Prakuratura zaviała kryminalnuju spravu pa fakcie «hieraizacyi vajennych złačyncaŭ» na mierapryjemstvie «Polskaj škoły» ŭ Breście. Dvuch pradstaŭnikoŭ škoły zatrymali, potym zdaryŭsia dypłamatyčny skandał. Časovy pavierany ŭ spravach Polščy ŭ našaj krainie Marcin Vajciachoŭski raspavioŭ Tut.by, što mierapryjemstva ŭ «Polskaj škole» nie mieła nijakaha dačynieńnia da postaci Ramualda Rajsa, a ŭsio, što adbyłosia, padobna na nieparazumieńnie.
Časovy pavierany ŭ spravach Polščy ŭ Biełarusi Marcin Vajciachoŭski raspavioŭ, što mierapryjemstva, jakoje prajšło ŭ Breście 28 lutaha, było arhanizavana Forumam polskich łakalnych inicyjatyvaŭ.
— Pa najaŭnych u nas danych, metaj mierapryjemstva było ŭviekaviečańnie pamiaci tych ludziej, jakija paśla Druhoj suśvietnaj vajny ŭ Breście kłapacilisia ab polskich miescach pamiaci, polskich mohiłkach, zachavańni polskaj historyi — za heta jany byli represavanyja, u tym liku adpraŭlenyja ŭ Sibir, u Varkutu. Tolki paśla śmierci Stalina, na chvali adlihi, jany zmahli viarnucca ŭ Polšču. Ź viadomych mnie ludziej mahu nazvać spadara Ryšarda Snarskaha, jaki žyŭ u Bieraści, — adznačyŭ Marcin Vajciachoŭski.
Pavodle infarmacyi časovaha pavieranaha, mierapryjemstva ŭ «Polskaj škole» «nie mieła nijakaha dačynieńnia» da imia Ramualda Rajsa (Buraha).
— Heta mierapryjemstva nijakaha dačynieńnia da Buraha i da padziej u Hajnaŭcy nie mieła, u adroźnieńnie ad taho, što śćviardžajuć dziaržaŭnyja biełaruskija ŚMI i niekatoryja ekśpierty.
— Moža być, vieršy i čytali, ale 100% nie ŭ słavu Rajsa, jaho imia na toj sustrečy navat nie zhadvałasia. My heta staranna praviarali, kali b było pa-inšamu, naš konsuł prosta nie ŭdzielničaŭ by ŭ takoj sustrečy, — vykazaŭsia Marcin Vajciachoŭski. — Mierapryjemstva, pavodle našaj infarmacyi, prachodzić u Bieraści ŭžo niekalki hadoŭ, i nikoli jano nie vyklikała cikavaści, uvahi, rezanansu ŭ toj stupieni, u jakoj heta adbyłosia sioleta.
Pry hetym surazmoŭca paćvierdziŭ, što padzieja była prymierkavana da 1 sakavika — dnia, kali ŭ Polščy zhadvajuć udzielnikaŭ antysavieckaha padpolla, jakija zmahalisia za niezaležnaść krainy.
— Ale hetaje śviata achoplivaje ŭsich ludziej, jakija paśla Druhoj suśvietnaj vajny ŭ toj ci inšaj formie akazvali supraciŭ kamunistyčnaj uładzie, za što byli represavanyja. Ale jašče raz chaču padkreślić, što imia Buraha nie zhadvałasia. Naš konsuł udzielničaŭ u sustrečy, jakaja była pryśviečana miascovaj historyi, miascovym padziejam — jany, na našu dumku, nie majuć nijakaha antybiełaruskaha kantekstu i padtekstu.
Marcin Vajciachoŭski dadaŭ, što sioleta biełarusy i palaki ŭdzielničali ŭ sumiesnych mierapryjemstvach pa ŭšanavańni pamiaci achviar Ramualda Rajsa ŭ Hajnaŭcy.
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary