Učastkovyja kamisii nie zarehistravali 20 kandydataŭ sa śpisu Abjadnanych demaratyčnych siłaŭ. Siarod ich — namieśnikaŭ staršyni Partyi BNF Vincuka Viačorku i Viktara Ivaškieviča, barysaŭskaha lidera Siarhieja Sałaša. Nie zarehistravanyja i Mikoła Statkievič, Alaksandar Makajeŭ.
Učastkovyja kamisii nie zarehistravali 20 kandydataŭ sa śpisu Abjadnanych demaratyčnych siłaŭ. Siarod ich — namieśnikaŭ staršyni Partyi BNF Vincuka Viačorku i Viktara Ivaškieviča, barysaŭskaha lidera Siarhieja Sałaša. Nie zarehistravanyja i Mikoła Statkievič, Alaksandar Makajeŭ.
Nivodnaja apazycyjnaja partyja na dadzienym etapie nie abyšłasia biaz strat. Najbolš adčuvalnyja straty panieśli PKB i BNF. Akruhovyja vybarčyja kamisii nie zarehistravali pa piać čałaviek ad arhanizacyj.
Najbolš źviartaje na siabie ŭvahu admova ŭ rehistracyi dvum namieśnikam staršyni Partyi BNF – Vincuku Viačorku i Viktaru Ivaškieviču. Abodvum palitykam admoŭlena z pryčyny «niesapraŭdnaści bolš čym 20 % sabranych podpisaŭ».
Viktar Ivaškievič, jaki mieŭsia iści na vybary pa Kastryčnickaj akruzie Miensku kaža:
«Ja dumaju, što z maich raniejšych vystupaŭ ułady zrazumieli, što ja budu vykryvać toj vybarčy fars, jaki raźličany dla zachodnich hledačoŭ».
U Barysaŭskaj viaskovaj akruzie admoŭlena ŭ rehistracyi miascovamu lideru Siarhieju Sałašu, jaki dahetul pravioŭ u horadzie niekalki paśpiachovych vybarčych kampanij. «Mnie admovili ŭ rehistracyi i adnačasova abvinavačvajuć u paklopie na čynoŭnic. Značyć, pieršy etap vybarčaj kampanii ja pravioŭ na vydatna. Heta maja dumka, dumka majoj kamandy i maich siabroŭ. Heta jość, ja upeŭnieny, i prychavanaj dumkaj i tych, chto mianie pieraśleduje i nie rehistruje kožnyja vybary. Ciapier pačynajecca druhi etap pad nazvaj bajkot», — kaža Sałaš.
Uvohule, siarod maładych kandydataŭ, što balatujucca pa śpisie ADS, straty istotnyja — tak, nibyta ŭłady chacieli pakazać: aktyŭnaj moładzi nie pacierpim. U Miensku nie zarehistravali byłoha lidera «Pravaha aljansu» Jurasia Karetnikava, a ŭ Mastach — deputata miascovaha harsavietu Źmitra Kuchleja.
Kiraŭnik vybarčaha štabu Kuchleja Aleś Zarambiuk adznačaje, što Mastoŭskaja akruha zastałasia biezalternatyŭnaj. «U Mastach idzie pieršy namieśnik staršyni Haradzienskaha harvykankamu Vasil Ściapura. Zaraz budziem padavać skarhu ŭ CVK», – kaža A. Zarambiuk.
U Asipovičach z vybarčaj honki źniali Albierta Jaŭmienava. Juryst Partyi BNF Uładzimier Łabkovič kaža: «Na nastupnym Sojmie budzie razhladacca pytańnie ab dalejšaj metazhodnaści našaha ŭdziełu ŭ kampanii. Nia vyklučana, što Partyja BNF prymie rašeńnie ab źniaćci svaich kandydataŭ», – zaznačaje U. Łabkovič.
