Na piać hadoŭ asudžany biełarus, jaki pajechaŭ vajavać za «DNR»
Minski abłasny sud vynies prysud vajennasłužačamu, jaki nie viarnuŭsia ŭ čaść paśla adpačynku i zamiest hetaha pajechaŭ va Ukrainu vajavać. Pra heta paviedamlaje abłasnaja prakuratura, piša tut.by.
Fihurant - 25-hadovy žychar Salihorska. Pa viersii śledstva, jašče da pryzyvu mužčyna vyvučaŭ mahčymaść źjechać vajavać u susiedniuju krainu. Potym byŭ pryzvany na terminovuju słužbu.
«Znachodziačysia ŭ adpačynku, paśla prahladu čarhovych videarolikaŭ ź miescaŭ zbrojnaha kanfliktu, pryniaŭ rašeńnie nie viartacca ŭ vajskovuju častku z adpačynku i adpravicca va Ukrainu», - raspavioŭ prakuror adździeła prakuratury Minskaj vobłaści Juryj Kazuboŭski.
Padziei adbyvalisia ŭ kastryčniku 2018 hoda. Chłopiec źbiraŭsia vajavać na baku adnoj z samaabvieščanych «respublik» Danbasa.
Razumiejučy nastupstvy, sałdat nie źbiraŭsia viartacca na radzimu. Hrošaj na pajezdku nie było, tamu ŭ sałonie suviazi jon kupiŭ u rasterminoŭku mabilny telefon i ŭ toj ža dzień pradaŭ, kab atrymać hrošy. A nazaŭtra źjechaŭ va Ukrainu.
Adnak jon tak i nie ŭstupiŭ u šerahi ŭzbrojenaha farmavańnia, tamu što byŭ zatrymany supracoŭnikami SBU. U vyniku biełarusa sudzili pa artykułach pra deziercirstva, zamachu na ŭdzieł va ŭzbrojenym farmiravańni ŭ zamiežnaj dziaržavie i machlarstvie.
Prysud - 5 hadoŭ pazbaŭleńnia voli i pazbaŭleńnie zvańnia «jafrejtar». Prysud jašče nie ŭstupiŭ u zakonnuju siłu i moža być abskardžany.
Kamientary