U internecie šukajuć «lidara palityčnaj partyi Novaja Ziamla». Zarobak – ad $400
Cikavaja abviestka źjaviłasia na sajcie minsk.jobs.tut.by. Imidž studyja «Vitryn» šukaje lidara palityčnaj partyi. «Partyja Novaja ziamla — heta pieršaja prahresiŭnaja partyja Biełarusi. Jana pradstaŭlaje intaresy ludziej, jakija pracujuć i biespracoŭnych», — havorycca ŭ paviedamleńni.
Vyśvietliłasia, što lidara palityčnaj partyi šukaje pijarščyk Maryja Chramcova. Jana ŭžo źjaŭlałasia ŭ miedyjnaj prastory letaś padčas vyłučeńnia pretendentaŭ u kandydaty na pasadu prezidenta. Chramcova tady «prydumała kandydatku» Irynu Pieršynu. Chramcova tady adkryta pryznavałasia, što Pieršyna była abranaja tolki praz rudy koler vałasoŭ. U jaje inicyjatyŭnaj hrupie było 100 čałaviek, ale CVK admoviŭ u rehistracyi.
Chramcova nazyvaje tuju kampaniju «vyvučeńniem kuchni palityčnaha pijaru». Ciapier u Maryi Chramcovaj novy palityčny prajekt. «My arhanizavali partyju i dla partyi nam nieabchodny čałaviek, jaki budzie zajmać rolu lidara. Heta surjoznaja inicyjatyva pa ŭsich nakirunkach budzie vieścisia palityčnaja dziejnaść. Nam nieabchodny lidar, jaki budzie pradstaŭlać intaresy partyi, budzie razmaŭlać z narodam, publična vystupać», — raskazvaje spadarynia Chramcova.
Jana ličyć, što šukać palityčnaha lidara praz abviestku – heta absalutna narmalna. «Kali čałaviek vałodaje artystyčnymi dadzienymi, moža razmaŭlać z narodam na adnoj i toj ža movie, zrazumiełaj i dastupnaj, to čamu nie. Tak robicca zaŭsiody ŭ palitycy».
«My nie budziem drejfavać u bok ułady, ci apazicyi. My budziem prytrymlivacca narodu, pradstaŭlać jaho intaresy», — kaža pijarščyca.
U vakansii nie byŭ paznačany zarobak lidara. Kolki ž moža atrymlivać staršynia «Novaj ziamli»? «Na pieršym etapie zarobak budzie kala 400 dalaraŭ, paśla – bolej», — pryznajecca Chramcova.
Inicyjatarka «Novaj ziamli» ŭ kursie, što dla rehistracyi partyi nieabchodna 1000 čałaviek, ale nie bačyć u hetym prablemy. «Lohka sabracca praz sacyjalnyja sietki», — upeŭnienaja žančyna.
Maryja Chramcova jašče patłumačyła, čamu jana pajšła ŭ palityku. «Ja źjaŭlajusia najlepšym imidžmiejkieram Jeŭropy i adzin z nakirunkaŭ, jaki ja pavinna zasvoić, heta niša palityčnaha pijaru».
Supołka partyi «Novaja ziamla» ŭ fejsbuku na dadzieny momant naličvaje 46 čałaviek. Maryja Chramcova tam zbolšaha pościć miemy z kocikami. Padobna, što novaja sproba pijaru ad Maryi Chramcovaj i jaje pradpryjemstva.
Kamientary