Čamu biełaruski navažvajucca na chatnija rody? Historyi čatyroch maci

Sudzić abvinavačanuju Volhu Ściapanavu, niahledziačy na jaje pratest, vyrašyli ŭ zakrytym režymie. 31-hadovaja žycharka Sankt-Pieciarburha naŭrad ci čakała, što jaje žadańnie naradzić druhoje dzicia ŭ maci doma skončycca takim čynam. Paśla tydnia pasiadžeńniaŭ u sudzie Čyhunačnaha rajona horada Viciebska joj vynieśli prysud: 6 miesiacaŭ u kałonii-pasialeńni. Jaje vyzvalili ŭ zale suda, bo čas, praviedzieny ŭ SIZA, zaličany ŭ termin adbyćcia pakarańnia.

Zhodna ź biełaruskim zakanadaŭstvam (č. 1 st. 144 UK Biełarusi: pryčynieńnie śmierci pa nieaściarožnaści),žančynie pahražali papraŭčyja raboty na termin da 2 hadoŭ, abo abmiežavańnie voli da 3 hadoŭ, abo pazbaŭleńnie voli na taki ž termin.

Pavialičyć

U internecie nieabyjakavyja hramadzianie jašče da abviaščeńnia prysudu stvaryli pietycyju z zaklikam vypuścić Volhu z-pad varty i apraŭdać. Jaje padpisali tysiačy čałaviek.

Nichto nie moža zabaranić biełaruscy naradžać doma, adnak lehalnymi ličacca rody tolki ŭ dziaržaŭnych radzilniach. Inšyja varyjanty Ministerstva achovy zdaroŭja ličyć złačynstvam: pra heta, naprykład, nie raz vykazvaŭsia ministr achovy zdaroŭja Valeryj Małaška.

Kab atrymać paśviedčańnie ab naradžeńni novaha člena siamji, maci, što ŭsio ž naradziła doma (vypadkova ci naŭmysna), prychodzicca paćviardžać hety fakt praz sud.

Niahledziačy na takija ciažkaści i niehatyŭnaje staŭleńnie aficyjnaj miedycyny dy bolšaści hramadzian da chatnich rodaŭ, šmat biełarusak abirajuć dla svaich budučych dziaciej mienavita taki varyjant źjaŭleńnia na śviet.

My prapanavali maci, jakija mieli taki dośvied, patłumačyć svoj vybar, nie čakajučy, što čytačak «NN», achvotnych vykazacca budzie tak šmat: telefon karespandenta razryvaŭsia ad zvankoŭ.

Častka žančyn pahadziłasia padzialicca svajoj pazicyjaj adkryta, niekatoryja — ananimna: usie jany zaraz napałochanyja hučnym sudovym pracesam nad Volhaj.

Historyja Viktoryi Śmirnovaj (32 hady)

Pavialičyć

Svajho pieršynca ja naradžała ŭ minskaj radzilni №1 u 2008 hodzie. Mnie było 23 hady, ja śviata vieryła ŭ toje, što daktary, jak i nastaŭniki, naprykład, — heta vielmi razumnyja, najlepšyja ludzi. Viadoma, ja nie mahła nie daviarać śpiecyjalistam. My damovilisia na partniorskija rody, prajšli z mužam kursy padrychtoŭki, ale ŭ vyniku ŭ radzilnuju zału jaho nie puścili: na susiednim stale zašyvali inšuju žančynu. Zatoje padčas rodaŭ vakoł mianie hurtavalisia kala 20 čužych ludziej — studentaŭ, siarod ich byli mužčyny.

My pryjechali ŭ balnicu zarana. Kab stymulavać rodavuju dziejnaść, mianie zakałoli aksitacynam — pastavili try kropielnicy, ad jakich ja adčuvała piakielny bol u formie adnoj schvatki na praciahu čatyroch hadzin. Ja kulturny čałaviek, ale ŭ toj momant hryzła padušku i łajałasia pad nos.

Paśla taho, jak naradziła, z-za preparatu ŭ mianie pačaŭsia mocny kryvaciok matki, ja zhubiła litr kryvi. U małyša ž na hałavie vyjaviŭsia vialiki huz — u tuju źmienu šyški niejkim čynam atrymali ŭsie novanarodžanyja.

