U Polščy startavaŭ druhi tur prezidenckich vybaraŭ. Šancy kandydataŭ nazyvajuć roŭnymi
U druhim tury ŭdzielničajuć prezident Andžej Duda i mer Varšavy ad apazicyjnaj partyi Rafał Tšaskoŭski.
Dla pieramohi ŭ druhim tury kandydatu treba atrymać bolš hałasoŭ, čym jaho supierniku. U pieršym tury, jaki adbyŭsia 28 červienia, nivodny z kandydataŭ nie zmoh nabrać bolš za 50%: Andžej Duda tady atrymaŭ 43,50%, Rafał Tšaskoŭski — 30,46% hałasoŭ vybarščykaŭ. Jaŭka skłała 64%.
Napiaredadni druhoha tura za Dudu byli hatovyja prahałasavać 45,9%. Za Tšaskoŭskaha — 46,4%. Jašče 7,7% vybarščykaŭ sa svaim vybaram nie vyznačylisia. Takija vyniki pakazała daśledavańnie kampanii Kantar, praviedzienaje 8-9 lipienia.
Pamiž pieršym i druhim turam pavinny byli prajści debaty kandydataŭ, adnak jany nie zmahli damovicca ab sumiesnym udziele, tamu adkazvali na pytańni ŭ roznych studyjach: prezident Duda na nacyjanalnym telebačańni, mer Tšaskoŭski na pryvatnym telekanale. Za dva tydni sapierniki nie stali mianiać asnoŭnyja tezisy svaich kampanij. Prajeŭrapiejski Tšaskoŭski paśla pieršaha tura prapanavaŭ palakam vybirać pamiž «adkrytaj Polščaj» i toj, što «šukaje vorahaŭ».
Siabie jon nazyvaje kandydatam źmienaŭ, jakich choča 58% hramadstva (stolki atrymaŭ u pieršym tury jon i inšyja apazicyjnyja kandydaty).
Kamientary