22-hadovaha viełasipiedysta Dźmitryja Palijenku sudziać za supraciŭ milicyjantu
Praces pa spravie Palijenki raspačaŭsia 11 kastryčnika ŭ sudzie Centralnaha rajona Minska.
Dźmitry, adzin z zatrymanych AMAPam ravarystaŭ z prabiehu «Krytyčnaja masa», pad vartaj zastajecca ŭžo amal paŭhoda. Chłopca sudziać za «hvałt ci pahrozu hvałtu» ŭ dačynieńni da supracoŭnika milicyi, a taksama, jak stała niadaŭna viadoma, — nibyta za raspaŭsiud porna ŭ siecivie.
Pačaŭsia sud z chadajnictva Palijenki.
«Sudździ nie daviaraju. Vy sadžali ludziej na sutki — niama vam davieru», — skazaŭ Palijenka i zajaviŭ advod sudździ Valeryju Jeśmanu. Jaho pazicyju padtrymała i advakatka. Ale Jeśman adchiliŭ hetaje chadajnictva.
Viny svajoj Dźmitryj Palijenka nie pryznaŭ. Pakazańni davać admoviŭsia.
Ale nie admoviŭsia ad ich paciarpieły — 32-hadovy inśpiektar DPS Uładzimir Kałtunoŭ.
«Jechali mima na patrulnaj mašynie, ubačyli, jak hrupa ravarystaŭ namahałasia vyrvać rovar z ruk inśpiektara DAI. Paśla my raźviarnulisia, tam užo skončyłasia. My padjechali da ich, prasili pa hučnaj suviazi pakinuć prajeznuju častku, jany ihnaravali. Adzin ź ich, Kanavałaŭ adździaliŭsia ad natoŭpu, pačaŭ vyjazdžać na treciuju i čaćviortyja pałosy, — raspavioŭ Kałtunoŭ. — Kamanda pastupiła zatrymać. Ja vyjšaŭ z mašyny, baču, što rovar jedzie na mianie i spyniacca nie źbirajecca. Ja zrabiŭ znak, kab jon spyniŭsia, ale jon tolki pavialičyŭ chutkaść. Ja schapiŭ jaho, my ŭpali. Padyšoŭ inšy supracoŭnik DAI, pačaŭ akazvać dapamohu mnie, padjechali taksama i inšyja ravarysty. Mianie chtości rezka dziornuŭ za pravy rukaŭ — heta byŭ, jak ja razumieju siońnia, Palijenka — ja pierachapiŭ jaho ruku, jon sprabavaŭ vyrvacca i adšturchvaŭ mianie rukami. Ja jaho schapiŭ, pryciahnuŭ da siabie i ŭžyŭ fizičnuju siłu — niekalki ŭdaraŭ u tułava. Zdajecca, dva».
Paśla hetych udaraŭ Palijenka pierastaŭ akazvać supraciŭ. Pa słovach inśpiektara — «loh na asfalt». U samoha milicyjanta akazałasia razarvanaj kurtka.
Sam Kałtunoŭ kaža, što pretenzij da Palijenki ŭ jaho niama.
«Kolki razoŭ šturchnuŭ vas abvinavačany?» — spytaŭ u Kałtunova sudździa Jeśman.
«Razy dva».
«Kali sud pryznaje jaho vinavatym, vašaje mierkavańnie — stroha ci nie stroha treba jaho pakarać?»
«Na mierkavańnie suda», — skazaŭ Kałtunoŭ.
U jakaści śviedki byŭ vyklikany i inšy inśpiektar DPS Dašynievič, naparnik Kałtunova. Jon pierakazaŭ pakazańni paciarpiełaha pra zatrymańnie. Praŭda, što tam adbyłosia pamiž Kałtunovym i Palijenkam, mužčyna nie bačyŭ.
«Zatrymlivali Kanavałava. Potym padjechaŭ AMAP, - pacisnuŭ plačyma jon. — Bačyŭ tolki, što paśla ŭ Kałtunova kurtka była ŭžo parvanaja».
Zatym vystupiŭ Uładzimir Rutkoŭski, indyvidualny pradprymalnik. Jon prajazdžaŭ mima, ubačyŭ zatrymańnie ravarystaŭ i spyniŭsia dapamahčy:
«Ja ŭbačyŭ, što pačałasia bojka — maleńki tam adciahvaŭ vialikaha ad jašče adnaho, tłustaha…»
«Nazyvajcie, kali łaska, supracoŭnikaŭ milicyi supracoŭnikami milicyi. Inšych — naprykład, maładymi ludźmi», — zrabiŭ jamu zaŭvahu prakuror.
«Paśla ŭsiaho kaŭnier u kurtki ŭ inśpiektara byŭ adarvany. Ciahnuŭ za jaho toj, maleńki. Zatym vybiehli AMAPaŭcy, pazabirali ŭsich», — skazaŭ Rutkoŭski.
Praŭda, kankretna bojki ci taho, jak Palijenka mienavita adryvaŭ štości ad kurtki, śviedka nie bačyŭ.
Nastupnym śviedkam vystupiŭ Alaksandr Palijenka, baćka abvinavačvanaha. Pa zakonie moh admovicca davać pakazańni, ale nie staŭ. Jon raspavioŭ, što maci Dźmitryja pamierła try hady tamu.
«Moj syn — čałaviek dobry, maje svajo mierkavańnie. U škole vučyŭsia dobra. Paśla škoły pracavaŭ na MAZie, ślesaram, zatym u kramie — raskładvaŭ pradukty. Va ŭniviersitet pastupać pakul nie źbiraŭsia, kazaŭ, što spačatku na vučobu treba zarabić hrošaj», — raskazaŭ Alaksandr Palijenka.
Pa słovach baćki, syn dapamahaŭ jamu i hrašyma, i ŭ chatnich spravach. Sam Alaksandr Palijenka piensijanier i invalid pa zroku.
Paśla nievialikaha pierapynku pasiedžańnie praciahnułasia.
Paśla pierapynku ŭ jakaści śviedki vystupiŭ amapaviec Volski. Jaho pakazańni spačatku ničym nie adroźnivalisia ad pakazańniaŭ inšych: Palijenka šturchauŭ daišnika, ciahnuŭ za vopratku.
Ale peŭnyja razychodžańni ŭsio ž byli.
«Abvinavačany čaplaŭsia za rovar. U dačynieńni da jaho prymianili fizičnuju siłu, kab adčapić. Paśla jon šturchanuŭ u hrudzi inśpiektara», -= paviedamiŭ amapaviec.
Zatym prakuror začytaŭ pakazańni Kanavałava, chłopca, z zatrymańnia jakoha ŭsio i pačałosia. Sam Kanavałaŭ na sud nie pryjšoŭ, bo złamaŭ nahu.
Zhodna z pakazańniami chłopca, na inšyja pałosy jon vyjazdžaŭ, bo nie moh adrazu paśla kamandy daišnikaŭ źjechać na tratuar z-za «asablivaściej kanstrukcyi rovara». Zatym inśpiektar DAI vyjšaŭ z mašyny, schapiŭ jaho za ruku, jany ŭpali na ziamlu. Na jaho adzieli kajdanki, śćviardžaje Kanavałaŭ, daišnik paabiacaŭ jamu, što budzie raspačataja sprava za niepadparadkavańnie.
Zatym sudździa začytaŭ apisańnie zapisu videarehistratara sa słužbovaj mašyny DAI, zapisaŭ z kamier videanazirańnia. Zhodna z hetym, Palijenka sapraŭdy ciahnuŭ inśpiektara za rukaŭ, paśla čaho toj paru razoŭ udaryŭ chłopca.
Paśla byli ahučanyja vyniki miedyčnych ekśpiertyzaŭ. U Kałtunova cialesnych paškodžańniaŭ nie było. U Kanavałava byli lohkija cialesnyja paškodžańni na plačy, jakija, na dumku ekśpiertaŭ, mahli być vynikam padzieńnia z rovara.
Zatym — inšaje zaklučeńnie ekśpiertaŭ. Zhodna ź im, 22-hadovy Palijenka «pakutuje ad ciažkaj zaležnaści ad ałkaholu». Ale ž na momant zatrymańnia chłopiec byŭ ćviarozy.
Ahučyŭšy heta, sudździa imkliva pierajšoŭ da materyjałaŭ, pryśviečanych kampjutaru chłopca i raźmiaščeńnia Palijenkam spasyłki na «porna». Palijenka na svajoj staroncy ŭ sacsietkach źmiaściŭ spasyłku na 19-siekundny rolik pad nazvaj «BiełMuzTV pakazvaje porna» (u 2013 hodzie inžynier kanała, jaki mieŭ asabistyja kryŭdy da pracadaŭcaŭ, sapraŭdy vydaŭ porna ŭ žyvy efir). Taksama Jeśman adznačyŭ, što raniej Palijenka mieŭ niekalkii administracyjnych spraŭ.