Maja hałoŭnaja pretenzija da miedpiersanału — toje, što jany mohuć dazvolić sabie lubyja dziejańni, nie zaŭsiody patrebnyja, kirujučysia tym, što ŭ balnicy možna chutka vypravić usie pamyłki. Ja ŭžo maŭču pra chamstva i vykazvańni kštałtu: «Rabić dzicia było pryjemna, dyk i ciapier paciarpi», «Drenna budzieš tužycca — narodziš harodninu» i hetak dalej.

Praciahły čas ja sama była lutym praciŭnikam chatnich rodaŭ, navat svaryłasia z maci, jakija na ich vyrašalisia, na śpiecyjalnych forumach: «Vy što? U mianie tak ciažka prajšli rody, ale pad rukoj chacia b była reanimacyja i sučasnaje abstalavańnie, a vy — nienarmalnyja». Paśla ja pahutaryła ź niekatorymi takimi žančynami ŭžyvuju, ubačyła, što jany nie niejkija tam siektantki, jakija źjadajuć płacentu paśla rodaŭ, a adukavanyja doktarki, jurystki…

Akramia hetaha, ja pačała čytać litaraturu z alternatyŭnym padychodam da hetaha pracesu: francuzskaha akušera Mišela Adena, jaki papularyzuje dumku pra toje, što akušerka ŭvohule nie pavinna ŭmiešvacca ŭ spravu, pakul jaje dapamoha nie spatrebicca, Hrentli Dzik-Ryd, Irynu Martynavu… Dla siabie ja vyrašyła, što druhoje dzicia budu naradžać doma. Ja zajmałasia johaj, rychtavała svajo cieła. Na ŭsiaki vypadak damoviłasia ź miedpiersanałam radzilni, što ŭ luby momant mahu tudy pryjechać. Ja znajšła vydatnuju chatniuju akušerku z adukacyjaj i vialikim dośviedam, jakaja dahladała mianie padčas ciažarnaści, rodaŭ i paśla.

Pamiataju, što vody ŭ mianie adyšli niečakana (da hetaha byli schvatki, ale zusim słabyja). Ja adrazu patelefanavała akušercy — jana pryjechała praz 10 chvilinak, ale za taki karotki adrezak času ja paśpieła naradzić. Pryhadała ŭ toj momant usio, čamu mianie vučyli, pravilna dychała i amal nie tužyłasia: dačka «vyjšła» lohka i spakojna, chacia ja ŭvieś čas čakała toj bol, što byŭ mnie viadomy z radzilni. Naradžała ja ŭ vańnie, u lažačaj pastavie. Pupavinu pierarazała akušerka, jana ž pryniała płacentu — heta toje, čaho ja bolš za ŭsio bajałasia. Akušerka pavodziła siabie sa mnoj, jak z rodnaj dačkoj — heta nie idzie ni ŭ jakaje paraŭnańnie z tym, što adbyvałasia ŭ balnicy.

Pra papaŭnieńnie ŭ siamji my paviedamili piedyjatru na piatyja sutki: jana była ŭ žachu. Na nastupny ž dzień da nas zavitali orhany sacabarony, apieki, hałoŭny doktar palikliniki. Potym byŭ sud pa vyznačeńni fakta naradžeńnia, bo tolki tak chatnija dzietki atrymlivajuć paśviedčańnie. Naš sud ciahnuŭsia niečakana doŭha — čatyry miesiacy, u jaho miežach mnie pryjšłosia paćviardžać fakt ciažarnaści ŭ hiniekołaha, rabić hienietyčnuju ekśpiertyzu pa ŭstanaŭleńni maciarynstva. Pytańnie vyrašyłasia tolki praz staršyniu suda.

Niahledziačy na ŭsie hetyja prablemy, ja ni pra što nie škaduju. Kali budzie treciaje dzicia — zrablu hetak ža. Dla majoj dziaŭčynki treba było, kab jana źjaviłasia na śviet mienavita tak: biez stresaŭ, u spakoi, z majoj uvahaj.

