Stali viadomyja detali bijahrafii i maršruty pajezdak treciaha atručvalnika Skrypaloŭ. Maršruty prymušajuć zadumacca

Jak vyśvietlili žurnalisty, Dzianis Siarhiejeŭ vyras u kazachstanskim Ušarale. U 1990-m hodzie jon skončyŭ Jekaciarynburhskaje suvoraŭskaje vajennaje vučylišča, paśla čaho praciahnuŭ vajennuju karjeru ŭ PDV. U 1999 h. Siarhiejeŭ udzielničaŭ u bai za vyšyniu Aślinaje vucha ŭ Dahiestanie, byŭ paranieny i pradstaŭleny da dziaržaŭnaj uznaharody. U pačatku 2000-ch Siarhiejeŭ pierajechaŭ u Maskvu, dzie pastupiŭ u Vajskovuju akademiju, jakaja rychtuje supracoŭnikaŭ vajennaj raźviedki.

Užo raspaviadałasia pra ŭdzieł Siarhiejeva ŭ atručvańni Skrypaloŭ i bałharskaha pradprymalnika Emiliana Hiebrava. Ale heta, padobna, byli daloka nie adzinyja jaho apieracyi.

Tak, Fiadotaŭ byŭ u Katałonii niepasredna pierad refierendumam ab adździaleńni i ŭ Brytanii pierad refierendumam ab brekzicie. Pakul paćvierdzić jaho suviaź z hetymi padziejami nie ŭdałosia.

Niekatoryja z pajezdak Siarhiejeva pakul jašče ciažka rastłumačyć, u tym liku ŭ Tadžykistan ŭ 2013 hodzie, Čechiju ŭ 2014 hodzie i Turcyju ŭ 2015 hodzie. Adnak ža ekśpiert, ź jakim pahutaryli Bellingcat i The Insider, vykazaŭ zdahadku, što jany mohuć być źviazanyja sa ździełkami pa prodažy zbroi ŭ Siryju.

Zatoje niekatoryja inšyja suviazi prasočvajucca dosyć vidavočna.

Tak, naprykład, pajezdki Siarhiejeva pakazvajuć na toje, što jon pad realnym imiem jeździŭ u Pieciarburh z čałaviekam, čyja mašyna taksama zarehistravanaja pa adrasie štab-kvatery HRU, Charašoŭskaja šaša 76. Pryčym pravami na kiravańnie hetaha aŭtamabila vałodaŭ inšy HRUšnik, Uładzimir Majsiejeŭ (Papoŭ), adzin z arhanizataraŭ pieravarotu ŭ Čarnahoryi.

Jašče adzin spadarožnik Siarhiejeva (imia nie nazyvajecca) minimum 4 razy lotaŭ na samalocie razam z Edvardam Šyšmakovym (Šyrokavym) — druhim asnoŭnym udzielnikam pieravarotu ŭ Čarnahoryi.

Hety druhi spadarožnik cikavy nie tolki svaim znajomstvam z Šyšmakovym, ale i tym, što rehularna lotaŭ u Krasnadar adnymi rejsami z najomnikami z hrupy Vahniera. Nahadajem, baza PVK Vahniera znachodzicca mienavita ŭ Krasnadary, najomnikam hetaj hrupy vydavali zamiežpašparty toj ža sieryi, što i supracoŭnikam HRU.

Identyfikacyja «Fiadotava» zaniała bolš času, bo, u adroźnieńnie ad vypadku ź Piatrovym i Bašyravym, brytanskija ŭłady nie publikavali jaho fotazdymak.

Daśledčykam udałosia atrymać śpisy pasažyraŭ rejsaŭ, jakija vylatali ŭ Łondan 2 sakavika 2018 hoda, i paćvierdzić, što «Fiadotaŭ» prylacieŭ u stalicu Brytanii za niekalki hadzin da Piatrova i Bašyrava.

Z taho ž śpisu pasažyraŭ udałosia atrymać i datu naradžeńnia, ale jana, jak i imia, mahła być vydumanaj. Pamiatajučy pra toje, što HRUšnik pry atrymańni svajho novaha ahienturnaha imieni zachoŭvaje mnohija dadzienyja ab sabie, žurnalisty pasprabavali znajści čałavieka z padobnymi źviestkami i zarehistravanaha pa adnym z adrasoŭ, źviazanych z HRU.

Paśla mnostva roznych kambinacyj udałosia znajści «padazravanaha»: pa adrasie vuł. Narodnaha Apałčeńnia, 50 (Vajennaja akademija, taksama viadomaja jak «Kansiervatoryja HRU») byŭ prapisany čałaviek z toj ža dataj naradžeńnia — Dzianis Viačasłavavič Siarhiejeŭ.

Adnak biez fatahrafii vyśvietlić, ci źjaŭlajucca Fiadotaŭ i Siarhiejeŭ adnym i tym ža čałaviekam, było spravaj niaprostaj. A ŭsie dadzienyja z fotazdymkami (kopii pašpartoŭ i paśviedčańniaŭ kiroŭcy) byli vydaleny z rasijskich baz źviestak.

Śledčyja źviazalisia sa mnostvam krynic u roznych krainach, u tym liku z hatelami, dzie spyniaŭsia «Fiadotaŭ», i adna z krynic pradastaviła The Insider kopiju fatahrafii Fiadotava ź jaho zamiežpašparta.

Taksama žurnalistam udałosia znajści kadry ź Siarhiejevym u dakumientalnym filmie pra boj za vyšyniu Aślinaje vucha.

Na pieršy pohlad na dakumientalnym videa i na fatahrafii roznyja ludzi. Pieršapačatkova śledčyja paličyli, što pajšli pa iłžyvym śledzie.

Pavialičyć

Adnak prafiesijnaja ekśpiertyza, praviedzienaja prafiesaram Chasanam Juhiejłam z Centra vizualnych vyličeńniaŭ Bredfardskaha ŭniviersiteta, vyjaviła, što kaeficyjent supadzieńnia pamiž fota — 78%, pry nieabchodnych 70% dla adnaho i taho ž čałavieka.

• 0
• 0
• 0
• 0
• 0
• 0
• 0
• 0