ZŠA časova źniali sankcyi ź iranskaj nafty

Minfin ZŠA časova, na miesiac, dazvoliŭ kuplać i pradavać iranskuju naftu, kab źnizić ceny na enierhanośbity, jakija vyraśli ŭ vyniku błakiroŭki Tehieranam sudnachodstva ŭ Armuzskim pralivie z-za vajny, jakuju ZŠA i Izrail viaduć ź Iranam. Faktyčna Vašynhton dazvolić Tehieranu zarabić na praciahu vajny z ZŠA, papiaredžvali ekśpierty, piša Bi-bi-si.

Uviečary ŭ piatnicu Minfin ZŠA apublikavaŭ licenziju, jakaja na 30 dzion zdymaje zabaronu na kuplu i prodaž nafty i naftapraduktaŭ ź Irana, pry ŭmovie, što jany pa stanie na hety dzień užo byli adhružanyja i znachodzilisia ŭ darozie. Licenzija nie dazvalaje zaklučeńnie novych ździełak.

Ministr finansaŭ ZŠA Skot Biesient acharaktaryzavaŭ hetaje rašeńnie jak «vuzkaśpiecyjalizavanaje» i «karotkaterminovaje». Pavodle jaho acenki, heta dazvolić chutka vyvieści na suśvietnyja rynki kala 140 młn baralaŭ nafty, što pavinna častkova kupiravać deficyt i sadziejničać źnižeńniu cen, jakija prykmietna vyraśli ŭ vyniku błakavańnia Tehieranam kamiercyjnaha sudnachodstva ŭ Armuzskim pralivie z-za vajny ZŠA i Izraila suprać Irana, jakaja praciahvajecca ŭžo čaćviorty tydzień.

Ciapier asnoŭny atrymalnik iranskaj nafty — Kitaj, jaki kuplaje jaje z dyskontam, napisaŭ Biesent.

«Časova adkryŭšy dostup da hetych zapasaŭ dla ŭsiaho śvietu, Złučanyja Štaty chutka pastaviać na suśvietnyja rynki kala 140 młn baralaŭ nafty, pašyryŭšy abjomy suśvietnych enierharesursaŭ i dapamahajučy źnizić časovy cisk na pastaŭki, stvorany Iranam.

Pa sutnaści, my budziem vykarystoŭvać iranskuju naftu suprać Tehierana, kab strymlivać ceny, praciahvajučy pry hetym apieracyju [suprać Irana] «Epičnaja lutaść», — rastłumačyŭ Biesent łohiku rašeńnia.

Na jaho dumku, «Iranu budzie ciažka atrymać dostup da lubych atrymanych dachodaŭ», pakolki «ZŠA buduć praciahvać akazvać maksimalny cisk na Iran i jaho mahčymaści dostupu da mižnarodnaj finansavaj sistemy».

Tydzień tamu anałahičnaje časovaje pasłableńnie amierykanskich sankcyj było ŭviedziena ŭ dačynieńni da rasijskaj nafty.

Pra toje, što ZŠA razhladajuć mahčymaść časovaha źniaćcia sankcyj ź iranskaj nafty, Biesent raspavioŭ u intervju Fox News u čaćvier.

Tady Biesient zajaviŭ, što admiena abmiežavańniaŭ na prodaž iranskaj nafty moža dapamahčy pieranakiravać jaje z Kitaja, jaki kuplaje jaje zaraz sa źnižkaj, u inšyja krainy, takija jak Indyja, Japonija i Małajzija, a Kitaj prymusić płacić «rynačnuju canu». Pavodle jaho acenki, vychad iranskaj nafty na rynak źnizić suśvietnyja ceny na 10‑14 dzion.

Jašče na hetym etapie hetaja ideja, jakaja idzie ŭrazrez z sankcyjnaj palitykaj ZŠA, vyklikała krytyku ekśpiertaŭ, jakija prahnazavali, što jaje ŭpłyŭ na ceny, vierahodna, budzie abmiežavanym, pry hetym prodaž nafty finansava padtrymaje režym u Iranie, jaki ZŠA atakujuć.

«Miahka kažučy, heta [źniaćcie sankcyj ź iranskaj nafty] poŭnaja łuchta, — skazaŭ Bi-bi-si ŭ čaćvier Devid Tanienbaŭm, dyrektar Blackstone Compliance Services, kansałtynhavaj kampanii, jakaja śpiecyjalizujecca na marskich sankcyjach. — Pa sutnaści, my dazvalajem Iranu pradavać naftu, jakaja zatym moža być vykarystana dla finansavańnia vajennych dziejańniaŭ».

Ekśpierty taksama sumniavajucca, što iranskaja nafta dapamoža radykalna źnizić suśvietnyja ceny na jaje, jakija na fonie pierakryćcia Armuzskaha praliva i supiarečlivych zajaŭ prezidenta ZŠA Donalda Trampa ab pierśpiektyvach zakančeńnia vajny ŭ Iranie dasiahali 120 dalaraŭ za baral. Jany adznačajuć, što abjom abmiarkoŭvajemych pastavak iranskaj nafty adnosna nievialiki ŭ paraŭnańni z ahulnym popytam.

