1. Juryj Hubarevič (Ruch «Za Svabodu» — akruha №108 «Kalinoŭskaja»)
Juryj Hubarevič maje stanoŭčy dośvied udziełu ŭ elektaralnaj kampanii. Jon pieramahaŭ na miascovych vybarach 2003 hoda ŭ Biełaaziorsku. Tady ŭ hetym nievialičkim horadzie ŭvohule skłałasia ŭnikalnaja situacyja, kali bolšaść u haradskim saviecie sfarmavali pradstaŭniki demakratyčnaj apazicyi. Uładzie davodziłasia terminova pravodzić davybary, kab uznavić status-kvo. Vybarčaja kampanija Hubareviča zaŭvažnaja, jamu 38 hadoŭ — samy ŭzrost dla palityka.
2. Mikałaj Kazłoŭ (AHP — akruha №105 «Staravilenskaja»)
U milicyi Mikałaj Kazłoŭ dasłužyŭsia da padpałkoŭnika. U cełym jaho słužba prachodziła dastatkova biaschmarna da vosieni 2008 hoda. Tady Kazłoŭ nie prosta vyjaviŭ fakt ukidvańnia biuleteniaŭ u skryniu dla daterminovaha hałasavańnia, ale i nie pabajaŭsia ahučyć hety fakt. Na apošnich prezidenckich vybarach padpałkoŭnik u adstaŭcy złaviŭ na tym samym učastku «karusielščykaŭ». Kazłoŭ pryniaŭ rašeńnie bałatavacca tam sama, dzie fiksavaŭ złačynstvy, pobač ź im nikomu nie budzie prosta.
3. Taćciana Karatkievič («Havary praŭdu» — akruha №97 «Kastryčnickaja»)
Dziakujučy minułym prezidenckim vybaram, Karatkievič zdabyła vialikuju padtrymku i paznavalnaść. Možna skazać, što dla mnohich apazicyja asacyjujecca jakraz sa spadaryniaj Karatkievič. Hrech nie skarystać taki bahaž u hetaj kampanii. Supiernik ad ułady ŭ Taćciany Karatkievič — načalnik stancyi «Minsk-Pasažyrski» Alaksandr Drožža. Surjozny, ale, kažuć, całkam prachadny.
4. Aleś Łahviniec (Ruch «Za Svabodu» — akruha №101 «Sucharaŭskaja»)
Spadar Łahviniec nie pieršy raz sprabuje bałatavacca mienavita ŭ Sucharavie. Jon sam žyŭ u hetaj akruzie, viedaje ab prablemach, jaki najbolš chvalujuć žycharoŭ mikrarajona. Heta nie niejki dziadzia, jaki vyznačany ŭ akruhu vypadkova, Łahviniec adzin z tysiačy adnolkavych. Takich kandydataŭ lubiać ludzi. Pikiety ŭ padtrymku Łahvinca štodnia stajać pa ŭsim Sucharavie. U supierniki Łahvincu vyznačyli dvaich dyrektaroŭ škoł, aboje — praŭładnyja kamunisty.
5. Aleś Michalevič (BNF — akruha №109 «Uručanskaja»)
Michalevič taksama nie ŭpieršyniu sprabuje prarvacca ŭ parłamient mienavita pa Uruččy. Zhadvajecca 2008 hod, kali mnohija šaptalisia, što Michaleviča i Ramančuka ŭłady dakładna prapuściać u «pałatku». Nie, nie prapuścili ni pieršaha, ni druhoha. Z taho času Michalevič prajšoŭ praz palityčny pieraśled, emihracyju, viartańnie. Pry hetym usim jon zastaŭsia ŭsio takim ža hnutkim i razumnym palitykam. Michalevič zdolny dahrukacca da mnohich.
