Darja Katkoŭskaja: «U Minsku čałaviek ź dziciom — niedaklijent»
Čas ad času žančyny, jakija latajuć praz Nacyjanalny aeraport Minsk, skardziacca na abyjakavaść supracoŭnikaŭ. Bo, pa ich słovach, supracoŭniki aeraporta nie tolki nie dapamahajuć ź ciažkimi valizkami ci dziciačymi vazkami, ale i adkazvajuć, što ich nie chvalujuć čužyja prablemy na prośby dapamahčy.
Hetym razam nie vytryvała viadomaja jurystka Darja Katkoŭskaja.
«Užo hod ja ŭvieś čas lotaju rejsam Białhrad — Minsk z maleńkim dziciem i kalaskaj, biez darosłaha partniora, adna.
U mianie ručnaja pakłaža, dvoje dziaciej i kalaska. Kab vyjści z hiejta da aŭtobusa, jaki advozić na pasadku, mnie treba pieraadoleć čatyry praloty doŭhaj leśvicy biez pandusa abo lifta. Z ručnoj pakłažaj na siabie i starejšaha, małodšym dziciom na rukach i kalaskaj. I zaŭsiody supracoŭniki avijakampanii kažuć — my vam dapamahać nie budziem, heta nie ŭvachodzić u našy abaviazki, papytajecie ab dapamozie ŭ pasažyraŭ mužčyn, chaj jany vam dapamahajuć. Ja prapanoŭvała im samim paprasić, ale atrymlivaju admovu. Tam ža pa leśvicy pakutujuć z valizkami ludzi stałaha ŭzrostu», — napisała Katkoŭskaja ŭ svaim fejsbuku.
Darja trochi pamylajecca — majucca na ŭvazie tut nie pradstaŭniki avijakampanii, a supracoŭniki aeraporta.
«Ja liču, što kali ŭ aeraporta niama techničnych mahčymaściaŭ zrabić lift abo pandus dla vychadu da aŭtobusa, to mnie abaviazany pradastavić dapamohu pa pieranosie kalaski ŭ aŭtobus pa prystupkach.
Akramia taho, siońnia supracoŭnica na čekinie na maje prośby dapamahčy z kalaskaj pad daždžom i dziciom u mianie na rukach adkazvała «heta nie maje prablemy i klikać ja nikoha nie budu».
Uvohule, adznačaje Katkoŭskaja, takoje staŭleńnie da ludziej z kalaskami — u Minsku nie redkaść:
«Skłałasia adčuvańnie, što čałaviek z kalaskaj i dziciem heta taki niedaklijent trochi, jaho «treba paciarpieć».
Pres-słužba Nacyjanalnaha aeraporta nijak nie prakamientavała vypadak, paviedamiŭšy, što dla raźbiralnictva pytańnia treba pisać zapyt na imia kiraŭnictva.
Kamientary