«Heta moža krychu pavialičyć prapanovu, ale ja nie dumaju, što heta kardynalna źmienić situacyju, zatoje vykliča masu pytańniaŭ», — ličyć Rejčeł Zimba, staršy navukovy supracoŭnik analityčnaha «Centra novaj amierykanskaj biaśpieki».

Pry hetym iranskija ŭłady zajaŭlajuć, što ŭ ich ciapier niama liškaŭ nafty, jakija možna było b prapanavać mižnarodnym rynkam. «U ciapierašni čas u Irana praktyčna nie zastałosia liškaŭ nafty ni na marskich sudnach, ni dla pastavak na inšyja mižnarodnyja rynki, i zajava ministra finansaŭ ZŠA nakiravana vyklučna na toje, kab usialić nadzieju ŭ pakupnikoŭ», — cytuje AFP aficyjnaha pradstaŭnika iranskaha ministerstva nafty Samana Hadusi.

Na rost cen na naftu ŭ sakaviku istotna paŭpłyvała błakiroŭka Iranam Armuzskaha praliva ŭ Piersidskim zalivie — praź jaho tranzitam idzie kala 20% nafty, jakaja zdabyvajecca ŭ śviecie. Korpus vartavych isłamskaj revalucyi abiacaŭ błakiravać pastaŭki nafty ź Piersidskaha zaliva da taho času, pakul ataki ZŠA i Izraila nie spyniacca.

Rašeńnie ZŠA źniać sankcyi ź iranskaj nafty stała jašče adnoj sprobaj pavialičyć prapanovu na rynku, jak i vypusk miljonaŭ barelaŭ nafty z reziervaŭ i prypynieńnie na minułym tydni sankcyj u dačynieńni da rasijskaj nafty.

Pasłableńnie sankcyj suprać Maskvy tady vyklikała rezkuju krytyku z boku jeŭrapiejskich lidaraŭ, jakija zajavili, što jano ŭmacuje režym Uładzimira Pucina i adterminuje zakančeńnie vajny va Ukrainie. Pra heta ž kazaŭ i Uładzimir Zialenski.

Rašeńnie Minfina było apublikavana ŭ piatnicu, i pakul niezrazumieła, ci vykliča prapanova Biesienta anałahičnuju reakcyju ŭ ZŠA, dzie Pałata pradstaŭnikoŭ litaralna na hetym tydni pryniała zakonaprajekt, nakiravany na ŭzmacnieńnie sankcyj suprać iranskaha naftavaha siektara.

Kali Biesient tolki abviaściŭ, što Minfin razhladaje mahčymaść źniaćcia sankcyj ź iranskaj nafty, Bi-bi-si źviarnułasia pa kamientary da tych amierykanskich palitykaŭ, jakija padtrymali zakonaprajekt ab uzmacnieńni sankcyj. Majk Łoŭler, respublikaniec ź Ńju-Jorka, jaki vystupiŭ aŭtaram zakonaprajekta, nie adkazaŭ na zapyt Bi-bi-si, jak i sienatar-demakrat Džyn Šachin, člen kamiteta pa mižnarodnych spravach.

Ab svaim rašeńni Minfin ZŠA abviaściŭ nieŭzabavie paśla taho, jak prezident Donald Tramp daŭ supiarečlivyja sihnały adnosna svaich płanaŭ u dačynieńni da vajny ź Iranam. Spačatku jon zajaviŭ žurnalistam, što nie choča spynieńnia ahniu, ale nieŭzabavie napisaŭ u sacyjalnych sietkach, što ZŠA razhladajuć mahčymaść nieŭzabavie zharnuć vajennuju apieracyju ŭ Iranie, pakolki ciapier ZŠA, na jaho dumku, vielmi blizkija da dasiahnieńnia svaich metaŭ.

Raniej jon kazaŭ, što, na jaho dumku, vajna moža praciahnucca čatyry-šeść tydniaŭ. Ciapier idzie čaćviorty tydzień kanfliktu.

Prezident ZŠA ŭžo sprabavaŭ paŭpłyvać na ceny na naftu, robiačy zajavy ab pierśpiektyvach zakančeńnia vajny ź Iranam. Kali na dziasiaty dzień apieracyi ceny na naftu Brent uźlacieli da 120 dalaraŭ za barel, jon skazaŭ žurnalistam, što vajna ź Iranam «praktyčna zavieršana». Heta dapamahło źnizić ceny, adnak potym jany znoŭ pačali raści.

U piatnicu, 20 sakavika, naftavyja rynki zaviaršyli tarhi rostam, choć i zastalisia nižej za 120 dalaraŭ za baral, adznačaje AFP. Barel nafty marki Brent padaražeŭ na 3,26% da 112,19 dalara. Jaho amierykanski anałah, tradycyjna bolš tannaja nafta marki West Texas Intermediate (WTI), padaražeła na 2,27% da 98,32 dalara.

• 0
• 0
• 0
• 1
• 0
• 0
• 0
• 0