Ci mohuć paŭnočnakarejskija vojski pryjechać u Biełaruś u vypadku eskałacyi na miažy z Ukrainaj?
Finski ekśpiert miarkuje, što nie. Ukrainski kaža: «Ukrainie hublać užo niama čaho. Kali budzie pahroza z boku Biełarusi, buduć vykarystanyja ŭsie dastupnyja srodki, kab jaje likvidavać».
Za apošnija niekalki dzion Kijeŭ adrazu niekalki razoŭ publična zahavaryŭ pra novuju pahrozu z boku Biełarusi. Prezident Ukrainy Uładzimir Zialenski zajaviŭ, što Biełaruś praciahvaje razbudoŭvać kala ŭkrainskaj miažy vajskovuju infrastrukturu, jakaja moža vykarystoŭvacca dla ahresii. Pavodle jaho, kala miažy budujucca darohi, składy bojeprypasaŭ i bazy zachoŭvańnia paliva. Pry hetym, jak śćviardžaje Zialenski, u rasijskich dakumientach hetyja abjekty niepasredna zhadvajucca ŭ kantekście zadač tak zvanaj «śpiecyjalnaj vajennaj apieracyi».
Jašče adnu tryvožnuju zajavu zrabiŭ hałoŭnakamandujučy Uzbrojenych sił Ukrainy Alaksandr Syrski. Jon nie vyklučyŭ, što, nie dasiahnuŭšy praryvu na asnoŭnych učastkach frontu, Rasija moža pasprabavać adkryć novy kirunak, pašyryŭšy front jašče prykładna na 160 kiłamietraŭ za košt biełaruskaha kirunku. Pavodle jaho, Ukrainie ŭžo ciapier davodzicca rychtavać dadatkovyja bryhady na vypadak takoha raźvićcia padziej.
Na hetym fonie ŭźnikaje pytańnie: kali Kreml sapraŭdy budzie šukać sposaby źmianić chod vajny, ci moža Biełaruś stać adnym z hałoŭnych instrumientaŭ takoj novaj eskałacyi? I ci mahła b Rasija pajści jašče dalej — naprykład, vykarystać u Biełarusi paŭnočnakarejski kantynhient, jaki ŭžo dapamahaje joj u vajnie suprać Ukrainy?
«Naša Niva» spytała ŭ finskaha i ŭkrainskaha ekśpiertaŭ, na što moža pajści Rasija.
Maskva ŭžo šukaje reziervy
Vajna suprać Ukrainy daŭno pierastała być vajnoj vyklučna rasijskich resursaŭ. Rasija atrymlivaje ad Irana bieśpiłotniki i technałohii, ad Paŭnočnaj Karei — artyleryjskija snarady, rakiety i navat vajskoŭcaŭ. Na terytoryi Rasii ŭžo dziejničali paŭnočnakarejskija padraździaleńni, a supracoŭnictva pamiž Maskvoj i Pchieńjanam paśla padpisańnia novaj damovy vyjšła na biesprecedentny ŭzrovień. Paŭnočnaja Kareja pastaŭlała Rasii artyleryjskija snarady, rakiety, sistemy załpavaha ahniu i nakiravała vajskoŭcaŭ dla ŭdziełu ŭ bajavych dziejańniach na baku Rasii.
NATA jašče ŭ kastryčniku 2024 hoda paćvierdziła, što paŭnočnakarejskija padraździaleńni byli pierakinutyja ŭ Rasiju i raźmieščanyja ŭ Kurskaj vobłaści. Paźniej paviedamlałasia, što tam mahli znachodzicca kala 10‑12 tysiač vajskoŭcaŭ KNDR. Častka ź ich, pavodle ŭkrainskaha boku i raźviedak sajuźnikaŭ, udzielničała ŭ bajach suprać ukrainskich siłaŭ. Analiz novaha miemaryjała karejskim vajskoŭcam u Pchieńjanie dazvoliŭ vyličyć, što 2300 ich zahinuła.
Asobnaja linija dapamohi — bojeprypasy. Pavodle acenak Open Source Centre, ź siaredziny 2023 hoda KNDR mahła pastavić u Rasiju dziasiatki tysiač kantejnieraŭ z bojeprypasami — u pieraliku heta mohuć być miljony artyleryjskich snaradaŭ i rakiet.
Udzieł paŭnočnakarejskich vojskaŭ Maskva apłočvaje, i dastatkova doraha.
«Hipoteza cikavaja, ale jość dva momanty»
Starejšy navukovy supracoŭnik Finskaha instytuta mižnarodnych adnosin Ryhor Nižnikaŭ ličyć, što scenar ź pierakidkaj paŭnočnakarejskich vajskoŭcaŭ u Biełaruś tearetyčna možna abmiarkoŭvać, ale na siońnia jon vyhladaje małaimaviernym.
