Alaksandr Łukašenka rastłumačyŭ svaju rezkuju reakcyju na prablemy z pastaŭkami ŭ Rasiju biełaruskaha charčavańnia. Adpaviednyja zajavy kiraŭnik dziaržavy zrabiŭ siońnia na sustrečy z hubiernataram Rastoŭskaj vobłaści Rasii Vasilom Hołubievym.
«Kali vy čujecie maju rezkuju reakcyju ŭ hetym płanie, heta nie tamu, jak niekatoryja pisaki ŭ Maskvie pišuć, što Łukašenka zanadta emacyjny. Sprava nie ŭ emocyjach, a ŭ tym, što heta nam vielmi doraha kaštavała. Kali ŭ nas adziny rynak, to davajcie nie budziem adzin adnamu padnožki stavić», — zajaviŭ kiraŭnik krainy.
Jon adznačyŭ, što, kali ŭ Rasii nie patrebny peŭnyja abjomy biełaruskaj pradukcyi, pra heta treba prosta skazać i tady jana budzie pieranakiravanaja na rynki inšych krain i rehijonaŭ. Razam z tym Alaksandr Łukašenka kanstatavaŭ, što patreba ŭ biełaruskim charčavańni na rasijskim rynku jość. «Nu, tady nie pieraškadžajcie handlavać. A kali my z kimści kankurujem, tady treba kankuravać. Bo ŭ nas svabodny rynak. Nie ja inicyjatar hetaj rynkavaj ekanomiki. Heta pryjšło z Rasii. I my vymušanyja padładžvacca pad hetuju ekanomiku», — skazaŭ jon.
Pa słovach kiraŭnika dziaržavy, Biełaruś u cełym vielmi aktyŭna pracuje z Rasijaj pa pastaŭkach sielhaspradukcyi i charčovych tavaraŭ, ustanoŭleny pramyja suviazi ź sietkami.
«Prablemy byvajuć časam. U asnoŭnym jany štučna stvaralisia. Bo kali my z prezidentam Rasii sustrelisia, tak pa-mužčynsku damovilisia — davajcie ŭsio ž taki na hetuju prablemu pahladzim pad vuhłom hledžańnia Alaksandra Surykava. A jon pravilna kaža: kali my chočam niešta tut pieraadoleć, davajcie razam budziem hladzieć na ŭsio, što ruchajecca praź miažu. I, kali my pačali ŭ hetym płanie kantralavać situacyju, jana imhnienna źmianiłasia. Jana prosta źnikła. Daj boh, kab nazaŭsiody», - adznačyŭ Łukašenka. «Pakul takoj bojki niama. Pryjazdžali śpiecyjalisty z Rasii. Ad taho ž Dankvierta. Pabyvali na našych pradpryjemstvach», - kanstatavaŭ kiraŭnik dziaržavy.
Pałova biełaruskich pradpryjemstvaŭ na ŭzrovień vyšej za jeŭrapiejskija
Łukašenka taksama adznačyŭ vielmi vysoki ŭzrovień biełaruskich pradpryjemstvaŭ pa pierapracoŭcy sielhaspradukcyi. «Vy navat kali ŭ Jeŭropie pajedziecie na padobnyja pradpryjemstvy — pałovu takich znojdziecie. Astatnija buduć značna nižej uzroŭniem. Tamu da nas pretenzij nie treba pradjaŭlać. I vy pavinny razumieć, čamu ja ŭ tym liku tak vostra na heta reahuju, — skazaŭ Alaksandr Łukašenka. - Kali było nam vielmi ciažka, kali naohuł pa tałonach razdavali pradukty charčavańnia, my tady pa dva-try rubli adkładali i madernizavali hetyja pradpryjemstvy. Jany nam praz pot i kroŭ dastalisia. I kali nas siońnia paprakajuć (viedajecie, pa jakich pryčynach), što ŭ nas pradukty charčavańnia nie tyja, to heta ŭžo zanadta».
Łukašenka taksama padkreśliŭ, što Biełaruś — adzinaja z usich krain postsavieckaj prastory, jakaja zachavała Dasty i navat ich zrabiła bolš žorstkim. «Siońnia ŭ nas z pradpryjemstva, fiermy, kompleksu nie vyjdzie drennaja pradukcyja, tamu što tam jaje adrazu pravierać i adbrakujuć», — zapeŭniŭ kiraŭnik dziaržavy.
Kamientary