Asobnyja karystalniki Facebook zaŭvažyli źmianieńnie ŭ mabilnym dadatku sacsietki: stužku navin padzialili pa temach i dazvolili, naprykład, čytać materyjały pra modu abo zabavy asobna ad sportu i palityki. Pra heta paviedamlaje The Verge.
Toje, jak asnoŭnaja stužka padzielena pa temach, nahadvaje pryładu Paper ad Facebook, jakaja źjaviłasia ŭ 2014 hodzie. U Paper možna było čytać nie tolki artykuły ad vydańniaŭ, ale i zapisy ad siabroŭ, adnak pryłada pazicyjanavałasia jak asobny ad Facebook servis.
Akramia tematyčnaj stužki navin, kampanija Facebook taksama stała testavać «markietpłejs»: raździeł dla kupli tavaraŭ ad roznych kramaŭ i asobnych karystalnikaŭ. Jon źjaviŭsia ŭ nievialikaj kolkaści amierykanskich karystalnikaŭ jašče ŭ kastryčniku.
U adkaz na zapyt The Verge pradstaŭniki Facebook zajavili, što sapraŭdy testujuć interfiejs kramy, ale pakul jon daloki ad paŭnavartasnaha zapusku. Što tyčycca stužki navin, pakul nie viadoma, ci źjavicca jana dla ŭsich karystalnikaŭ: heta novaŭviadzieńnie kampanija nie kamientavała.
U kastryčniku 2015 u Twitter zapuścili raździeł Twitter Moments dla hrupavańnia kantentu pa temach, adnak stvareńniem i napaŭnieńniem takich padborak redaktary zajmajucca ŭručnuju. Funkcyja pracuje tolki ŭ ZŠA i Vialikabrytanii.
Kamientary