Bieraściejcy źniali narodny klip «Žyć» suprać budaŭnictva akumulatarnaha zavoda VIDEA
Napiaredadni zapisu rolika mnohija admoviłasia ad udziełu ŭ prajekcie, bo ich papiaredzili, što heta «niepažadana», piša «Bresckaja hazieta».
Na jutub-kanale 17 sakavika źjaviŭsia klip «Žyć», pryśviečany niehatyŭnamu staŭleńniu žycharoŭ Bresta i rajona da źjaŭleńnia akumulatarnaha zavoda «AjPaŭer». Haradžanie ŭ čarhovy raz sprabujuć źviarnuć uvahu čynoŭnikaŭ i hramadskaści na budaŭnictva patencyjna niebiaśpiečnaj vytvorčaści, jakaja, na ich dumku, viadziecca sa šmatlikimi parušeńniami.
Klip užo pahladzieli bolš za 13 tysiač razoŭ.
Hladzieć klip na Youtube
U klipie vykarystana muzyka Ihara Maćvijenki, jakuju jon napisaŭ ad uzrušeńnia avijakatastrofaj nad Sinajskim paŭvostravam, słovy — narodnyja.
«Praca nad rolikam doŭžyłasia dzieści paŭtara miesiaca. Užo była praviedzienaja padrychtoŭka, byli znojdzienyja muzykanty, studyja i čałaviek, jaki musiŭ zapisvać uvieś videašerah. Ale litaralna ŭ apošni momant, napiaredadni zdymak, hetym ludziam paviedamili, što im niepažadana heta rabić. Vielmi mnohija admovilisia ŭdzielničać u prajekcie. Pryjšłosia znoŭku šukać apieratara, studyju, dzie možna było pravieści zdymku, studyju, dzie možna było zapisać huk, šukać ludziej, jakija nakłali b huk na malunak i hetak dalej. Heta naš padarunak horadu da jaho 1000-hodździa z nadziejaj, što my zmožam jaho adstajać», — prakamientavali stvaralniki rolika.
* * *
Ad pačatku hoda ŭ Breście i rajonie razharnułasia aktyŭnaja kampanija suprać źjaŭleńnia akumulatarnaha zavoda «AjPaŭer» u SEZ «Brest». Kiraŭnictva zavoda, «SEZ» i čynoŭniki zapeŭnivajuć, što na ŭsich etapach realizacyi prajekta zakanadaŭstva nie było parušana. Aktyvisty zajaŭlajuć, što heta nie tak, i damahajucca jak minimum prypynieńnia budaŭnictva zavoda da vyśviatleńnia ŭsich tych pytańniaŭ, što chvalujuć ludziej.
Bolš za ŭsio žychary aścierahajucca škody, jakuju zavod moža prynieści ekałohii i ich zdaroŭju. Sabrana bolš za 37 tysiač podpisaŭ miascovych žycharoŭ, jany pieradadzienyja ŭ Administracyju prezidenta.
U znak pratestu suprać zavoda ŭžo niekalki tydniaŭ zapar ludzi vychodzili na płošču Lenina pakarmić hałuboŭ.
16 sakavika ŭ Bresckim abłvykankamie adbyłasia 5-hadzinnaja sustreča tych, chto nastrojeny suprać budaŭnictva zavoda, z kamisijaj, jakaja była stvorana pa daručeńni premjer-ministra Biełarusi i jakaja pavinna dać adkazy na ŭsie pytańni i pravieryć fakty, atrymanyja ad žycharoŭ Bresta i Bresckaha rajona.
Kamientary