Paśla sudździa prahladzieŭ videazapisy z rehistrataraŭ mašyn DAI (praŭda, pastaviŭ manitor tak, što prysutnym nie było bačna, što na im adbyvajecca). Zatym vysłuchaŭ tłumačeńni Palijenki, jakija ŭ jaho ŭziali nieŭzabavie paśla zatrymańnia. U ich chłopiec śćviardžaŭ, što schapiŭ inśpiektara Kałtunova za ruku, kab spynić źbićcio Kanavałava. Sam Palijenka, pa jaho tłumačeńniach, atrymaŭ niekalki ŭdaraŭ i ad inśpiektara i paśla ad amapaŭcaŭ, jakija zatrymlivali ravarystaŭ.
Paśla pierapynku Palijenka źjaviŭsia ŭ «stakanie» z prazrystaj płastykavaj tečkaj u rukach. Na arkušy papiery ŭ joj było vialikimi litarami napisana «UPSK» i rasšyfroŭka: «Usie psy sistemy kurvy».
Prakuror paprasiŭ dla chłopca 2 hady z adterminoŭkaj na 2 hady. Taksama, na jaho dumku Palijenka pavinien budzie prajści prymusovaje lačeńnie ad ałkahalizmu.
Advakat chłopca paprasiła jaho apraŭdać.
Sam Palijenka ŭ apošnim słovie padziakavaŭ usim, chto pryjšoŭ za padtrymku.
«My žyviem u sistemie palicejskaj dziaržavy, dzie ŭsio u rukach dyktatara, ale pryjdzie čas i Biełaruś budzie svabodnaj», — pačaŭ svoj vystup chłopiec.
U pramovie jon nastojvaŭ, što pieraśled viadziecca z-za jaho palityčnaj i hramadskaj aktyŭnaści, uzhadaŭšy šmatlikija «previentyŭnyja zatrymańni», naprykład, pierad čempijanatam śvietu pa chakiei ŭ Minsku ŭ 2014 hodzie.
Naprykancy Palijenka začytaŭ vierš byłoha palitviaźnia Ihara Alinieviča, pryśviečany, skažam tak, niaprostamu losu palitviaźnia i jahonaj ćviordaj pazicyi. U vieršy milicyjanty adkryta nazyvalisia «miantami» i «lehavymi».
Zała sustreła heta apładysmientami.
Prysud Palijenku budzie ahučany 12 kastryčnika a 14 hadzinie.
***
Nahadajem, što Dźmitryj Palijenka znachodzicca pad vartaj z kanca krasavika, kali jon byŭ zatrymany razam ź inšymi ŭdzielnikami «Krytyčnaj masy» — masavaha prabiehu ravarystaŭ. Uviečary 29 krasavika ŭdzielnikaŭ prabiehu žorstka zatrymaŭ AMAP: 6 čałaviek mocna źbili i advieźli ŭ RUUS Centralnaha rajona. Paźniej čaćviora z zatrymanych padpisali pratakoły ab parušeńni praviłaŭ darožnaha ruchu i akazańni supraciŭleńnia supracoŭnikam orhanaŭ unutranych spraŭ i DAI, a suprać dvuch byli raspačatyja kryminalnyja spravy. Praŭda, pieraśled adnaho ź ich, Stanisłava Kanavałava byŭ spynieny.
Palijenku sudziać za «hvałt abo pahrozu ŭžyvańnia hvałtu ŭ dačynieńni da supracoŭnika orhanaŭ unutranych spraŭ». Za heta praduhledžana adkaznaść u vyhladzie aryštu, abmiežavańnia voli na termin da piaci hadoŭ, abo pazbaŭleńnia voli na termin da šaści hadoŭ.
Akramia hetaha, dadatkova jaho abvinavačvajuć za «vyrab i raspaŭsiudžvańnie parnahrafičnych materyjałaŭ abo pradmietaŭ parnahrafičnaha charaktaru», pa jakim chłopcu pahražaje pazbaŭleńnie voli na termin ad dvuch da čatyroch hadoŭ.
Stała viadomaje imia mužčyny, zatrymanaha ŭ Mahilovie za nibyta napad na hubazikaŭcaŭ27
Kamientary