U Biełarusi paśla hadavoha pierapynku adnaŭlajecca vypusk dziełavoha časopisa «Biznes-reviu». Vydańnie stała trecim ŚMI, jakoje ŭvachodzić u vydaviecki pakiet Belkanton Group. Pieršy numar 2018 hoda vyjšaŭ u krasaviku.
«Jakasnaja dziełavaja presa — taki ž nieabchodny atrybut biznes-infrastruktury, jak narmalnaje zakanadaŭstva, raźvity rynak, banki ci sudovaja sistema. I čym jakaśniejšaja presa, tym na bolšy pośpiechi moža raźličvać nacyjanalny biznes u pracy ŭ siabie na radzimie i za miažoj. My ŭpeŭnienyja, što mienavita «Biznes-reviu» zdolny stać jašče adnym efiektyŭnym instrumientam dla tych, chto zajmajecca biznesam, maje ambicyi i volu dla ich realizacyi», — adznačaje staršynia rady dyrektaraŭ Belkanton Group Vachtanh Achvledyjani ŭ pradmovie da pieršaha paśla pierapynku numara časopisa.
Vydaviec padkreślivaje, što stryžnievaja kancepcyja zastajecca niaźmiennaj — «znajomić svaich čytačoŭ z tym, jak ludzi robiać biznes».
Časopis pierastanie być štomiesiačnym i budzie vychodzić 6 razoŭ na hod. «Biznes-reviu» pazicyjanujecca jak vydańnie dla ŭłaśnikaŭ i top-mieniedžaraŭ kampanij, pretendujučy na pakul nie zaniatuju nišu «biełaruskaha «Forbsa». Płanujecca, što klučavymi temami časopisa stanuć analityčnyja materyjały pra rynki, paśpiachovyja biznes-kiejsy i ekskluziŭnyja intervju ź viadučymi biznesmienami krainy.
Hierojem pieršaha numara ŭ 2018 hodzie staŭ suzasnavalnik kampanii Wargaming Ivan Michnievič, jaki paźniej pradaŭ svoj pakiet akcyj u kampanii. Ciapier Ivan Michnievič zajmaje 7-je miesca ŭ rejtynhu samych upłyvovych biełaruskich biznesmienaŭ i vałodaje aktyvami ŭ Biełarusi, Šviejcaryi i na Kipry.
Časopis «Biznes-reviu» vydajecca z 2003 hoda. U 2009-m redakcyja prypyniała vypusk vydańnia ŭ suviazi ź finansavymi prablemami, jakija ŭźnikli na fonie kryzisu. Paźniej «Biznes-reviu» atrymaŭ inviestycyi ad Unica Group, mižnarodnaj kampanii, jakaja vyjšła na biełaruski rynak u studzieni 2014 hoda, a ŭ kastryčniku 2016 hoda rabota časopisa była znoŭ prypynienaja.
U studzieni 2018-ha hoda vydańnie nabyła Belkanton Group. Akramia «Biznes-reviu» ŭ vydaviecki pakiet hrupy kampanij uvachodziać časopis Office Life i dziełavy sajt officelife.media.
Belkanton Group źjaŭlajecca adnym ź lidaraŭ biełaruskaha rynku servisu ŭ siehmiencie B2B. Hrupa kampanij pracuje ŭ śfiery aptovych, karparatyŭnych i roźničnych prodažaŭ kancylarskich tavaraŭ, ofisnaj techniki, bytavoj i prafiesijnaj chimii, taksama źjaŭlajecca adnym ź lidaraŭ na rynku suvienirnaj pradukcyi. Pracuje ŭ Biełarusi, Rasii, Ukrainie, Litvie.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»20
Kamientary