U Mahilovie prajšoŭ zakryty sud — čałavieku dali 7 hadoŭ kałonii za zbroju i «padrychtoŭku biesparadkaŭ»
Jak paviedamlajuć pravaabaroncy MAYDAY, u Mahilovie vynieśli prysud Alaksieju Mielnikavu. Jaho abvinavačvali ŭ padrychtoŭcy da masavych biesparadkaŭ i zachoŭvańni zbroi.
Mielnikava abvinavačvali pa 4 artykułach KK RB. Heta Artykuł 13 — «Padrychtoŭka da złačynstva»; č. 2 art. 293 — «Masavyja biesparadki»; č. 3 art. 295 — «Niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ»; č. 1 art. 295-3 — «Niezakonnyja dziejańni ŭ dačynieńni da pradmietaŭ, dziejańnie jakich zasnavana na vykarystańni haručych rečyvaŭ».
Praces byŭ zakryty. Mielnikaŭ pryznaŭ svaju vinu tolki ŭ zachoŭvańni zbroi — raniej u jaho doma vyjavili abrez. Pa astatnich artykułach mužčyna vinavatym siabie nie pryznaŭ, a prysud suda paličyŭ žorstkim i płanuje jaho abskardzić.
Advakat na pracesach adsutničaŭ, Mielnikaŭ abaraniaŭ siabie sam.
Zatrymali Mielnikava 9 žniŭnia 2020 hoda. U paviedamleńni Hienieralnaj prakuratury śćviardžałasia, što abvinavačany źbiraŭsia dałučycca da supraćpraŭnaj dziejnaści, natchniŭšysia zaklikami ŭ sacyjalnych sietkach. Dla hetaha vyrabiŭ nie mienš za piać samarobnych pryładaŭ, nabyŭ nož, a taksama inšyja srodki i pryłady złačynstva.
Padčas vobšuku ŭ jaho vyjavili pietardy, try samarobnyja zapalnyja pryłady z dymaŭtvaralnymi piratechničnymi rečyvami, a taksama nož. Hetyja pradmiety jon tajemna sprabavaŭ pieravieźci z Mahilova ŭ Minsk dla «niepasrednaha ŭłasnaha ŭdziełu ŭ masavych biesparadkach». U padsudnaha taksama aperatyŭniki adšukali samarobny abrez.
Pra Mielnikava viadoma niašmat. U sacyjalnych sietkach na fotazdymkach joje pazuje z nažami. Maje mianušku «Locha terminatar». Zhadki pra Mielnikava možna znajści na forumach abaroncaŭ žyvioł, jakija śćviardžajuć, što jon stralaŭ i truciŭ sabak, paviedamlaje radyjo «Svaboda».
Kamientary