Pieršaja prablema — jurydyčnaja.
«Kali paŭnočnakarejskija vojski raźmiaščajucca ŭ Rasii, na heta jość adpaviednaja damova — vajenny sajuz pamiž Maskvoj i Pchieńjanam. A pamiž Minskam i Paŭnočnaj Karejaj takoj damovy niama. Adpaviedna, niama jurydyčnaha instrumientu, jak i čamu hetyja vojski pavinny raźmiaščacca na biełaruskaj terytoryi. Biez adpaviednaha zvarotu Łukašenki da KNDR heta niemahčyma», — tłumačyć Nižnikaŭ.
Jon zaŭvažaje, što dla Pucina farmalnaść usio ž maje značeńnie, praŭda, nie jak sapraŭdnaje prava, a jak «fihavy listok».
«Jon zaŭsiody budzie šukać niejkuju jurydyčnuju kosku, kab skazać: hladzicie, prava na maim baku. Navat kali heta vyhladaje jak fihavy listok», — kaža ekśpiert.
Druhaja prablema — praktyčnaja. Na dumku Nižnikava, Maskva ciapier maje patrebu ŭ paŭnočnakarejskich vajskoŭcach i resursach najpierš tam, dzie idzie niepasrednaja vajna: u Rasii abo na akupavanych terytoryjach Ukrainy. Pierakidka ich u Biełaruś nie daje vidavočnaha vajennaha vyjhryšu.
«Kali pierakinuć paŭnočnakarejskija vojski z terytoryi Rasii ŭ Biełaruś, tady niechta pavinien zaniać ich miesca ŭ Rasii. A ŭ Maskvy niama svabodnych vojskaŭ. Dla jaje ciapier važniej pakidać resursy dla asnoŭnych metaŭ — na terytoryi Rasii ci akupavanaj Ukrainy», — adznačaje Nižnikaŭ.
Kali situacyja źmienicca, moža źmianicca i łohika Maskvy
Pry hetym ekśpiert nie vyklučaje, što ŭ inšaj fazie vajny raźlik moža być inšym. Naprykład, kali ŭ Rasii źjaviacca dadatkovyja resursy abo kali Maskva zachoča macniej pryviazać Biełaruś da svajoj vajennaj stratehii.
«Kali vajna piarojdzie ŭ inšuju fazu i ŭ Maskvy buduć inšyja intaresy, inšyja resursy, tady možna budzie hladzieć na heta pa-inšamu. Ale značna imavierniejšy scenar — heta rasijskija vojski ŭ Biełarusi», — kaža Nižnikaŭ.
Jon źviartaje ŭvahu i na jašče adzin faktar — Kitaj. Pahłybleńnie vajennaha sajuzu Maskvy i Pchieńjana nie abaviazkova zadavalniaje Piekin, jaki tradycyjna ličyć Paŭnočnuju Kareju svajoj zonaj upłyvu. Tamu pašyreńnie roli KNDR u jeŭrapiejskaj vajnie moža vyklikać dadatkovaje napružańnie i dla Kitaja.
Biełaruś jak «čornaja dzirka»
Hałoŭnaja niebiaśpieka, pavodle Nižnikava, u tym, što Biełaruś usio bolš vyhladaje jak terytoryja, jakuju Maskva moža vykarystać u kožny momant — dla vajennych, palityčnych abo hibrydnych apieracyj.
«Biełaruś stanovicca takoj čornaj dzirkaj. Jak jana budzie vykarystoŭvacca dla dasiahnieńnia vajennych i palityčnych metaŭ Maskvy — pytańnie adkrytaje i niebiaśpiečnaje. I heta budzie vielmi ciažkim ciažaram dla Biełarusi i jaje budučyni», — kaža ekśpiert.
Jon miarkuje, što čym daŭžej idzie vajna, tym mienš Rasija budzie strymlivacca. I tym bolš imavierna, što Biełaruś znoŭ pasprabujuć vykarystać jak instrumient cisku — na Ukrainu, Jeŭropu abo NATA.
Pry hetym Maskva, na dumku Nižnikava, nie choča pramoj vajny z NATA: resursaŭ dla hetaha ŭ jaje niama. Ale jana moža šukać «šeruju zonu» — abmiežavanyja ataki, pravakacyi, hibrydnyja apieracyi, paśla jakich u krain Zachadu nie budzie palityčnaha kansensusu dla žorstkaha adkazu.
