Paśviačeńnie pijanieraŭ u Maskvie 15 maja 2016 h, fota sputnik
Kantent Rasijskaj Fiederacyi ŭ biełaruskich ŚMI na siońniašni dzień dachodzić da 65%, «heta nas nie pavinna nie naściarožvać z punktu hledžańnia nacyjanalnaj kultury, infarmacyjnaj biaśpieki», — zajaviŭ u intervju prahramie «Kontury» telekanała ANT, pakazanym uviečary 15 maja, namieśnik kiraŭnika administracyi prezidenta Biełarusi Ihar Buzoŭski.
Hutarka ź viadučym «Kontury» adbyłasia ŭ ramkach XI Biełaruskaha mižnarodnaha miedyjaforumu «Partniorstva ŭ imia budučyni: intehracyja jak faktar stvareńnia» ŭ Minsku.
Taki ŭzrovień rasijskaha kantentu Buzoŭski, z adnaho boku, nazvaŭ pazityvam, «bo heta intehracyja kultur, uzajemadziejańnie ŭ samych roznych prajavach». «U toj ža čas my pavinny razumieć, što nam nieabchodna napracoŭvać i tvorčy, i palityčny patencyjał telebačańnia na infarmacyjnych placoŭkach», — zajaviŭ jon.
Adkazvajučy na pytańnie viadučaha adnosna cenzury i prapahandy ŭ ŚMI, druhi ŭdzielnik intervju, Alaksiej Volin, namieśnik ministra suviazi i masavych kamunikacyj RF, skazaŭ: «U dačynieńni da cenzury i prapahandy my zychodzim ź dźviuch rečaŭ. U Kanstytucyi Rasii cenzura zabaronienaja. Što tyčycca mahčymaści vykarystańnia ŚMI ŭ intaresach dziaržaŭnych abo niejkich inšych struktur, to tut, pierš za ŭsio, usio zaležyć ad samoj redakcyi, ad samich žurnalistaŭ».
Na heta Buzoŭski zajaviŭ: «Pavinna być statuja adkaznaści nasuprać statui Svabody. Kali my analizujem pracu taho ci inšaha srodku masavaj infarmacyi, my analizujem, u tym liku, i krynicy finansavańnia. Časta stanovicca zrazumiełym, dla čaho toj ci inšy ŚMI pracuje, jakija siońnia mety pieraśledujucca. Tut užo ŭstupaje ŭ siłu ŭžo nie paniaćcie cenzury, a arhanizacyi pracesu pracy z hramadskimi i palityčnymi farmiravańniami. Tamu svaje praviły hulni kožnaja kraina vyznačaje ŭ nacyjanalnych intaresach».
Kamientary