Viadučy, jaki pieršym syšoŭ z telebačańnia: Nieviadomyja ludzi padychodziać prosta na vulicy i dziakujuć
Daviedalisia, što ciapier z Arciemisam Achpašam, jaki ŭ znak pratestu suprać chłuśni syšoŭ z telebačańnia jašče ŭ červieni.
«Z «takim» telebačańniem mnie nie pa darozie» — viadučy Arciemis Achpaš adnym ź pieršych razyšoŭsia ź dziaržaŭnymi ŚMI praz palityčnuju situacyju ŭ krainie. Jašče ŭ červieni ŭ svaim instahramie jon apublikavaŭ dopis, u jakim emacyjna źviarnuŭsia da kaleh, jakija tranślujuć chłuśniu z ekranaŭ. Paśla publikacyi telekanał ANT, dzie apošnija hady Arciemis vioŭ šou «Udača ŭ prydaču», razarvaŭ ź im prafiesijnyja stasunki.
«Ja ŭśviedamlaŭ, čym hety dopis dla mianie abierniecca: mahčymaść pracy na dziaržaŭnym telebačańni i radyjo budzie dla mianie zakrytaj. Škada, tamu što prafiesiju viadučaha ja lubiŭ, lublu i budu lubić. Prosta chočacca rabić dobraje telebačańnie i mnie, viadoma, sumna, što ja pazbaviŭsia mahčymaści», — kaža Arciemis.
Pa słovach Achpaša, pracy ŭ jaho stała značna mienš:
«Ja pracuju u jakaści viadučaha mierapryjemstvaŭ, ale siońnia masavych, vialikich śviataŭ nie pravodzicca, nie tolki praz karanavirus, ale i praz ekanamičnaje stanovišča ŭ krainie. Maja asnoŭnaja dziejnaść ciapier — heta dyktar ahučvańnia. Ja daŭno ahučvaju rekłamu i prezientacyjnyja filmy, to-bok słužu zakadravym hołasam, i siońnia heta ścipła dapamahaje mnie trymacca na płavu. U cełym ja i maja siamja — a ja źjaŭlajusia ŭ joj karmilcam, bo žonka ŭ asnoŭnym zajmajecca synam, jakomu chutka spoŭnicca šeść hadoŭ, — staim pierad vialikim i vielmi važnym pytańniem, dzie mnie pracavać dalej».
Arciemis kaža, što nie škaduje pra toj post, ale zrabiŭ by jaho mienš emacyjnym, bo niekatorych kaleh jon pakryŭdziŭ, chacia bolšaści ź ich nie tyčyŭsia: usio ž zvarot byŭ nakiravany tym, chto stvaraje i vydaje łžyvyja naviny.
U toj ža čas jon adčuŭ padtrymku kaleh: «Ja razumieju, što zrabiŭ toj učynak nie darma, bo baču, što ŭ vializnaj kolkaści ludziej padobnyja dumki i pohlady, u tym liku siarod kaleh. Adrazu paśla mianie niekalki ź ich taksama vykazalisia i syšli z telebačańnia. Navat na vulicy da mianie padychodziać i dziakujuć prosta nieviadomyja ludzi. Takaja reakcyja vielmi pryjemnaja».
Na pytańnie pra viartańnie ŭ efir viadučy adkazvaje, što zmoža viarnucca, kali ŭ hledačoŭ źjavicca žadańnie ŭklučyć biełaruskaje telebačańnie.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary