Žychar Śvietłahorska pamiaŭ mašynu supiernika i nadrapaŭ na joj niecenzurnyja słovy. Naniesienaja škoda skłała kala 900 rubloŭ. Zaviedzienaja kryminalnaja sprava.
Incydent adbyŭsia jašče ŭ kancy listapada 2016 hoda, ale tolki 30 studzienia, kali źjavilisia vyniki ekśpiertyzy, była raspačata kryminalnaja sprava pa č. 1 art. 218 KK Biełarusi «Naŭmysnaje źniščeńnie abo paškodžańnie majomaści».
«Pieradhistoryja hetaj spravy nastupnaja: žyli muž i žonka, i byŭ u ich siabar siamji — śviedka ź viasiella, — raspaviadaje ranak.by śledčy Śvietłahorskaha RASKa Jaŭhien Jaŭstracienka. — Muž i žonka pasvarylisia, i kožny ź ich skardziŭsia śviedku adzin na adnaho. Praź niekatory čas pajezdki ź siabram siamji na kavu pryviali da taho, što žonka syšła ad muža».
Pa słovach śledčaha, muž i žonka jašče nie raźvialisia, ale žančyna ŭžo syšła žyć da taho samaha śviedki.
«Unačy z 27 na 28 listapada 2016 hoda kinuty muž pryjechaŭ da domu supiernika, adnak dźviery kvatery jamu nichto nie adčyniŭ, — kaža Jaŭstracienka. — Tady jon vyjšaŭ na dvor i staŭ hramić mašynu byłoha siabra: skakaŭ, biŭ, miaŭ. Zatym syšoŭ dadomu, ale ranicaj viarnuŭsia, vyrašyŭšy, što zroblenaha mała. U druhi raz mužčyna nadrapaŭ na mašynie niekalki maciukalnych słoŭ. Uładalnik aŭtamabila «Chonda» źviarnuŭsia ŭ milicyju».
Praviali ekśpiertyzu: paškodžanyja kapot, piaredniaje i zadniaje levyja kryły, dekaratyŭnaja nakładka na viečku bahažnika byli acenienyja bolš čym u 900 rubloŭ, što źjaŭlajecca značnaj škodaj i ciahnie za saboj zaviadzieńnie kryminalnaj spravy.
Ciapier pakryŭdžanamu 25-hadovamu mužu pahražaje pakarańnie — ad hramadskich rabot da dvuch hadoŭ abmiežavańnia voli. Darečy, u momant ździajśnieńnia złačynstva mužčyna, chutčej za ŭsio, byŭ ćviarozy.
Kamientary