Jak skłaŭsia los Jany Pačyckaj — dziaŭčyny, jakuju zatrymlivali razam z Kanavałavym i Kavalovym pa spravie ab terakcie ŭ mietro
Imia Jany Pačyckaj prahučała na ŭsiu krainu ŭ 2011 hodzie, kali 21‑hadovuju studentku zatrymali ŭ adnoj kvatery ź Dźmitryjem Kanavałavym i Uładzisłavam Kavalovym. Siońnia Jana — žonka, maci, jakaja šmat fatahrafuje i aktyŭna ŭdzielničaje ŭ zabiehach. Raskazvajem, što viadoma pra dziaŭčynu, jakaja vypadkova apynułasia ŭ centry samaj hučnaj kryminalnaj spravy ŭ historyi sučasnaj Biełarusi.
Janie Pačyckaj ciapier 36 hadoŭ. Paśla zakančeńnia škoły ŭ Rečycy ŭ 2007 hodzie jana pierajechała ŭ Minsk, paśpieła pavučycca ŭ žanočym instytucie «Enviła» i ŭ Minskim instytucie kiravańnia (pa śpiecyjalnaści «psichałohija»).
Mnohija mierkavali, što pryčynaj likvidacyi «Enviły» było jakraz toje, što tam vučyłasia Pačyckaja. U 2012‑m bolš za 1000 studentak raskidali pa inšych univiersitetach.
U krasaviku 2011‑ha Jana Pačyckaja apynułasia ŭ epicentry trahičnych padziej. Ź Dźmitryjem Kanavałavym jana kala hoda stasavałasia ŭ sacsietcy «UKantakcie». Asabista jany sustrelisia tolki 10 krasavika.
U zdymnaj kvatery na vulicy Karala sabralisia čaćviora — Kanavałaŭ, Uładzisłaŭ Kavaloŭ, Jana Pačyckaja i jašče adna dziaŭčyna. Taja ŭrešcie pajšła dadomu, Jana ž zastałasia na načoŭku.
«My pili. Pili doŭha i šmat. Šmat było harełki, i vino było», — raskazvała jana ŭ sudzie pra pasiadziełki z Kanavałavym i Kavalovym. Apošni zapis, jaki Jana zrabiła na svajoj staroncy «UKantakcie»: «Žudasna chočacca čahości vielmi nieprystojnaha!». Heta było napisana a druhoj hadzinie nočy 11 krasavika — u dzień ździajśnieńnia teraktu.
Jana stała mižvolnaj śviedkaj taho, jak Kanavałaŭ vychodziŭ ź siniaj sumkaj i viartaŭsia ŭ pryŭźniatym nastroi 11 krasavika — u dzień vybuchu na stancyi «Kastryčnickaja». 12 krasavika ŭ kvateru ŭvarvaŭsia śpiecnaz.
Pieršapačatkova dziaŭčynu zatrymali jak padazravanuju pa vybuchovaj spravie, bo jana znachodziłasia ŭ kvatery razam z hałoŭnymi fihurantami. Jana prajšła praz dopyty. Adnak kali stała zrazumieła, što jana vypadkovy čałaviek i ničoha nie viedała, kryminalny pieraśled suprać jaje byŭ spynieny praz adsutnaść składu złačynstva. Jana pierajšła ŭ status śviedki.
U sudzie jaje pakazańni pra toje, jak chłopcy pierašeptvalisia nad sumkaj za šyrmaj, stali adnymi z asnoŭnych pakazańniaŭ abvinavačańnia.
«Kali ŭbačyli naviny pra vybuch, Kanavałaŭ užo spaŭ. My abmiarkoŭvali z Kavalovym. Ja kazała, što heta moža być apazicyja, ale navošta im uzryvać mietro? Ja aburałasia. Abmiarkoŭvali vybuch i na nastupny dzień. Chłopcy mnie padtakvali», — kazała jana.
Vyhladaje, što paśla ŭsich padziej ź instytuta Pačyckuju adličyli. Ale žyćcio praciahvałasia. Dziaŭčyna ŭładkavałasia ŭ kramu sietki «Miła». U lipieni 2015 hoda Jana vyjšła zamuž i ŭziała dvajnoje proźvišča. Nieŭzabavie ŭ siamji naradziłasia dačka.
Doŭhi čas Jana zajmałasia rukadziellem — stvarała aryhinalnyja interjernyja kampazicyi i padarunki ručnoj pracy, układvajučy ŭ ich, jak sama pisała ŭ sacsietkach, «čaścinku dušy».
Apošnija ž hady Pluščanica-Pačyckaja zachapiłasia bieham. U jaje skarboncy — viertykalny zabieh Bright Vertical (kali ŭdzielniki biehli na 23‑i pavierch budynka), trejły Belarus Museum Run na 5 kiłamietraŭ i masavyja zabiehi nakštałt «Pryhožaha zabiehu». Da sportu jana dałučaje i dzicia, rehistrujučy jaho na siamiejnyja dystancyi.
Akramia taho, Jana stała fatohrafkaj. Dziaŭčyna šukaje madelaŭ dla zdymak u Minsku, arhanizoŭvaje pryhožyja viasielnyja fotasiesii, udzielničaje ŭ supolnaściach Fine Art fatohrafaŭ i rehularna abnaŭlaje prafiesijnuju techniku.
Baćka Jany — mastak Vasil Pačycki, aŭtar paznavalnych karykatur z zajcami na staronkach «Biełhaziety». Jon pamior u 2024 hodzie.
«Naša Niva» — bastyjon biełaruščyny
PADTRYMAĆCiapier čytajuć
Pieršy biełaruski pašpart z «Pahoniaj» atrymaŭ Łukašenka, a druhi — školnik Juryj Čarniak. Jak skłaŭsia los chłopca?7
Pieršy biełaruski pašpart z «Pahoniaj» atrymaŭ Łukašenka, a druhi — školnik Juryj Čarniak. Jak skłaŭsia los chłopca?
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi44
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi4
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy8484
Kamientary
Nakolki ž ludzi dalokija ad realnaści
Mutnaja historyja. Mnie i tady i zaraz padavałasia, što jany byli zavarožanymi. Nie abdołbanyja jakoj-niebudź durju, a mienavita zavarožannymi.
Vikipiedija: « Śviaź mieždu osuždionnymi i vzryvčatkoj nie była dokazana. Po priedpołožienijam, vidieo s kamier nabludienija było otriedaktirovano, i nie był ustanovlen motiv diejstvij osuždionnych.»