Biełaruska Nadzieja Kučar debiutavała ŭ Bierlinskaj opiery ŭ hałoŭnaj roli ŭ «Travijacie».
Staatsoper Berlin zastajecca na rekanstrukcyi i daje śpiektakli na časovaj scenie ŭ Schiller-Theater.
Jak piša vydańnie Resmusica, biełaruskaj śpiavačcy pryjšłosia rychtavać śpiektakl śpiecham. Joj daviałosia padmianić Soniu Jančavu, jakaja nie zmahła zaśpiavać. Resmusica hetym tłumačyć «trochi pasiŭnuju manieru» vykanańnia, ale adznačaje i «vyklučnaje vałodańnie hołasam», «daskanałaje avałodańnie ŭsimi techničnymi staŭkami roli», biezdakornaść «jak u linijach, tak i ŭ vysokich notach, i ŭ žvavaści dyjałohu».
Raniej biełaruskaja opiernaja śpiavačka Nadzieja Kučar tryumfalna debiutavała ŭ Vialikim Teatry Ženievy.
Siezon tam adkryŭsia patryjatyčnaj opieraj Džaakina Rasini «Vilhielm Tel». Pastanoŭka ciahniecca «nudna i sonna, — piša vydańnie resmusica.com, — pakul na scenie nie źjaŭlajecca Nadzieja Kučar u roli Matyldy i nie pačynaje śpiavać». «Jaje hołas vyklučna lohki, a pryhažość linii śpievu nahadvaje Kaciu Ryčareli, jakaja vykonvała na ženieŭskaj scenie tuju samuju rolu ŭ vieraśni 1979 hoda!» — usklikaje recenzient.
Nadzieja Kučar vyrasła ŭ Biełarusi. Jana skončyła Minskaje muzyčnaje vučylišča imia Hlinki pa śpiecyjalnaści «muzykaznaŭstva», ale paśla vyrašyła pastupić u kansiervatoryju Sankt-Pieciarburha na vakał.
Jana śpiavała ŭ Minsku, Piermi, vyjhrała prestyžny mižnarodny konkurs u Kardyfie (Valija) i, miarkujuć krytyki, jaje čakaje bliskučaja mižnarodnaja karjera. Mahčyma, ź Biełarusi ŭzyšła zorka, roŭnych jakoj jašče nie było.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku60
Kamientary