Padazravanaja ŭ zabojstvie ihumieńni Śviata-Ksienijeŭskaha manastyra ŭ Barysaŭskim rajonie žančyna źjaŭlajecca hramadziankaj Biełarusi, a nie Kazachstana, paviedamiŭ RIAN načalnik departamienta pa hramadzianstvie i mihracyi MUS Biełarusi Alaksiej Biahun.
Raniej pres-słužba pravasłaŭnaj Barysaŭskaj jeparchii paviedamiła, što žančyna, jakaja zabiła ihumieńniu Vasilisu, źjaŭlajecca hramadziankaj Kazachstana.
«Hetaja žančyna źjaŭlajecca hramadziankaj Biełarusi. U jaje biełaruski pašpart», — skazaŭ Biahun.
Jon udakładniŭ, što žančyna, pra jakuju idzie havorka, źjaŭlajecca uradženkaj Kazachstana, ale ŭžo doŭhi čas pražyvaje ŭ Biełarusi.
Nahadajem, padazravanuju časova prytulili ŭ manastyry, žadajučy dapamahčy joj u vyrašeńni žyćciovych prablem. «Na praciahu jaje znachodžańnia ŭ manastyry, asabliva napiaredadni taho, što zdaryłasia, adznačałasia psichičnaje rasstrojstva maładoj žančyny, jakoje i stała pryčynaj jaje strašnaha ŭčynku», — paviedamiŭ BiełaPAN sa spasyłkaj na pres-słužbu Barysaŭskaj jeparchii.
Ranicaj 6 studzienia ŭ manastyry prajšła paminalnaja słužba pa ihumieńni Vasilisie, jakuju ŭznačaliŭ jepiskap Barysaŭski i Marjinahorski Vieńjamin. U malitvie ŭziali ŭdzieł siostry manastyra, a taksama pradstaŭniki abłasnoj i rajonnaj administracyi — namieśnik staršyni Minabłvykankama Viktar Sirenka i kiraŭnik rajvykankama Uładzimir Miranovič.
Paśla zakančeńnia słužby ajciec Vieńjamin źviarnuŭsia da ŭdzielnikaŭ malitvy z pastyrskim słovam, jon zaklikaŭ da ŭzmocnienaj malitvy za zabituju matušku-ihumieńniu. «Samaje hałoŭnaje dla nas — pasprabavać zrazumieć duchoŭny sens taho, što adbyłosia: vorah rodu čałaviečaha ŭzmacniaje svajo dziejańnie, sprabujučy pasiejać źbiantežanaść, smutak i tryvohu ŭ dušach viernikaŭ napiaredadni śvietłaha śviata Rastva Chrystovaha — dnia ahulnaj radaści pra prychod u śviet Zbaviciela. Da taho ž, manastyr raźvivaŭsia jak vonkava, tak i ŭnutrana, pryciahvajučy vialikuju kolkaść pałomnikaŭ i bahamolcaŭ, dapamahajučy im ŭmacoŭvacca ŭ viery i atrymlivać duchoŭnuju padtrymku i suciašeńnie. My vierym, skazaŭ uładyka, što sprava matuški ihumieńni Vasilisy budzie praciahnutaja», — paviedamlaje pres-słužba.
Pachavańnie zahinułaj ihumieńni zapłanavanaje na 8 studzienia.
Kamientary