Maładyja ŭ Lidzie paprasili haściej zamiest kvietak prynieści na viasielle cacki, a potym padaryli ich dzieciam-invalidam
Edvin i Vieranika siamjoj Nienartovič stali mienš za miesiac tamu — 24 listapada. Svaich haściej na viasielle jany paprasili prychodzić nie z kvietkami, a z cackami. Svajaki i siabry maładych ludziej achvotna adhuknulisia na hetu niezvyčajnuju prapanovu (a ŭsiaho na viasielli hulali bolš za 80 čałaviek). Sabranyja lalki, mašynki, raźvivajučyja hulni, razmaloŭki, pazły, kanstruktary, knihi maładyja siońnia pieradali ŭ mižrajonnaje adździaleńnie dla dziaciej-invalidaŭ i chvorych ź psichanieŭrałahičnymi zachvorvańniami Lidskaj CRB, paviedamlaje «Lidskaja hazieta».
Praŭda, kali maładyja dumali nad hetaj idejaj, jany tak i nie vyrašyli, u jakuju mienavita ŭstanovu pieradać padarunki, u Smarhoni, adkul rodam Vieranika, ci ŭ Lidzie — rodnym horadzie Edvina. Adkaz na pytańnie znajšoŭsia ŭ katalickim sanktuaryi Maci Božaj Karalevy našych siemjaŭ u vioscy Trakieli.
— Na viasielle niekatoryja hości akramia cacak usio roŭna prynieśli jašče i kvietki, — uśmichnułasia Vieranika. — Usie bukiety my sabrali i pryvieźli Maci Božaj Trakielskaj u znak padziaki za naša znajomstva. Tak, z Edvinam my sustrelisia tut, u kaściole, padčas pilihrymki ŭ 2017 hodzie. Voś takoje Božaje błahasłavieńnie.
Padčas naviedvańnia sanktuaryja maładyja zajšli da nastajaciela parafii — ksiandza Juryja Biahanskaha, jaki taksama źjaŭlajecca kapiełanam kaplicy pad tytułam Maci Božaj z Łurda, jakaja znachodzicca na terytoryi Lidskaj CRB. Tak znajšoŭsia adkaz na pytańnie: kudy pieradać sabranyja na viasielli zamiest kvietak padarunki — piedyjatryčnamu reabilitacyjnamu adździaleńniu.
— Za čatyry hady isnavańnia kaplicy Edvin i Vieranika, napeŭna, užo piatyja maładyja, jakija svajo asabistaje śviata — viasielle, adznačajuć z dareńniem padarunkaŭ pacyjentam lidskaj balnicy. Takija ŭčynki, biezumoŭna, źjaŭlajucca vydatnym pačynańniem novaha žyćcia, — prakamientavaŭ Juryj Biahanski.
Siońnia ŭ mižrajonnym adździaleńni dla dziaciej-invalidaŭ i chvorych ź psichanieŭrałahičnymi zachvorvańniami Lidskaj CRB 28 pacyjentaŭ.
Kamientary