Padstavaj dla departacyi stała źmiena miesca žycharstva biez rehistracyi.
31 studzienia z Bresta byli departavanyja Piotr Borań i Halina Zajkoŭskaja. Jany pracavali ŭ «AKC Most», na bazie jakoha isnuje Polskaja hramadskaja škoła imia Ihnata Damiejki Sajuzu palakaŭ u Biełarusi.
Nastaŭniki vykładali polskuju movu i historyju dla vučniaŭ staršych kłasaŭ.
Śpiecyjalisty byli zarehistravanyja, pracavali ŭžo druhi hod, mieli dazvoł ad uładaŭ Bresta na pracu ŭ halinie adukacyi.
U subotu i niadzielu śpiecyjalna na zaniatki da polskich nastaŭnikaŭ dajazdžali navučency z Kobryna, Pinska, Pielišča.
Padstavaj dla departacyi stała źmiena miesca žycharstva nastaŭnikaŭ, jakija pierasialalisia z raniej najmanaj kvatery ŭ novuju arandavanuju chatu.
Poŭnaje pierasialeńnie nastaŭnikaŭ tak i nie adbyłosia, bo śpiecsłužby, jakija nazirali (jak akazałasia paźniej) za hetym pracesam, na dziva, vielmi chutka vyjavili parušeńni zakanadaŭstva. Akazvajecca, treba było ŭ akreśleny termin pierarehistravacca pa novamu adrasie.
Dziejańni ŭładaŭ u horadzie razhladajuć jak demanstracyju pilnaha nahladu za žyćciom polskaje hramady ŭ horadzie.
Zamiest taho kab papiaredzić albo patłumačyć, što i jak treba rabić, na nastaŭnikaŭ nalacieła siamiasabovaja hrupa pradstaŭnikoŭ milicyi, domakiraŭnictva, śpiecsłužbaŭ. Ź piedahohaŭ uziali adbitki palcaŭ i abjavili im departacyju biez prava ŭjezdu na 5 hadoŭ.
Uźnikajuć pytańni: kamu patrebny hety skandał i na što raźličvajuć jaho arhanizatary?
Nahadajem, što sprava adbyłasia napiaredadni VII źjezdu Sajuzu palakaŭ. Jon adbudziecca 14—15 sakavika ŭ Baranavičach.
Abłasny aktyŭ SPB vyrašyŭ arhanizavać niadzielnyja zaniatki škołki ŭ Terespali — polskim pamiežnym miastečku, a moładź pryvozić na zaniatki aŭtobusam.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie5
Kamientary