Navukoŭcy Navukova-daśledčaha instytuta Hłedstoŭna (ZŠA) vyznačyli raniej nieviadomyja funkcyi białku kłota, uzrovień jakoha ŭ arhaniźmie čałavieka, jak viadoma, źmianšajecca z uzrostam. Vyjaviłasia, što malekuła abaraniaje mozh ad zapalenčych reakcyj i praduchilaje raźvićcio starečych zachvorvańniaŭ centralnaj niervovaj sistemy. Artykuł apublikavany ŭ časopisie Proceedings of the National Academy of Sciences.
Viadoma, što pavyšanaja aktyŭnaść białku kłota pavialičvaje praciahłaść žyćcia ŭ ekśpierymientalnych žyvioł, a deficyt malekuły pravakuje paskoranaje stareńnie. Navukoŭcy vyśviatlili, što kłota ŭ vialikaj kolkaści ŭtrymoŭvajecca ŭ sustaŭnym splacieńni žałudačkaŭ mozhu — struktury, jakaja vypracoŭvaje śpinnamazhavuju vadkaść i źjaŭlajecca barjeram pamiž imunnaj sistemaj i CNS. Pry hetym pamianšeńnie kolkaści kłota ŭ splacieńni z uzrostam uzmacniaje zapalenčyja pracesy ŭ mozhu.
Daśledniki pakazali, što ŭ myšaniataŭ, jakim z dapamohaj virusnych viektaraŭ była ŭviedziena mutacyja ŭ hien Klotho, nazirałasia pavyšanaja aktyŭnaść prazapalenčych faktaraŭ i infiltracyja (praniknieńnie) makrafahaŭ — imunnych kletak, jakija zachoplivajuć i pahłynajuć čužarodnyja dla arhanizma čaścicy. Padobnaje adbyvajecca i ŭ niemutantnych starych myšej.
Akramia taho, navukoŭcy zaŭvažyli, što deficyt kłota vyklikaje źmieny ŭ hipakampie, jaki adkazvaje za pierachod karotkačasovaj pamiaci ŭ doŭhačasovuju. Tut pavialičvałasia aktyŭnaść mikrahlii — imunnych kletak, jakija ŭdzielničajuć u zabieśpiačeńni niejronavaj płastyčnaści, kahnityŭnych funkcyj i raźvićci nieŭrałahičnych zachvorvańniaŭ.
Kamientary