Akramia taho, ja adčuvaju svaju moc jak maci, hety dośvied uzbahaciŭ našy adnosiny z dačkoj: na nas nichto nie kryčaŭ, nie kamandavaŭ, nie załaziŭ u majo cieła, kali toje nie treba, nichto ŭ mianie adrazu ž nie zabraŭ dziaŭčynku… My zrabili ŭsio sami.

Historyja Maryi V. (36 hadoŭ)

Pavialičyć

Treciaje dzicia ja, možna skazać, vymušana była naradžać doma. Čamu? Tamu što i ŭ pieršy, i ŭ druhi raz ja sutyknułasia z prablemami ŭ radzilniach.

Da rodaŭ pieršynca rychtavałasia skrupulozna, choć i była całkam zdarovaj budučaj maci: lekara šukała pa rekamiendacyjach znajomych. Zamoviła płatnuju pałatu ŭ radzilni №2 i navat na łapu tam jašče šmat kamu dała — karaciej, pierastrachoŭvałasia. Ale niešta pajšło nie tak, i maje rody skončylisia kiesaravym, a na matcy zastaŭsia rubiec.

Z takimi nastupstvami dla zdaroŭja mnie, ciažarnaj druhi raz, tak ja ciapier liču, nielha było kałoć aksitacyn, pačynać z prakołu puzyra, tym bolš była damova na naturalnyja rody, adnak usio heta rabili, kab potym znoŭ mianie ratavać.

Mienavita tamu, kali ja zaciažaryła treci raz, u mianie było niekalki varyjantaŭ raźvićcia padziej: jechać za miažu ci naradžać doma. Iści ŭ radzilniu ja nie chacieła, heta było ryzykoŭna. Maci, jakija naradžajuć tam, buduć sa mnoj spračacca, adnak ja bačyła, što ŭ majoj situacyi ja maju racyju.

Majo rašeńnie całkam padtrymali svajaki i muž, tym bolš, što jaho stryječny plamieńnik padčas rodaŭ atrymaŭ invalidnaść mienavita praz pamyłku daktaroŭ. Bolš za toje, viaskovy piedyjatr pazityŭna adreahavała na hetuju ideju. U našaj vioscy ja nie pieršaja maci, jakaja naradžaje takim sposabam.

My naniali akušerku, pasłuhi jakoj abyšlisia ŭ 500 dalaraŭ. Na krajni vypadak, my byli hatovyja jechać u reanimacyju: u dvary čakała mašyna z kiroŭcam — karaciej, ja nie stroiła ź siabie hieroja. Da rodaŭ abśledavałasia ŭ płatnym miedcentry: viedała, što ŭ mianie dobryja analizy, i płod raźvivajecca zdarovy.

Sami rody prajšli cudoŭna. Pra ich navat niama čaho raskazać: naradžała — naradziła. A voś pra žachi i niehatyŭnyja emocyi z radzilni ja mahu raspaviadać viečna.

Što mianie rasčuliła — dyk heta ŭvaha i padrychtavanaść majoj akušerki: kali ciabie apranajuć u jakasny ŭrałahičny pampiers, a nie ŭ niejkija anučy, kali ciabie padtrymlivajuć na kožnym kroku, kali tabie prynosiać napoj z trubačkaj, chacia doma ŭ nas ich nie było… Ja raskazvaju pra takuju drobiaź, kab vy razumieli, jak možna kłapacicca pra paradzichu, i heta pavinna być normaj. Karaciej, ja adčuła siabie karalevaj pracesu, a nie inkubataram dla dziciaci ci častkaj kanviejera.

Mnohija ludzi dumajuć, što ŭ chatnich akušerak niama nijakich instrumientaŭ, ale ŭ našaj byŭ i partatyŭny prybor dla KTH, i pieršapačatkovy nabor dla reanimacyi.

Paśla nas, viadoma, čakaŭ sudovy praces. Paśviedčańnie małomu addali tolki praz dva miesiacy. Ale ŭ ideale pavinna być tak, kab kožnaja žančyna mahła abrać sabie taho hiniekołaha ci akušerku, jakija buduć ź joj na suviazi 24 hadziny ŭ sutki, kab jana aficyjna vypłačvała śpiecyjalistam hrošy, a jany ŭ luby momant mahli pryniać rody ŭ radzilni ci doma.