Siarod niezarehistravanych kandydataŭ ad PKB: Alaksandar Halkievič (Baranavickaja-Uschodniaja №6), Pavał Stanieŭski (Ščučynskaja №60) — tutaka taksama biez alternatyvy budzie iści namieśnica staryšni abłvykankamu Birukova, Vasil Łapacin (Biarezinskaja №61), Michaił Silivoniec (Žytkavickaja №39), Alaksandar Apanasiuk (Stolinskaja №16). Čatyrom pieršym admovili ŭ rehistracyi z pryčyny niesapraŭdnaści podpisaŭ. «U Alaksandra Apanasiuka takaja sytuacyja, što jamu ŭspomnili niejki matacykł, jaki ŭ jaho byŭ u 70-ja hady. Taho matacykła, viadoma, daŭno niama, jak i ničoha niama... Ale voś znajšli farmalnuju pryčynu», – narakaje namieśnik staršyni PKB Valery Ŭchnaloŭ.
Kamunisty jašče spadziajucca, što rašeńni pa nierahistracyi niekatorych kandydataŭ buduć skasavanyja.
Čatyry čałavieki ad AHP taksama syšli z baraćby za deputacki mandat. Heta były palitviazień Ivan Kruk (Iviejskaja №53), Mikałaj Ułasievič (Smarhonskaja, №59), Artur Curbakoŭ (Homielskaja-Navabielickaja №36), Adam Varaniec (Homielskaja-Viaskovaja №37).
«Da ŭsich padziej, źviazanych z vybarami, staŭlusia dosyć spakojna. Navat nie chadziŭ na pasiedžańnie vybarčaj kamisii, dzie mianie rehistravali. Pierakanany, što bolšaja pałova našych vyłučencaŭ moža ŭ spraviadlivych umovach zmahacca za deputackaje kresła», – kaža lider AHP Anatol Labiedźka.
Palityk, adnak, zajaŭlaje pra niemahčymaść praviadzieńnia bajkotu. «Sabraŭšy pa Miensku i inšych kutkach krainy, bolš za 500 podpisaŭ, mahu śmieła kazać, što idejaj bajkotu žyvuć tolki siarod 2-3 % vybarcaŭ», – miarkuje jon.
Ad BSDP nie zarehistravali troch kandydataŭ: Aleha Mikulina (Viciebskaja-Viaskovaja №21), Maksima Kamaroŭskaha (Rahačoŭskaja №45), Irynu Vieštart (Smarhonskaja №59).
«U Mikulina nibyta znajšli prablemy z podpisami. Kamaroŭski ž zdaŭ na pravierku 1002 podpisy. Skazali, što hetaha zamała dla rehistracyi. U toj ža čas zarehistravali ŭ Puchavičach Sałdacienku, u jakoha było 1004 podpisy. Iryna Vieštart – čałaviek vielmi viadomy ŭ Smarhoni, jana niekalki razoŭ była deputatam harsavietu. Dumaju, što jaje šancy rasceńvalisia b jak vielmi vysokija», – kaža staršynia BSDP Anatol Laŭkovič. Samoha Laŭkoviča zarehistravali ŭ Bieraści.
Siarod siabroŭ byłych źlikvidavanych Partyi pracy i Partyi žančyn «Nadzieja» admoŭlena ŭ rehistracyi Ŭładzimieru Łazoŭskamu (Vaśniacoŭskaja №93) i Alenie Jaśkovaj (Hrušaŭskaja №98).
Nie zarehistravali niezaležnaha kandydata, palitolaha Alesia Łahvinca (Sucharaŭskaja akruha, Miensk).
Pa vyłučencach ad «Eŭrapiejskaj kaalicyi» kančatkovych ličbaŭ pakul niama. «Dobra, kali z 51 zarehistrujuć 20 čałaviek», – kaža Mikoła Statkievič. Nie zarehistravany jon sam, staršynia arhkamitetu Partyi svabody i prahresu Ŭładzimier Navasiad, lider pradprymalnikaŭ Alaksandar Makajeŭ, redaktar «Borisovskich novostiej» Anatol Bukas, a taksama Leanid Astapovič, Alena Famina, Natalla Białova, Siarhiej Koval, Mikałaj Kijka, Mikita Krasnoŭ, Siarhiej Kałtovič i Siarhiej Kazłoŭski. Asabliva vialikija straty pa Miensku i zachodnich rehijonach krainy.
Ad BSDH Stanisłava Šuškieviča zarehistravany siem čałaviek.
Takim čynam, u krainie moža akazacca paŭtara dziasiatki biezalternatyŭnych akruhaŭ. A kali ADS, nasupierak zaklikam ZŠA i ES, taksama praihnaruje vybary — to i ŭsie 50 pracentaŭ.
Kamientary