Apošniaja kropla ŭ bočku z kryzisam

Epidemija śvinoha hrypu najpierš začepić nie zdaroŭje biełarusaŭ, a ich kašalki. Piša Barys Tumar.

Śviet z tryvohaju sočyć za navinami ź Mieksiki. Mutacyja śvinoha virusu hrypu zrabiła jaho niebiaśpiečnym taksama dla čałavieka. Viestki z krainy actekaŭ niesuciašalnyja: tam zachvareli ŭžo kala 2000 čałaviek, ź ich kala 150 pamiorli. Uzrovień śmiarotnaści supastaŭny z časami sumnaviadomaj «hišpanki» – śmiertanosnaje admieny hrypu z 1918 hodu.

28 krasavika Suśvietnaj arhanizacyja achovy zdaroŭja pavysiła ŭzrovień suśvietnaje pandemičnaje niebiaśpieki z 3 da 4 pa 6‑balnaj škale.

Raźvityja krainy lepiej padrychtavanyja da epidemij i pandemij, čym krainy na šlachu raźvićcia. U biednych rehijonach šmat ludziej žyvie ŭ kantakcie z parsiukami i ptastvam, što stvaraje dadatkovy faktar ryzyki ŭ vypadkach epidemij jak SARS, ptušyny ci śviny hryp. Da taho ž, u biednych krainach ludzi radziej źviartajucca pa miedyčnuju dapamohu.

ZŠA majuć zapas 12,5 młn porcyj preparatu Terraflu, zabiaśpiečanaść Mieksiki našmat horšaja.

Choć u ZŠA pakul usie vypadki śvinoha hrypu praciakajuć u miakkaj formie i hryp paddajecca lačeńniu najaŭnymi miedykamientami – tym nie mienš, raspaŭsiudžvańnie chvaroby pavialičvaje nahruzku na suśvietnuju haspadarku i finansavuju sistemu, jakaja i biez taho pracuje na miažy abvału.

Ludzi abmiažujuć padarožžy ŭ začeplenyja epidemijaj rehijony i letnija adpačynki. Źmianšajecca ekanamičnaja aktyŭnaść jak takaja. U vyniku źnižajucca dachody avijakampanij, što, u svaju čarhu, źnižaje popyt na paliva. Padajuć ceny na kukuruzu, sojevy šrot, pšanicu, inšyja inhrydyjenty śvinoha kambikormu.

Pavodle acenak biužetnaha kamitetu Kanhresu ZŠA, jakija cytuje hazieta «Uoł‑stryt džornał», u vypadku kali pandemija nabudzie maštab hišpanki 1918 hodu, heta vylijecca ŭ padzieńnie VUP da 4,25%. Epidemija mienšaha maštabu, jak u 1956 ci 1967 hadach, moža adbicca padzieńniem VUP na 1%. Na takuju ličbu skaraciŭsia VUP Kitaju ŭ vyniku epidemii SARS u 2003 hodzie.

Prablema ŭ tym, što ŭzajemanakładańnie kryzisu i epidemičnych vydatkaŭ zdolnaje vyklikać efiekt niehatyŭnaha rezanansu. Akurat ciapier piku dasiahaje kolkaść prablemnych kredytaŭ u bankaŭskaj sistemie. MVF pradkazvaje padzieńnie suśvietnaha VUP na 1,3% – najhoršy pakazčyk paśla 1945 hodu.

Možna prahnazavać, što ŭ nastupnyja tydni adbudziecca čarhovaje źnižeńnie cenaŭ na naftu, ad jakoj adličvajucca i taryfy na inšyja enierhanośbity. Heta znoŭ udaryć pa ekanomicy Rasii. Jana praciahvaje padzieńnie: VUP Rasii ŭ pieršym kvartale hodu źniziŭsia na 9,5%, pryčym lutaŭskaja ličba była horšaj za studzieńskuju, a sakavickaja – za lutaŭskuju.

Peŭny čas ałarmisckija prahnozy finansista Džordža Sorasa ab tym, što siońniašni kryzis moža nabyć maštab novaj Vialikaj Depresii, padavalisia niaspraŭdžanymi. Siońnia takaja pahroza ŭźnikaje nanoŭ.

Biełaruś, jakaja pryviazałasia da Rasii na pałovu zamiežnahandlovaha abarotu, budzie adčuvać hetaje źnižeńnie popytu na svajoj skury. My stali nieadjemnaj častkaj suśvietnaj ekanomiki.

Da taho ž, anamalna suchi i haračy kaniec krasavika i maj staviać pad sumnieŭ uradžaj‑2009.

Letam biełarusy imavierna sutyknucca z dalejšym paharšeńniem dostupu da kredytnych resursaŭ, cenaŭ na nieruchomaść buduć praciahvać padzieńnie, a situacyja ŭ mašynabudavańni zastaniecca niaźmienna panuraju.

• 0
• 0
• 0
• 0
• 0
• 0
• 0
• 0