tyja hulcy, jakija byli ŭ abojmie Rudzi Harsii, uražvali. Tym bolš, što ŭ pieršym matčy «Roma» zhulała ŭničyju z samoj «Barsiełonaj» — 1:1.
Na 30-j chvilinie Filip Mładzienavič aformiŭ dubl. Biez sumnievaŭ, hety miač stanie adnym z najbolš pryhožych siarod zabitych u hety viečar Lihi čempijonaŭ. Zdavałasia, što miač užo sychodziŭ za liniju, ale Maksim Vaładźko dahnaŭ miač, apracavaŭ, dy addaŭ pieradaču na partniora pa fłanzie. U takich vypadkach kažuć, što zalataje tolki adzin miač ź dziesiaci, nastolki efiektna hulec BATE pierakinuŭ bramnika.
3:0 u pieršym tajmie. Cikava, što trenier «Romy» Rudzi Harsija ŭžo prachodziŭ takoje. U 2012 hodzie BATE praviarnuŭ toj ža fint z «Lilem», jaki ŭznačalvaŭ Harsija. Tady ŭ druhim tajmie francuzy zmahli adyhrać tolki adzin hoł.
Nie skazać, kab BATE akapaŭsia paśla hetaha ŭ abaronie. Kamanda praciahvała šukać ščaścia la čužych varot. Nie skazać, kab «Roma» ničoha nie stvarała la našych. Momanty byli i zusim niamała, ale da peŭnaha času šancavała. Pieršy tajm u barysaŭcaŭ, jak my ŭžo pisali, atrymlivałasia ŭsio.
Druhi tajm BATE krychu prycisnuŭsia da svaich varot. Tamu pytańnie hoła było tolki pytańniem času. Čym daŭžej nie prapuskaŭ naš čempijon — tym lepš.
Prapuścili na 65-aj chvilinie, adznačyŭsia ivuaryjec Žervińjo, hałoŭnaja zorka «Romy» siońnia. Na kuražy italjancy zmahli adznačycca jašče raz. Na 82-aj chvilinie supierniki vydrapali miač na fłanzie ŭ Palakova, a ŭžo Tarasidzis rasstrelvaŭ Černika.
Nastupnyja imhnieńni byli niervovymi, daviałosia amal što adličvać siekundy. Niedzie na karyść BATE zhulała ŭdača, kali miač trapiŭ u belku.
I, tym nie mienš, vytrymali. 3:2! Pieršaja pieramoha BATE ŭ hrupavym etapie Lihi čempijonaŭ. Chto viedaje, moža, i nie apošniaja.
Taksama ŭ našaj hrupie «Barsiełona» pieramahła niamiecki «Bajer» — 2:1. Ciapier «Barsiełona» maje 4 punkty, «Bajer» i BATE — pa 3, «Roma» — 1. Nastupnaj u Barysaŭ pryjedzie «Barsa».
Kamientary