6. Uładzimir Navasiad (arhkamitet Partyi svabody i prahresu — akruha №94 «Śvisłackaja»)
U 2000 hodzie, kali apazicyja vyrašyła bajkatavać vybary, Navasiad byŭ adnym ź niamnohich, chto vyrašyŭ bałatavacca. U vyniku jon pieramoh pa Leninskaj akruzie i staŭ deputatam. U tym sklikańni parłamienta apazicyja jašče była pradstaŭlena hrupaj «Respublika» (Frałoŭ, Parfianovič, Skrabiec). Jany papili niamała kryvi ŭładzie, tamu apazicyju bolej tak i nie prapuskali ŭ deputaty. Navasiad z taho času tak i nie zmoh zarehistravać svaju partyju. Ciapier jon uznačalvaje ŭstanovu «Efiektyŭnaje kiravańnie budynkami» i maryć znoŭ prabicca ŭ parłamient.
7. Pavieł Stefanovič (AHP — akruha №98 «Paŭdniova-zachodniaja»)
U kožnaj elektaralnaj kampanii pavinien być taki čałaviek, jaki svaimi pavodzinami budzie rvać usie šabłony i normy. Mienavita takim źjaŭlajecca 26-hadovy student fiłasofskaha fakulteta Pavieł Stefanovič. Svaimi prapanovami jon pryciahnuŭ uvahu ŭsich ŚMI, pra jaho havorać, ź im spračajucca. Ujavicie, jak taki piersanaž moh by ažyvić pracu spakojnaha biełaruskaha parłamienta. Praŭda, kab tudy trapić, Stefanovič musić pieramahčy cełaha dyrektara Minskaha vahonaramontnaha zavoda.
8. Aleh Trusaŭ (TBM — akruha №96 «Čkałaŭskaja»)
Trusaŭ viedajecca z usioj dziaržaŭnaj elitaj, ź im vitajucca i Uładzimir Makiej, i Viktar Šejman. Navat Łukašenka na pytańnie, jakuju b jon chacieŭ bačyć apazicyju, adkazaŭ pra Aleha Anatoljeviča Trusava. Tamu mnohija i dumali, što kaho-kaho, a Trusava ŭ parłamient prapuścić mohuć. Šmathadovy staršynia TBM, dacent Univiersiteta kultury, taki čałaviek dakładna nie hladzieŭsia b vypadkovym u parłamiencie. A ŭ Trusava ž jašče i dośvied deputacki jość — ad 1990 da 1996 jon pradstaŭlaŭ intaresy ludziej u Viarchoŭnym saviecie.
9. Alaksiej Janukievič (BNF — akruha №92 «Aŭtazavodskaja»)
Chaj i pišuć, što BNF užo nie toj, ale siły ŭ partyi, kab pravieści ŭzornuju kampaniju chacia b dla svajho lidara, biezumoŭna, jość. Letaś «beenefaŭcy» byli hałoŭnaj ruchajučaj siłaj pa zbory podpisaŭ u Minsku za Taćcianu Karatkievič. Brend BNF pamiatny, ludzi jaho nie zabyvajuć. I va ŭmovach pratestnaha hałasavańnia Alaksiej Janukievič moh by nabrać šmat hałasoŭ. Voś tolki ci budzie ich chtości sioleta ličyć?
10. Viktar Jančurevič (Ruch «Za Svabodu» — akruha №110 «Partyzanskaja»)
U kahości ŭ dvarach idzie ŭščylnieńnie, vyrubajuć park, nie prybirajuć śmiećcie? Da kaho źviartacca ŭ takich vypadkach? Pravilna, da Viktara Jančureviča. Na jahonym rachunku dapamoha ŭžo tysiačam ludziej. Jančureviča viedajuć, da jaho źviartajucca, jon starajecca nikomu nie admaŭlać. Možna skazać, što Viktar zasłužyŭ sabie reputacyju hetkaha Robin Huda, abaroncy pakryŭdžanych. Ci chopić hetaha, kab patrapić u parłamient, pabačym u vieraśni.
