Biełaruskija miedyki rekamiendujuć vakcynacyju suprać kavidu pravodzić praz 3-6 miesiacaŭ paśla pieraniesienaj infiekcyi
Pryčym niezaležna ad taho, jak ciažka praciakała zachvorvańnie. Pra heta paviedamlajecca ŭ rekamiendacyjach dla śpiecyjalistaŭ pa vakcynacyi suprać COVID-19 z vykarystańniem vakcyny Ham-Kavid-Vak (Sputnik V), raźmieščanych na sajcie Minzdaroŭja, źviartaje ŭvahu «Źviazda».
Adznačajecca, što minimalny intervał u try miesiacy metazhodny dla ludziej, jakija majuć vysokuju ryzyku zaražeńnia mutavanymi varyjantami virusa z vysokim patencyjałam raspaŭsiudu.
U pryvatnaści, havorka idzie pra ludziej, jakija hadujuć pušnych źviaroŭ, abo pra tych, chto vyjazdžaje ŭ inšyja krainy (rabotniki kampanii «Biełavija» i inš.).
Kali COVID-19 raźviŭsia paśla ŭviadzieńnia pieršaha kampanienta, ale druhi kampanient uviedzieny nie byŭ, to jaho ŭviadzieńnie možna płanavać nie raniej čym praz 6 miesiacaŭ paśla pieraniesienaj infiekcyi.
U Ministerstvie achovy zdaroŭja adznačyli, što kurs vakcynacyi nieabchodna zaviaršyć, pakolki paŭnavartasnaj praciahłaj abarony ŭviadzieńnie adnaho kampanienta i pieraniesienaja infiekcyja mahli nie sfarmiravać. U ciapierašni čas daśledavańni ŭ hetym kirunku praciahvajucca.
Kali ŭ intervale pamiž uviadzieńniem kampanientaŭ čałaviek zachvareŭ, to ŭviadzieńnie druhoha kampanienta nieabchodna pravieści paśla vyzdaraŭleńnia pry vostrym zachvorvańni abo pačatku stadyi remisii pry chraničnym. U indyvidualnych vypadkach možna praduhledzieć uviadzieńnie druhoha kampanienta praz 1-4 tydni paśla vyzdaraŭleńnia pry vostrym zachvorvańni abo pačatku stadyi remisii pry chraničnym zachvorvańni (u zaležnaści ad ciažkaści pieraniesienaha zachvorvańnia). Nieabchodna ŭličvać ryzyku ŭźniknieńnia COVID-19, najaŭnaść ryzyki jaho ciažkaj płyni.
Maksimalny intervał pamiž uviadzieńniem kampanientaŭ nie rehłamientavany.
Pry hetym adznačajecca, što niama nieabchodnaści ŭ abśledavańni pierad praviadzieńniem vakcynacyi na najaŭnaść antyhiena ci antyciełaŭ da virusa SARS-CoV-2.
Kamientary