Jeŭrapiejskaja piśmieńnickaja rada asudžaje masavyja parušeńni pravoŭ čałavieka i svabody słova ŭ Biełarusi
13 žniŭnia Sajuz biełaruskich piśmieńnikaŭ źviarnuŭsia da Jeŭrapiejskaj Piśmieńnickaj Rady ź inicyjatyvaj vystupić u abaronu mirnaha pratestu, zaklikać da aktyŭnaha pašyreńnia infarmacyi ŭ jeŭrapiejskich ŚMI, arhanizacyjach i partyjach pra zadušeńnie svabody słova, hvałt i katavańni ŭ dačynieńni mirnych demanstrantaŭ u Biełarusi.
Siońnia Prezidyum Jeŭrapiejskaj Piśmieńnickaj Rady raspaŭsiudziŭ zvarot da litarataraŭ Jeŭropy i śvietu z zaklikam da salidarnaści z narodam Biełarusi.
«My znachodzimsia ŭ pastajannym kantakcie z členam EWC, Sajuzam biełaruskich piśmieńnikaŭ, i naviny, jakija my atrymlivajem, vyklikajuć vialikuju tryvohu i smutak, — zajaŭlaje Nina Hieorhie, staršynia EWC. — Našy niezaležnyja krynicy paviedamlajuć pra žorstki milicejski hvałt na vulicach i pra jašče bolš surjoznyja złoŭžyvańni ŭ turmach, uklučajučy psichałahičnyja katavańni, biaźlitasnyja paboi i zhvałtavańni. Usio heta nakiravana suprać biełarusaŭ, jakija ažyćciaŭlajuć svaje pravy na svabodu vykazvańnia mierkavańniaŭ, na svabodu schodaŭ i patrabujuć realizacyi sapraŭdy demakratyčnych pryncypaŭ u svajoj krainie. My zaklikajem urady Jeŭraźviazu nie biaździejničać, nie maŭčać, a akazvać mocny cisk na aŭtarytarny režym Alaksandra Łukašenki, kab pakłaści kaniec hetamu hvałtu i abaraniać kaštoŭnaści, na jakich zasnavany Jeŭrapiejski Sajuz», — patrabuje Hieorhie.
«Biełaruś — častka Jeŭropy. Nie pakidajcie biełaruski narod na adzinocie ŭ jaho namahańniach pabudavać sapraŭdy demakratyčnuju krainu. Usie my pavinny vykarystoŭvać samy mahutny demakratyčny instrumient: našaje słova «, — padsumoŭvaje Nina Hieorhie.
Jeŭrapiejskaja Piśmieńnickaja Rada — fiederacyja 44 nacyjanalnych arhanizacyj prafiesijnych piśmieńnikaŭ i litaraturnych pierakładčykaŭ, pradstaŭlaje bolš za 160 tysiač litarataraŭ z 34 krain Jeŭropy, najpierš ź Jeŭrasajuza, a taksama Biełarusi, Isłandyi, Narviehii, Turcyi, Šviejcaryi i Čarnahoryi. Fiederacyja była zasnavanaja ŭ 1977 hodzie ŭ Bierlinie pad nazvaj Jeŭrapiejski Piśmieńnicki Kanhres. Z 2010 hoda isnuje pad ciapierašniaj nazvaj sa štab-kvateraj u Brusieli, ščylna supracoŭničaje z kulturnickimi prajektami Jeŭrakamisii, JUNESKA, Suśvietnaj arhanizacyi intelektualnaj ułasnaści pry AAN. Prezidentam EWC u 2019 hodzie była abranaja niamieckaja piśmieńnica Nina Hieorhie.
Sajuz biełaruskich piśmieńnikaŭ źjaŭlajecca pravadziejnym siabram EWC z 2010 hoda. Z postsavieckaj prastory u Jeŭrapiejskuju piśmieńnickuju radu, akramia SBP, uvachodziać tolki litaraturnyja arhanizacyi krain Bałtyi. U 2018 hodzie ŭ Minsku prajšła Hienieralnaja asambleja Jeŭrapiejskaj Piśmieńnickaj Rady.
Kamientary