Historyja Darji Łukinoj (38 hadoŭ)

Pavialičyć

U našaj siamji hadujecca dvoje synoŭ — Damijan i Siebaśćian. U ich vialikaja roźnica va ŭzroście — 16 hadoŭ. Pieršaha ja naradžała ŭ radzilni: u 21 hod i dumki nie było, što isnujuć niejkija alternatyvy, ja prosta dziejničała pa standartnaj schiemie. Druhoje ž dzicio było doŭhačakanym, zaciažaryć udałosia nie ź pieršaj sproby, tamu ja vyrašyła padyści da budučych rodaŭ adkazna i śviadoma.

Ja šukała dobruju radzilniu ŭ Minsku, patrabavańniaŭ było nie tak šmat: śpiecyjalisty, ź jakimi možna było b paznajomicca zahadzia, plus ja nie chacieła, kab rody stymulavali, prasiła, kab nie adrazu pierarazali pupavinu i nie zabirali dzicia vielmi chutka. Nidzie mnie nie skazali, što zmohuć vykanać usie hetyja prośby.

Byŭ varyjant pajechać u Vilniu: my kansultavalisia tam, i daktary byli hatovyja vykanać luby naš scenar. Adnak my padličyli, što ŭsio moža abyścisia zanadta doraha ŭ hrašovym ekvivalencie. Tamu pryjšli da vysnovy, što chatnija rody — aptymalny varyjant. Znajšli na radzimie akušerku, jakaja viała apošnija tydni ciažarnaści, a potym rabiła ahlady niemaŭlaci.

U žanočaj kansultacyi pra svajo rašeńnie ja nikomu nie skazała, choć i znachodžusia ŭ dobrych adnosinach z učastkovym hiniekołaham: jana viała maju ciažarnaść, a ja adkazna vykonvała ŭsie pradpisańni. Adnak jak pracaŭnik dziaržaŭnaj sistemy jana b mianie nie padtrymała, adhavorvała b i hetak dalej, mienavita tamu ja pramaŭčała.

Akušerku ja paklikała, tolki kali pačalisia schvatki. Rody lohkimi nie byli. Ja liču, što ŭvohule ich lohkich nie byvaje, bo heta zaŭsiody vyprabavańnie. Byŭ adzin momant, kali mnie padałosia, što biez akušerki ja b nie dała rady: małyš byŭ vielmi vialiki, i ja bajałasia, što nie zmahu jaho «vytužyć». Dapamahło toje, što maja pamočnica mianie ŭsialak padtrymlivała, padbadziorvała: kankretna demanstravała nieabchodnyja pozy, jak pravilna tužycca i hetak dalej.

Kab sud prajšoŭ lohka, nam pryjšłosia schłusić, što my nie paśpieli dajechać da radzilni. Adnak mnie vielmi chočacca, kab takoha nie było. Kab nie chavalisia ni my, ni akušerki.

Lepš by dziaržava padtrymała naša žadańnie, bo šmat maci chočuć naradžać doma: zrabiła b bolš dastupnaj chutkuju dapamohu, kab na vypadak niejkich niečakanaściaŭ, možna było b adrazu vyklikać bryhadu reanimacyi.

Z druhoha boku, kali b ja znajšła dobry varyjant u radzilniach, moža, i nie naradžała b doma. Ale, na žal, usio toje, što tam siońnia adbyvajecca, pracuje pa praviłach, jakija pisali nie žančyny, dy nie adpaviadaje pryncypam naturalnych rodaŭ, da jakich imkniecca kožnaja budučaja maci ź ćviarozym rozumam.

Historyja Volhi B. (40 hadoŭ)

Pavialičyć

U nas šmatdzietnaja siamja: 5 dziaciej. Pieršaha i druhoha ja naradžała ŭ abłasnoj radzilni, a traich nastupnych — doma, tamu što na svaim dośviedzie ŭbačyła, što našy radzilni ŭjaŭlajuć ź siabie nabor biessensoŭnych dziejańniaŭ i pracedur, za jakimi źnikajuć ułasna hałoŭnyja asoby — maci i dzicio.