«Rasija budzie rabić tak, kab heta nie vyhladała jak abviaščeńnie vajny. I Biełaruś tut vielmi karysny instrumient. Łukašenka sam uvieś čas paŭtaraje, što ŭ jaho jość «palec na knopcy», i potym možna budzie skazać: moža, heta Łukašenka zrabiŭ», — tłumačyć Nižnikaŭ.
Čamu Zialenski ciśnie mienavita ciapier
Publičny ultymatum Uładzimira Zialenskaha Łukašenku ekśpiert razhladaje jak vajenna-palityčny cisk na režym.
«Pytańnie nie tolki ŭ retranślatarach. Ukraina dobra razumieje, što Biełaruś dla jaje — krynica pahroz. I nie prosta krynica pahroz, a słaby punkt u rasijskaj vajennaj mašynie, na jaki možna cisnuć», — kaža Nižnikaŭ.
Pavodle jaho, dla Kijeva heta moža być sprobaj pakazać słabaść Łukašenki i prymusić Maskvu ŭkładvać bolš resursaŭ u kantrol nad Biełaruśsiu, a nie ŭ nastup na Danbasie.
«Kali praź infarmacyjna-palityčny i častkova vajenny cisk udasca raschistać situacyju ŭ Biełarusi, dla Ukrainy heta budzie surjoznym vynikam. Maskvie daviadziecca ŭkładacca ŭ padtrymańnie situacyi ŭ Biełarusi, a nie ŭ novyja dyvizii dla Danbasa», — adznačaje ekśpiert.
Paviedamleńnie pra toje, što retranślatary na biełaruskaj terytoryi pierastali pracavać, moža vyhladać jak pieršy vynik hetaha cisku.
«Biełaruś nielha ŭciahnuć u vajnu, jana ŭžo ŭ joj»
Dla Kijeva Biełaruś užo daŭno nie źjaŭlajecca niejtralnaj terytoryjaj.
Sacyjołah, ekśpiert Mižnarodnaha centra supraćdziejańnia rasijskaj ahresii Dźmitryj Hramakoŭ ličyć, što pytańnie pra toje, ci možna «ŭciahnuć Biełaruś u vajnu», uvohule nie adpaviadaje rečaisnaści.
«Biełaruś užo jość u hetaj vajnie. Z 24 lutaha 2022 hoda jana nadała svaju terytoryju dla ahresii suprać Ukrainy, dała mahčymaść nanosić udary pa Ukrainie i ŭžo čaćviorty hod padtrymlivaje rasijskuju ahresiju. Tamu kazać, što niechta moža ŭciahnuć Biełaruś u vajnu, prosta nielha», — adznačaje jon.
Na dumku ekśpierta, sučasnaja vajna daŭno nie abmiažoŭvajecca tolki bajavymi dziejańniami.
«Heta tolki adna šostaja častka sučasnaj hibrydnaj vajny. Biełaruś užo vajuje razam z Rasijaj u inšych vymiareńniach — u infarmacyjnaj, dypłamatyčnaj, ekanamičnaj śfierach. Jana nie dałučajecca da sankcyj suprać Rasii, padtrymlivaje jaje na mižnarodnych placoŭkach, praciahvaje supracoŭnictva, jakoje dapamahaje vieści vajnu. Tamu kazać, što Biełaruś znachodzicca pa-za vajnoj, niemahčyma», — kaža Hramakoŭ.
Mienavita z hetaha, pavodle jaho, vynikaje i ciapierašniaja rezkaja rytoryka Kijeva.
Ekśpiert źviartaje ŭvahu, što patrabavańni Uładzimira Zialenskaha datyčyli nie tolki retranślataraŭ, jakija, pavodle ŭkrainskaha boku, vykarystoŭvalisia dla padtrymki rasijskich atak bieśpiłotnikaŭ.
«Słovy Zialenskaha datyčyli taksama pastavak paliva Rasijskaj Fiederacyi i zabieśpiačeńnia palivam rasijskich akupacyjnych vojskaŭ. Chutčej za ŭsio, Minsk abo Maskva prosta vybrali mienšaje zło, kab zachavać status-kvo. Kali Biełaruś hulaje na baku Rasii ŭ infarmacyjnaj, łahistyčnaj, ekanamičnaj i inšych śfierach, to navošta Maskvie ciapier prymušać Łukašenku jašče i adpraŭlać biełaruskija vojski na front? Rasijanam heta pakul prosta nie patrebna», — tłumačyć jon.
