«Katalonskaja drama dla mianie pierš za ŭsio banalnaja prablema demakratyi i prava na ŭłasny vybar, — piša ŭ svaim fejsbuku žurnalist Vital Cyhankoŭ.
— Znoŭ palityčnyja i finansavyja elity ličać, što jany lepš viedajuć, jak i dzie treba žyć narodu (narodam).
A narody pa ŭsioj Eŭropie apošnija 2-3 hady imkliva ŭciakajuć ad hetych mudracoŭ, jakija apošnim časam nadta šmat stali rašać bieź ich i zamiest ich, zajaŭlajučy, što tak «pravilna». Heta jak baćki, jakija prymušajuć svajo dzicio vybrać «nadziejnuju» prafesiju — advakata, doktara ci prahramista — a jon choča być mastakom albo piśmieninikam. Moža, jon vialikim piśmieńnikam i nie stanie — ale heta jahony vybar, vybar samastojnaha čałavieka. I jahonaja adkaznaść.
Tak i z krainaj — narod navat maje prava dapuścić pamyłku, ale jon sam za jaje i budzie adkazvać. 5 hadoŭ kataloncy prapanoŭvali hišpanskamu ŭradu supolna i pad kantrolem Madrydu pravieści referendum. Praviadzicie, jak u Kviebieku ci ŭ Šatlandyi — i zakryjcie temu! Dyk nie, Madryd admaŭlajecca i potym jašče maje nachabstva spasyłacca na demakratyčnyja normy.
Toje ž samaje, što zaraz kažuć Barselonie — toje samaje (navat u detalach — maŭlaŭ, tolki ŭvieś saviecki narod moža rašać, ci moža być Litva niezaležnaj) kazali ŭ 1991-m hodzie pierad razvałam SSSR. Rasijskija demakraty pierakonvali prybałtaŭ — «davajcie spačatku razam pabudujem u SSSR demakratyju, a ŭžo potym padumajem pra vašu niezaležnaść». Prybałty adkazvali — «budujcie biez nas, my jak-niebudź sami»)
A pytańnie «navošta kataloncam niezaležnaść?» ničym nie adroźnivajecca ad takoha ž pytańnia, jakoje ja hadami čuŭ ad roznych ruskich ludziej — «a navošta vam, biełarusam, niezaležnaść?» Na heta ja adkazvaju ŭniversalna — «a vam, ruskim, navošta niezaležnaść?»
Kamientary