Heta dziaŭčynka jeździć na ŭroki praz usio Hrodna, bo čynoŭniki rasfarmiravali jaje biełaruskamoŭny kłas
Sonia Haravaja— školnica z Hrodna. U hetym hodzie jana pajšła ŭ piaty kłas. Kab vučycca na rodnaj movie, dziaŭčynka jeździć praz uvieś horad, bo jaje kłas zakryli.
Sonia z baćkami žyvie ŭ Kastryčnickim rajonie Hrodna. Raniej jana chadziła ŭ škołu №34. U jaje kłasie było čatyry vučni.
Ale ŭ hetym hodzie kłas nie zachavaŭsia. Dvoje dziaciej pierajechali ŭ inšy mikrarajon, jašče adzin pajšoŭ u spartyŭnuju škołu.
«Pra toje, što kłasa nie budzie, my daviedalisia pierad samym letam. Da apošniaha spadziavalisia, što chtości pojdzie, što administracyja prapanuje inšym dzieciam dałučycca. Ale Sonia zastałasia adna. Na ŭvieś Hrodna tolki dźvie škoły majuć biełaruskamoŭnyja kłasy, tamu ŭ nas byŭ vybar: abo pieravodzicca ŭ škołu ŭ inšym kancy horada, abo źjazdžać u viosku», — raskazała mama Volha.
Dyrektar škoły: «Tak atrymałasia»
Dyrektar škoły №34 Vital Parmančuk tłumačyć, što kłas zakryli tamu, što zastaŭsia adzin vučań.
«Naša Niva»: Ale ŭ inšych škołach arhanizujuć navučańnie, navat kali adzin achvotny.
VP: I ŭ nas dla dvuch vučniaŭ jość — jany pierajšli ŭ 9 kłas.
«NN»: A čamu ź piatym kłasam nie atrymałasia? Čamu, naprykład, abjavu ad nabory nie dali?
VP: Pasłuchajcie, u nas štohod u jaki-niebudź biełaruskamoŭny kłas dadajucca vučni — pa adnym, pa dva. Toje, što my nie viadziem rabotu, nie padajem abjavy, nie adpaviadaje iścinie.
A piaty kłas — nu atrymałasia tak…
Narakańniaŭ ad baćkoŭ ja nie bačyŭ, jany listy nie pisali. Razmova była ŭ mai z apošnim, chto zastavaŭsia.
Ščyra kažučy, ja nie adsačyŭ, jon syšoŭ z našaj ustanovy ci zastaŭsia vučycca tut.
***
Ciapier dziaŭčynka vučycca ŭ škole №32 Leninskaha rajona. Na ŭroki jaje pakul vozić tata. Cikava, što ŭ hetaj ustanovie biełaruskamoŭnaje navučańnie prapanujuć, navat kali tolki adzin vučań vykazvaje žadańnie atrymlivać adukacyju na rodnaj movie (takaja dziaŭčynka jość, naprykład, u siomym kłasie). Padobnyja precedenty, darečy, raniej byli i ŭ škołach Mahilova i Babrujska.
«Administracyja dobra da nas pastaviłasia. I Sonia zadavolena, u jaje šmat siabroŭ, razam ź joj u kłasie vučycca jašče siem čałaviek», — padzialiłasia mama.
Kamientary