Donald Tramp. Za što jaho lubiać i nienavidziać

Uzrost: 70 hadoŭ

Bahaćcie: Bolš za try miljardy dalaraŭ pa viersii Forbes i Bloomberg, kala dzieviaci miljardaŭ — pa viersii samoha Trampa. Asnoŭny biznes — budaŭnictva, ale jaho The Trump Organization zajmajecca praktyčna ŭsim — ad praviadzieńnia konkursaŭ pryhažości i da nastolnych hulniaŭ. Asnovu biznes-impieryi Trampa zakłała jaho babula Elizabet i baćka Fred.

Palityčnaja karjera: Nikoli nie zajmaŭ nijakich dziaržaŭnych pasadaŭ i nie ŭdzielničaŭ u vybarach, choć ź jašče 1980-ch stała zajaŭlaŭ ab žadańni stać to prezidentam, to hubiernataram Ńju-Jorka. Za hetyja dziesiacihodździ Tramp trojčy mianiaŭ partyjnuju prynaležnaść: pierš jon byŭ prychilnikam Respublikanskaj partyi, zatym padtrymlivaŭ Partyju reformaŭ, z 2001 pa 2008 hod byŭ demakratam, a zatym viarnuŭsia da respublikancaŭ. U 2011 hodzie Tramp na piać miesiacaŭ abviaściŭ siabie biespartyjnym, ale zatym znoŭ ustupiŭ u Respublikanskuju partyju.

Šlach da naminacyi: Favarytam respublikanskich prajmieryz ličyŭsia chto zaŭhodna, ale nie Tramp: jašče da pačatku pieradvybarnaj honki isnavała mierkavańnie, što za kresła ŭ Avalnym kabiniecie buduć spaborničać Chiłary Klintan i Džeb Buš. Vyłučeńnie Trampa nichto inakš jak žart nie ŭsprymaŭ. Adnak papulisckaja rytoryka Trampa i jaho rezkija, skandalnyja vykazvańni ab imihracyi, stomlenaść vybarščykaŭ ad tradycyjnych palitykaŭ i šmatlikija pamyłki kankurentaŭ dali svoj plon: spačatku ad udziełu ŭ prezidenckaj honcy admoviŭsia Džeb Buš, a zatym syšli Marka Rubia, Ted Kruz i Džon Kiejsik. Nikomu ź ich nie ŭdałosia naviazać surjoznaj baraćby Trampu na prajmieryz.

Hałoŭnyja punkty prahramy: Pabudavać ścianu na miažy ź Mieksikaj, pierastać damahacca źmieny režymaŭ za miažoj, pieramahčy ID hetak ža, jak ZŠA vyjhrali chałodnuju vajnu, pavialičyć praciahłaść dekreta dla maci, stvaryć 25 miljonaŭ pracoŭnych miescaŭ, abaranić prava na vałodańnie zbrojaj.

Pohlady na imihracyju: Tramp nie raz abiacaŭ pabudavać ścianu na miažy ź Mieksikaj, pryčym za košt Mieksiki, kazaŭ pra niebiaśpieku mihrantaŭ-musulman i śćviardžaŭ, što pracoŭnyja miescy ŭ pieršuju čarhu pavinny dastavacca amierykancam, a nie pryjezdžym. Miljarder abiacaje maksimalna ŭzmacnić žorstkaść pamiežnaha kantrolu, pazbavić mihrantaŭ dostupu da sacyjalnaha zabieśpiačeńnia i admianić usie zakony Baraka Abamy, jakija pasłablajuć adkaznaść dla nielehalnych mihrantaŭ.

Hałoŭny pravał kampanii: Abvinavačvańni ŭ seksualnych damahańniach paśla taho, jak Tramp na debatach zajaviŭ, što nikoli nie zalacaŭsia da žančyn i nie całavaŭ ich biez zhody, a taksama publikacyja plonki z abrazami na adras žančyn 11-hadovaj daŭniny. Paśla hetych padziej ad Tramp pačali masava advaročvacca sponsary i ŭpłyvovyja respublikancy. Usie astatnija ŭdary, u tym liku abvinavačvańni ŭ niekampietentnaści i sychodzie ad padatkaŭ, Tramp pieranosiŭ praktyčna biazbolna.

Za što lubiać: Za prostaliniejnaść, niepadobnaść na tradycyjnych palitykaŭ, za krajniuju kansiervatyŭnaść i žadańnie viarnuć Amierycy vielič. Tramp kaža toje, što mnohija dumajuć, ale nie advažvajucca skazać. Ličycca, što jon adlustroŭvaje intaresy toj častki nasielnictva ZŠA, da jakoj inšyja palityki naohuł nie źviartajucca.

Za što krytykujuć: Na dumku praciŭnikaŭ Trampa, u miljardera niama dastatkovaj kvalifikacyi i dośviedu dla taho, kab kiravać krainaj; jon zanadta zapalčyvy, kab być hałoŭnakamandujučym i rasparadžacca jadziernym arsienałam ZŠA. Pohlady Trampa nazyvajuć adkryta rasisckimi (jon sapraŭdy papularny siarod amierykanskich ultrapravych), a prapanovy adharadzicca ad mihrantaŭ — niebiaśpiečnymi dla krainy.

Adnosiny z Rasijaj: Tramp nie raz kazaŭ, što paładziŭ b z Uładzimiram Pucinym, ale padkreślivaŭ, što nie znajomy z rasijskim prezidentam i nie viedaje, jak pojduć spravy. Jon vystupaje za palapšeńnie adnosin z Rasijaj i krytykuje administracyju Abamy za niaŭmieńnie damaŭlacca z Pucinym, ale ŭ cełym ni ŭ jaho publičnych vystupach, ni ŭ pieradvybarnaj prahramie nijakaj asablivaj roli adnosinam z Maskvoj nie advodzicca.

• 0
• 0
• 0
• 0
• 0
• 0
• 0
• 0