«Kali Minsk razumieje tolki movu ultymatumaŭ, ź im buduć razmaŭlać hetaj movaj»
Na pytańnie, ci buduć novyja ŭltymatumy z boku Kijeva, ekśpiert adkazvaje adnaznačna:
«Tak, ultymatumy jašče buduć. Kali Minsk nie razumieje inšaj movy, to ź im buduć razmaŭlać toj movaj, jakuju jon razumieje. Ci buduć hetyja patrabavańni datyčycca naftapierapracoŭčych zavodaŭ abo inšych pradpryjemstvaŭ? Mahčyma. Usio budzie zaležać ad taho, nakolki pradukcyja hetych pradpryjemstvaŭ budzie pahražać biaśpiecy Ukrainy i ŭpłyvać na chod bajavych dziejańniaŭ».
Na dumku Hramakova, kali Minsk budzie ihnaravać takija patrabavańni, Ukraina nie vyklučaje bolš žorstkich dziejańniaŭ.
«Ukrainie, akramia svajoj dziaržaŭnaści i niezaležnaści, hublać užo niama čaho. Kali niejkaja pahroza z boku Biełarusi stanie realnaj, buduć vykarystanyja ŭsie dastupnyja srodki, kab jaje likvidavać», — adznačaje ekśpiert.
«Łukašenka moh ubačyć u historyi z aŭtobusam rasijskuju pravakacyju»
Dźmitryj Hramakoŭ źviartaje ŭvahu na jašče adnu akaličnaść — historyju ź biełaruskim aŭtobusam, jaki trapiŭ pad ataku drona ŭ Branskaj vobłaści Rasii.
Na dumku ekśpierta, Minsk moh nie atrymać ad Maskvy poŭnaj infarmacyi pra hety incydent.
«Rasijanie nikoha nie dapuścili da rasśledavańnia, navat svaich sajuźnikaŭ ź Minska. I mienavita tamu Minsk moža ličyć, što heta była pravakacyja samich rasijan», — kaža jon.
Pavodle Hramakova, kali heta sapraŭdy tak, Łukašenka moh uspryniać zdareńnie jak sposab cisku na jaho z boku Kramla.
«Łukašenka razumieje, što heta nie pravakacyja jaho ŭstupleńnia ŭ vajnu z boku Ukrainy, a cisk na jaho z boku Rasii. Tamu jon aściarožničaje sa słovami», — ličyć ekśpiert.
«Vybačeńni Łukašenki ničoha nie mianiajuć»
Kamientujučy niadaŭnija słovy Łukašenki, jaki paprasiŭ prabačeńnia pierad Zialenskim za svaje raniejšyja vykazvańni, ekśpiert adznačaje: u Kijevie aceńvajuć nie słovy, a dziejańni.
«Jak skazaŭ prezident Zialenski, nam nie patrebnyja vybačeńni — nam patrebnyja dziejańni, jakija buduć źnižać našyja ryzyki. Ukraina paśla 2022 hoda ŭsprymaje jak sihnały tolki kankretnyja dziejańni. Kali retranślatary sapraŭdy buduć adklučanyja i bolš nie buduć vykarystoŭvacca suprać Ukrainy, tady heta možna budzie ličyć niejkim sihnałam. Ale sami słovy ničoha nie źmianiajuć».
Na dumku Hramakova, vybačeńni byli adrasavanyja chutčej nie Kijevu.
«Heta była chutčej sproba Łukašenki palepšyć ułasny imidž pierad aŭdytoryjaj arabskaha telekanała, jakomu jon davaŭ intervju. Dla Ukrainy heta nie dypłamatyčny krok i nie krok da prymireńnia».
Ekśpiert padkreślivaje, što mahčymaść novaha vykarystańnia biełaruskaj terytoryi Rasijaj u Kijevie razhladajuć jak realnuju pahrozu:
«Kali Biełaruś stanie ŭdzielnikam novaj ahresii, adkaz atrymaje ŭžo sama Biełaruś. My budziem razhladać heta jak ahresiju mienavita z boku Biełarusi».
Pavodle jaho słoŭ, takoje ž usprymańnie budzie i na mižnarodnym uzroŭni: «Ukraina siońnia adkryta papiaredžvaje biełaruskija ŭłady: luby novy akt ahresii ź ich boku stanie padstavaj dla adkazu ŭžo niepasredna pa Biełarusi».
Rasija ciśnie na Biełaruś, prymušajučy ŭstupić u vajnu suprać Ukrainy — WSJ
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy
Łukašenka pryznaŭ, što Rasija va Ukrainie nie dasiahnuła metaŭ. Patłumačyŭ heta tym, što Pucina padmanuli Vatykan i jaŭrejskaje łobi
Kamientary
Jardov 10 amierikanskich dieniuch otstiehniot na ličnyje sčieta kimov i vsio i vsie prijedut...
čamu nie ? Kim svaimi žaŭnierami handluje, buduć hrošy buduć karejskija žaŭniery
Infa 100%.