Vinšujem, ciapier vy jeŭradeputat. Voś što vas čakaje i kolki vam buduć płacić

Dla tych, chto cikavicca dziejnaściu i niuansami žyćcia deputataŭ Jeŭraparłamienta, vydańnie Politico zrabiła nievialiki hajd, u jakim raspaviała, čaho ŭvohule čakać ad takoj prafiesii i nakolki siońnia jaje možna nazyvać chalaŭnaj.

1. Dachod i jaho dekłaravańnie

Na hety momant členy Jeŭraparłamienta atrymlivajuć zarobki pamieram 10075 jeŭra na miesiac (kala 37000 rubloŭ) i dadatkovuju dapamohu na pražyvańnie pamieram 350 jeŭra na dzień (kala 1300 rubloŭ). 

U pačatku i kancy terminu paŭnamoctvaŭ jeŭradeputat pavinien padrabiazna zadekłaravać usie svaje asabistyja aktyvy, a taksama paznačać u dekłaracyjach usie svaje inšyja padpracoŭki i dachody na baku, jakija prynosiać bolš za 5000 jeŭra na hod (kali takija jość). Za parušeńnie hetych pravił uvodziacca štrafy (naprykład, mohuć pazbavić deputata štodzionnych 350 jeŭra na dva miesiacy).

Takija prazrystyja zakony manitorynhu finansaŭ byli ŭviedzienyja zusim niadaŭna paśla vialikaha karupcyjnaha skandału ŭ Jeŭraparłamiencie ŭ 2022 hodzie pad nazvaj Qatargate («Katarhiejt), kali hrupa deputataŭ razam z tahačasnaj namieśnicaj kiraŭnika Jeŭraparłamienta Jevaj Kajli za chabar tajemna dapamahali niekatorym aŭtarytarnym krainam, asabliva Kataru, upłyvać na jeŭrapiejski orhan ułady i prasoŭvać tam svaje intaresy.

2. Naviedvańnie pracy

Zhodna z novymi praviłami za 2024 hod, kožny jeŭradeputat, jaki maje vystupać na słuchańniach, pavinien abaviazkova ich naviedvać, navat kali razhladajemy zakonaprajekt harantavana budzie ci nie budzie pryniaty.

Raniej sprabavali ŭvieści normu, pavodle jakoj parłamientaryj moža nie naviedvać słuchańni navat z zapłanavanym svaim vystupleńniem pry ŭmovie, kali na pasiadžeńnie pryjdzie mienš za tracina zakanadaŭcaŭ ES, ale norma tak i nie była pryniataja.

3. «Cieniavaja» dypłamatyja i łabizm

Jašče da vyšejzhadanaha «Katarhiejta» jeŭrapiejskija parłamientaryi pry žadańni mahli akazvać dapamohu toj ci inšaj krainie pa-za ES praz uvachodžańnie ŭ tak zvanyja deputackija «hrupy siabroŭstva», jakija dazvalali jaje ŭdzielnikam biez strohaha nahladu i ŭniasieńnia ŭ pratakoł samastojna naviedvać pa zaprašeńni ad roznych pasolstvaŭ peŭnyja mierapryjemstvy, sustrečy i zvanyja viačery.

Akramia hetaha, jeŭradeputaty byli volnyja nie raskryvać nahladnym orhanam infarmacyju ab usich sustrečach z łabistami i inšymi zacikaŭlenymi ŭ prasoŭvańni peŭnych intaresaŭ asobami.

Ciapier z uviadzieńniem novych praviłaŭ «hrupy siabroŭstva» ŭ Jeŭraparłamiencie zabaronienyja, a lubaja dziejnaść pa deputackaj dapamozie zamiežnym krainam pavinna ŭzhadniacca z Kamitetam pa zamiežnych spravach Jeŭraparłamienta ci adbyvacca ŭ składzie aficyjnaj zamiežnaj delehacyi.

U dadatak da hetaha ni jeŭradeputaty, ni ich pamočniki ciapier nie mohuć pravodzić nijakich tajemnych sustreč z łabistami i abaviazanyja aficyjna ich rehistravać u pratakole (adnak, jak piša Politico, usio jašče zastajucca asobnyja členy Jeŭraparłamienta, jakim pakul što dazvolena ździajśniać kanfidencyjnyja sustrečy z zacikaŭlenymi asobami na baku).

4. Žurnalisty i hramadzianski nahlad

Vydańnie Politico źviartaje ŭvahu, što za apošnija hady istotna pavialičyłasia kolkaść reparcioraŭ roznych ŚMI i pradstaŭnikoŭ niaŭradavych arhanizacyj, jakija litaralna žyvuć u ścienach Jeŭraparłamienta i sočać za kožnym krokam jeŭrapiejskich zakanatvorcaŭ.

Hetaja tendencyja robić źlivy sakretnaj i inšaj niepubličnaj infarmacyi bolš častaj źjavaj.

5. Abmiežavańni i bonusy paśla zvalnieńnia

Harantyja vysokaapłatnaj i stabilnaj zaniataści — adna z hałoŭnych pieravah jeŭrapiejskaj zakanatvorčaści. Navat paśla zvalnieńnia stanovicca dastupnym biaskoncaje mnostva pasadaŭ łabistaŭ i «starejšych daradcaŭ» u kamandach novych ci ŭsio jašče dziejnych jeŭradeputataŭ, adznačaje Politico.

Adnak paśla «Katarhiejta» i tut byli ŭviedzienyja peŭnyja abmiežavańni: ciapier zvolnienamu deputatu pryjdziecca čakać šeść miesiacaŭ z momantu skančeńnia terminu paŭnamoctvaŭ, pierš čym jon zmoža stać łabistam ci daradcam.

Taksama źnikła prava mieć pastajannyja propuski ŭ Jeŭraparłamient, jakija raniej vydavalisia byłym deputatam. Zamiest hetaha pryjdziecca rehistravać novy propusk dla kožnaha asobnaha naviedvańnia.

***

Nahadajem, što ŭletku my pisali pra tyktokiera z Kipra, jaki staŭ jeŭradeputatam ad svajoj krainy i raspavioŭ pra svoj novy zarobak i bonusy.

Pa słovach 24-hadovaha Fidyjasa Panajotu, jon atrymlivaŭ 8000 jeŭra štomiesiac plus dadatkovyja 350 jeŭra štodzień na kišennyja vydatki.

Akramia hetaha, na zarobak kamandy Panajotu štomiesiac vydzialajuć 30000 jeŭra, a taksama 5000 jeŭra na ŭtrymańnie ofisa deputata ŭ jaho krainie. U dadatak da hetaha jeŭradeputat moža vykarystać 4000 jeŭra na miesiac na prasoŭvańnie svajoj pracy ŭ parłamiencie.

Ale i heta nie ŭsio. Błohier maje jašče i dadatkovyja lhoty — naprykład, kiroŭca ŭ Bruseli, kvitki biznes-kłasa na pieraloty dadomu.

• 0
• 0
• 0
• 0
• 0
• 0
• 0
• 0