2 kastryčnika ŭ Azaryčach znajšli zabitaj 42-hadovuju Taćcianu Ahijevič, žonku miascovaha pravasłaŭnaha śviatara. U toj ža dzień u jakaści padazravanaha zatrymali jaje muža, nastajaciela chrama śviatych apostałaŭ Piatra i Paŭła, ijereja Hieorhija Ahijeviča.
Praŭda, uviečary 3 kastryčnika śviatara ŭžo adpuścili.
Vyśvietliłasia, što zatrymany inšy padazravany, 23-hadovy chłopiec, uradženiec susiedniaha ahraharadka Lipaŭ. Chłopca zavuć Viktar Marozaŭ.
«U Lipavie jon nie žyvie. Zarehistravany tut, ale pastajanna jeździŭ na zarobki», — raspaviali ŭ sielsaviecie.
Apošnim časam Marozaŭ razam z naparnikam pracavaŭ na budoŭli carkvy ŭ Azaryčach, dzie ijerej Hieorhij pierabudoŭvaŭ byłuju kramu ŭ pravasłaŭny chram.
«Usimi spravami pa carkvie zajmaŭsia ajciec Hieorhij z žonkaj. Jana viała buchhałteryju, adkazvała za carkoŭnuju łaŭku. Budoŭla išła pavolna, bo śviatar rabiŭ jaje za svaje hrošy. Ludzi dapamahali čas ad času, ale prychod u nas maleńki, hrošaj u ludziej niašmat, — raskazvaje siabroŭka zahinułaj Taćciany. — A hety chłopiec, jakoha zatrymali, zajmaŭsia azdableńniem».
Atrymlivajecca, što padazravanaha ŭ zabojstvie svajoj žonki zaprasiŭ na pracu sam śviatar. Jak kažuć miascovyja, rabočyja na budoŭli pieryjadyčna mianialisia. Marozava i jaho naparnika na pracu i z pracy vaziŭ sam ijerej Ahijevič.
Uviečary 3 kastryčnika milicyjanty pryvozili zatrymanaha Marozava ŭ Azaryčy, pravodzili śledčy ekśpierymient.
Ajca Hieorhija ŭ Azaryčy ŭviečary 3 kastryčnika taksama pryviezła milicyja. Śviatara sustreŭ syn. Paśla jany pajechali ŭ viosku Rubiel, što ŭ Stolinskim rajonie. Adtul rodam i Taćciana, i Hieorhij, tam jany i paznajomilisia ŭ maładości. 4 kastryčnika tam prajšło pachavańnie zabitaj.
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary