Rasijanie afarmlajuć biełaruskija DNŽ, kab jeździć na aŭto na biełaruskaj rehistracyi. U čym sens?

Pakupniki aŭto z Rasii šukajuć sposaby sekanomić na mytnych pošlinach i ŭtylizacyjnym zbory pry imparcie mašyny. Niekatoryja zadumvajucca zrabić dla hetaha biełaruski DNŽ.

Čamu mašyny ŭ Biełarusi kaštujuć našmat tańniej

Niahledziačy na toje, što Biełaruś i Rasija znachodziacca ŭ adzinaj mytnaj prastory, ceny na aŭtamabili mocna adroźnivajucca, i ŭłady Rasii robiać usio, kab mašyny stanavilisia tolki daražejšymi.

Aproč taho, što ŭ Biełarusi isnuje 140‑y ŭkaz, jaki dazvalaje razmytnivać aŭto na šmatdzietnych i invalidaŭ pieršaj i druhoj hrup z 50‑pracentnym dyskontam, u kožnaj krainy svaje staŭki ŭtylizacyjnaha zboru i mietady jaho naličeńnia.

U Biełarusi ŭtylizacyjny zbor na lehkavyja aŭto dla fizičnych asob padzialajecca na dźvie katehoryi i zaležyć ad uzrostu aŭto. Za mašynu va ŭzroście da troch hadoŭ heta 544 rubli, a za starejšyja — 1089 rubloŭ.

U Rasii staŭki ŭtylzboru dzielacca na lhotnyja (kala 125—190 biełaruskich rubloŭ) i kamiercyjnyja.

Adnak ilhotny taryf prymianiajecca tolki dla fizasob i aŭto z ruchavikom mahutnaściu da 160 k. s., a kab nie dapłačvać utylzbor pa kamiercyjnym taryfie, takija aŭto nielha pradavać ciaham 12 miesiacaŭ.

Pry hetym dla aŭto z mahutnaściu bolš za 160 k.s. nijakaha lhotnaha taryfu nie isnuje zusim.

Tak, naprykład, pry ŭvozie ŭ Rasiju papularnaha ŭ Biełarusi parkietnika Chevrolet Equinox z ruchavikom 1,5 litra i mahutnaściu 175 k.s. rasijanie musiać zapłacić prykładna 9600 jeŭra ŭtylzboru, kali aŭto jašče niama troch hadoŭ, i amal 15 tysiač jeŭra, kali aŭto starejšaje za try hady. 

To-bok rasijanam treba zapłacić utylzboru za takoje aŭto prykładna stolki ž, kolki jano kaštuje ŭ Biełarusi ŭžo z ulikam usich vydatkaŭ. 

Pavialičyć

Kali brać aŭto z bolš mahutnym ruchavikom, to ličby ŭtylizacyjnaha zboru ŭ Rasii naohuł vyhladajuć astranamičnymi.

Naprykład, za trochlitrovy bienzinavy BMW X5 z ruchavikom na 340 k.s. rasijanam treba zapłacić kala 30 tysiač jeŭra ŭtylzboru. A kali takoje aŭto budzie starejšaje za try hady, to bolš za 42 tysiačy jeŭra.

Praz heta atrymlivajecca, što cana na toj ža samy aŭtamabil, razmytnieny ŭ Biełarusi i Rasii, adroźnivajecca na dziasiatki tysiač jeŭra. Naprykład, trochhadovy-piacihadovy BMW Ch5 z trochlitrovym ruchavikom u Biełarusi možna razmytnić za 9000 jeŭra pa poŭnym taryfie ci za 4500 jeŭra pa lhotnym.

Razam z utylzboram i inšymi vydatkami atrymajecca 9500 abo 5000 jeŭra adpaviedna. Mytnaja ačystka takoha ž BMW X5 u Rasii pieravalić za 53 000 jeŭra.

Biełaruski DNŽ pad kluč

Praz nastolki vialikuju roźnicu rasijskija aŭtamabilisty stali šukać mahčymaść jeździć na aŭto ź biełaruskimi numarami ŭ Rasii praz afarmleńnie DNŽ u Biełarusi. Admietna, što roźnica nastolki vialikaja, što navat zamaročvacca z pošukam ilhotnika nieabaviazkova.

Niekatoryja działki, jakija zajmajucca pryhonam aŭto na zamovu, ubačyli ŭ hetym patencyjał i pačali prapanoŭvać novyja pasłuhi, takija jak afarmleńnie DNŽ u Biełarusi i pryhon aŭto pad kluč. Pryčym padobnyja pasłuhi prapanoŭvajuć jak rasijskija, tak i biełaruskija pasredniki.

Vierahodna, intares padahravaje toj fakt, što z 1 krasavika ŭ Rasii zakryjuć apošniuju ščylinu, jakaja dazvalała sekanomić udvaja prynamsi na mytnych płaciažach (razmytnivajučy darahija aŭto da troch hadoŭ praź Biełaruś pa lhotnaj staŭcy ŭ 24% ad koštu zamiest 48%). 

Paśla 1 krasavika ŭ hetym nie budzie sensu, bo pry imparcie ź Biełarusi ŭ Rasiju pakupniku daviadziecca nie tolki zapłacić drakonaŭski ŭtylzbor, ale i roźnicu ŭ mycie.

• 1
• 0
• 1
• 1
• 1
• 0
• 1
• 0