U Biełarusi pačali źbirać Cadillac FOTY
Amierykanski vytvorca aŭtamabilaŭ kłasa «luks» Cadillac, jaki naležyć General Motors, raspačynaje vytvorčaść aŭtamabilaŭ u Biełarusi. Pra heta pradstaŭniki kampanii zajavili na pres-kanfierencyi ŭ Minsku.
Aŭtacentr «Multymotars», jaki raniej byŭ dyleram Chevrolet i Opel u Biełarusi, ciapier budzie zajmacca i amierykanskaj markaj Cadillac. Užo siońnia ŭ madelnym šerahu pradstaŭlenyja poŭnapamierny usiedarožnik Escalade, biznes-siedan CTS i novy krasovier XT5. Harantyja na ŭsie aŭtamabili składaje 3 hady ci 100 000 kiłamietraŭ.
Siarhiej Žłabo (dyrektar «Multymotars») miarkuje, što aŭtamabili Cadillac ciapier realna kankurujuć ź japonskimi markami aŭto. Bolš za toje, pakolki vytvorčaść Cadillac raspačynajecca ŭ Biełarusi, kampanija budzie namahacca zrabić mahčymym źnižeńnie cany samoha aŭtamabila: «My robim usio mahčymaje, kab biełaruskija pakupniki aŭtamabilaŭ Cadillac atrymali samuju vyhadnuju cenavuju prapanovu. My pierakananyja, što ŭ siehmiencie luksavych aŭtamabilaŭ źjaviŭsia novy i mocny hulec».
Choć zapčastki buduć pastaŭlacca z Maskvy, kampanija płanuje vypuskać u Biełarusi kala 150 aŭtamabilaŭ Cadillac u hod. Siońnia ŭ Biełarusi zarehistravana kala 500 aŭtamabilaŭ hetaj marki. Kampanija vielmi pazityŭna hladzić na rynak, i nie tolki Biełarusi. Pry stanoŭčych vynikach kampanija płanuje pašyryć vytvorčaść aŭto dla krain SND.
Siońnia dla nabyćcia mašyny dastatkova ŭnieści 30% ad sumy aŭto, a na astatnija 70% jość mahčymaść aformić lizinh.
Adnačasova z prychodam na rynak kampanija prezientavała ŭ Minsku novuju madel, jakaja vyrablena ŭ Biełarusi — Cadillac XT5.
Cadillac XT5 — premijalny siaredniepamierny krasovier, jaki, pa słovach raspracoŭščykaŭ, zmoža kankuravać z pradstaŭnikami «vialikaj niamieckaj trojki» (BMW, Audi, Mercedes). Krasovier raspracavany na płatformie S1 z padvieskaj MakFiersan śpieradu i šmatryčahavaj kanstrukcyjaj zzadu, abstalavany bienzinavaj «šaściorkaj» abjomam 3,6 litra mahutnaściu 310 k.s. Razhon da sotni zajmaje 7,5 siekundy, a maksimalnaja chutkaść abmiežavanaja elektronikaj na adznacy 210 km/h.
Ruchavik abstalavany funkcyjaj deaktyvacyi dvuch cylindraŭ pry nievialikich nahruzkach. Tamu na trasie paŭnapryvadny SUV raschoduje 7,6 litra na 100 km.
Uvieś sałon zrobleny z naturalnaj skury, dreva, aluminiju i vuhlapłastyku.
Na centralnaj kansoli raźmieščany minimalny nabor knopak, vialikaja častka funkcyj «zašytaja» u multymiedyjnuju sistemu z 8-calevym sensarnym ekranam.
Aŭtamabili Cadillac XT5 abstalavanyja sistemami ŭtrymańnia pałasy i sačeńnia za niesankcyjanavanym pierasiačeńniem raźmietki. Pry pierastrojcy biez «pavarotnika» ŭklučajecca vibracyja ŭ siadzieńni z patrebnaha boku. Ab niebiaśpiečnym zbližeńni aŭtamabil taksama papiaredžvaje vibracyjaj, i ŭ vypadku nieabchodnaści zdolny zatarmazić samastojna.
U novym krasoviery praduhledžanaje miesca dla bahažnika abjomam da 1800 litraŭ dziakujučy tamu, što siadzieńni druhoha šerahu składajucca ŭ praporcyi 40-20-40.
Usie viersii buduć mieć vaśmidyjapazonnuju aŭtamatyčnuju karobku pieradač z režymam ručnoha pieraklučeńnia. Bazavy krasovier budzie piaredniepryvadny. Poŭny pryvad dastupny pad zamovu, jak i adaptyŭnaja padvieska z aktyŭnymi amartyzatarami.
Startavaja cana Cadillac XT5 — 45 300 dalaraŭ.
Kamientary