My — prosta abjekty sastarełych pratakołaŭ i zvyčak miedpiersanału, časam prosta biessensoŭnych i navat niebiaśpiečnych: stymulacyja, prakoł puzyra biez dazvołu, aksitacyn biez tłumačeńniaŭ…

U radzilnym domie nie bačać u paradzisie paŭnapraŭnaha čałavieka, jaki ŭ stanie prymać rašeńni i maje prava atrymlivać vyčarpalnuju infarmacyju pra toje, što adbyvajecca.

Druhija rody ŭ mianie byli imklivymi: my ledź paśpieli vyklikać chutkuju dapamohu i ŭlacieć ŭ pryjomnaje adździaleńnie. Pačalisia schvatki, ja amal padała na karački. Muž dapamoh mnie raspranucca, nakinuć kašulu, i mianie daciahnuli da radzilnaha pakoja. I što vy dumajecie? Pakul ja znachodziłasia ŭ takim stanie, akušerka raskłała svaje papiery na susiednim stale i pačała mianie apytvać: miesca pracy, pasada…

Vielmi napružvaje, što ŭ nas da hetaha času prablemna pravieści partniorskija rody, navat pa apłačanym kantrakcie, bo moža nie znajścisia svabodnych pałat. Na kursach partniorskich rodaŭ abłasnoj radzilni vielmi sałodka pra ŭsio heta śpiavajuć, a na samoj spravie — jak pašancuje. Zahadčyk adździaleńnia sam ščyra prasiŭ mianie nie brać na rody muža.

Kali naradziłasia dačka, nichto nie čakaŭ, pakul adpulsuje pupavina, pakul adydzie płacenta, dziaŭčynku adrazu zabrali i navat nie pakłali na žyvot.

Daŭno ŭžo dakazana, što stres — antahanist rodaŭ. Čym bolš žančyna napružana, tym daŭžej i ciažej buduć jany prachodzić. Tamu ja zaŭsiody staŭlu ŭ pryjarytet intaresy i pačućci paradzichi. Kamuści spakajniej u chatnich umovach, kamuści ŭ radzilnym domie. U žančyny pavinien być vybar.

Maje starejšyja dzieci naradzilisia z radavymi traŭmami i važyli mienš małodšych. Prablemy byli i ŭ mianie: mocny kryvaciok, ciažkaje adnaŭleńnie i postradavaja depresija. Małodšyja ž «vyskačyli» lohka, choć i važyli 4—5 kh. Nijakich prablem ni ŭ mianie, ni ŭ ich sa zdaroŭjem, fizičnym i maralnym, nie było.

Doma ja naradžała, stojačy na karačkach. Uvohule, u kožnaj žančyny jość svaja zručnaja radavaja poza, u radzilni ž ciabie, čaściej za ŭsio, kładuć u lažačaje stanovišča. Adzin z samych istotnych plusaŭ chatnich rodaŭ u tym, što dzicia adrazu znajomicca z chatniaj mikrafłoraj. Navat lekary pryznajuć, što niama ničoha horšaha za balničnyja infiekcyi. My ličym, što bolšaść uskładnieńniaŭ, jakimi pužajuć mam, što naradžajuć doma, zdarajucca mienavita ad balničnaj atmaśfiery.

Asnoŭnyja składanaści paśla chatnich rodaŭ — tolki pracesualnyja. Heta značyć — jak maha chutčej paśla rodaŭ (zamiest taho, kab lažać, adnaŭlacca i «vylizvać» dzicia) biehać pa horadzie, źbirać daviedki, kab padać dakumienty ŭ sud, a potym ustanaŭlivać fakt ciažarnaści i samich rodaŭ.

Vybirać, jak i dzie naradžać — heta prava žančyny. Jana i tolki jana vybiraje lepšyja ŭmovy dla siabie i svajho dziciaci. A kab my nie bajalisia prychodzić u radzilni, rearhanizoŭvajcie ich.

Apytanka

• 0
• 0
• 0
• 0
• 0
• 0
• 0
• 0