ZŠA nanieśli ŭdary pa Iranie ŭ adkaz na abstreł hruzavoha sudna ŭ Armuzskim pralivie
Byli atakavanyja abjekty zachoŭvańnia rakiet i bieśpiłotnikaŭ, a taksama prybiarežnyja radary ŭ rajonie praliva.
Amierykanskija vajskoŭcy zajavili, što nanieśli ŭdary pa Iranie paśla napadu na hruzavoje sudna ŭ Armuzskim pralivie. Byli atakavanyja abjekty zachoŭvańnia rakiet i bieśpiłotnikaŭ, a taksama prybiarežnyja radary ŭ rajonie praliva. Paśla hetaha Korpus vartavych isłamskaj revalucyi Irana (KVIR) paviedamiŭ, što nanios udary pa amierykanskich pazicyjach u rehijonie, piša Bi-bi-si.
«Nieabhruntavanaja ahresija z boku iranskich sił suprać handlovaha sudnachodstva vidavočna parušyła režym spynieńnia ahniu, — zajaviła Centralnaje kamandavańnie ZŠA (CENTCOM) u sacyjalnaj sietcy X. — Niebiaśpiečnyja pavodziny Irana padryvajuć svabodu sudnachodstva, bo praz hety žyćciova važny mižnarodny handlovy kalidor prachodzić usio bolš hruzaŭ».
Kamandavańnie dadało, što amierykanskija ŭzbrojenyja siły «praciahnuć zabiaśpiečvać kaardynacyju biaśpiečnaha prachodu i akazvać padtrymku handlovym sudam, jakija iduć praz praliŭ».
KVIR zajaviŭ, što adkazaŭ na ataku ŭłasnymi ŭdarami pa amierykanskich vojskach, ale nie ŭdakładniŭ padrabiaznaściej.
Raniej Donald Tramp zajaviŭ pra parušeńnie Tehieranam režymu spynieńnia ahniu ŭ suviazi z atakaj na kantejnieravoz Ever Lovely, jaki išoŭ praz praliŭ pad ściaham Sinhapura i naležaŭ kampanii Evergreen.
«Isłamskaja Respublika Iran vypuściła jak minimum čatyry ŭdarnyja bieśpiłotniki-kamikadze pa sudach, što prachodzili praz Armuzski praliŭ. Adzin ź bieśpiłotnikaŭ trapiŭ u vierchniuju pałubu vialikaha i vielmi darahoha hruzavoha sudna. Sudna atrymała paškodžańni, ale zmahło praciahnuć šlach. Try inšyja bieśpiłotniki my źbili. Vidavočna, heta biezrazvažnaje parušeńnie našaha pahadnieńnia ab spynieńni ahniu», — napisaŭ jon u Truth Social.
Tym časam vice-prezident ZŠA Džej Dzi Vens adznačyŭ, što kali Iran «nie zhodny z tym, jak pavinien realizoŭvacca Miemarandum ab uzajemarazumieńni [dakumient ab spynieńni ahniu, padpisany Tehieranam i Vašynhtonam], jany mohuć uziać telefon».
«Adnak adkazam na hvałt budzie hvałt», — dadaŭ Vens.
Paśla ŭdaru pa sudnie Mižnarodnaja marskaja arhanizacyja AAN (IMO) prypyniła evakuacyju bolš čym 11 tysiač marakoŭ, jakija tam zachraśli.
Ciapier čytajuć
U 2021 hodzie vypusknica admoviłasia pacisnuć ruku Hihinu na ŭručeńni dypłoma. Ciapier BDU nie choča jaho paćviardžać5
Kamientary