«Nutrom čuju, jość u nas nafta». Ci realna Biełaruś moža zabiaśpiečyć siabie «čornym zołatam» i nakolki heta nam dapamoža
Padčas sustrečy z kiraŭnikom «Biełaruśnafty» Alaksandram Lachavym Łukašenka vykazaŭsia nakont zdabyčy nafty ŭ Biełarusi. Jon adznačyŭ, što było b dobra naraścić zdabyču ŭdvaja, da 3-3,5 miljonaŭ ton. «Heta rašeńnie prablemy dla krainy, my zabudziem pra ŭsiakuju zaležnaść», — adznačyŭ jon i dadaŭ, što, kali b Biełaruś zdabyvała 8-9 miljonaŭ ton nafty, to žyła b lepš, čym samyja bahatyja krainy. Ci moža Biełaruś zabiaśpiečyć siabie naftaj u takich abjomach i nakolki realna heta nam dapamahło b.
Pra što havorka?
Biełaruś stała zdabyvać naftu jašče ŭ 1965 hodzie. Asnoŭnaje miesca zdabyčy — Prypiacki prahin. Z taho času ŭžo zdabyta bolš za 138 miljonaŭ ton nafty. U lepšyja hady maksimalnaja zdabyča składała 7,96 miljony ton u hod, ale potym upała.
Tak, z 1997 hoda Biełaruś zdabyvaje 1,6-1,7 miljony ton u hod. Asnoŭnaje pradpryjemstva — «Rečycanafta».
Jak adznačyŭ Alaksandr Lachavy ŭ efiry kanała «Biełaruś 1», tolki za 8 miesiacaŭ biahučaha hoda «Biełaruśnafta» zdabyła miljon ton nafty i płanuje vyjści na pakazčyk u 1,7 miljony.
Što abmiarkoŭvali na naradzie?
Hałoŭnaje pytańnie, jakoje abmiarkoŭvałasia na naradzie — heta pavieličeńnie zdabyčy ajčynnaj nafty.
«Mianie vielmi cikavić i chvaluje prablema Prypiackaha prahinu. Nutrom čuju, što tam jość nafta, jakuju my jašče nie bačym, — skazaŭ Łukašenka. — Vy vyvučali hetuju prablemu. Kali vy štości prapanujecie, ja hatovy ŭ hetym niepasredna ŭdzielničać. Ale tak, kab my naraścili zdabyču nafty pry našaj z vami žyćcia choć by da 3-3,5 młn ton. Hetaje rašeńnie prablemy dla krainy. My zabudziem pra ŭsiakuju zaležnaść».
«Ja da hetaha času liču, što heta sumny momant, kali paśla adkryćcia pierśpiektyŭnych radoviščaŭ u Biełarusi my ŭ svoj čas (da nas z vami jašče) zdabyvali bolš za 8 młn ton nafty, — adznačyŭ jon. — My vypampavali svaju naftu, tamu što pamyłkova ličyli, što ŭ nas mora nafty ŭ Biełarusi. Moža, u nas niešta tam i jość, niejkaje mora, jakoje my z vami jašče nie znajšli. Heta hałoŭnaja tema siońniašniaj hutarki. Ale kali b nam siońnia 8-9 młn ton nafty, my b žyli lepš, čym samyja bahatyja krainy našaj płaniety. Ale, na žal, takoha niama».
Jakija zapasy nafty ŭ nas jość?
Ministr pryrody Andrej Chudyk u minułym hodzie zajaŭlaŭ, što ŭ Biełarusi adkryta 87 radoviščaŭ nafty. Ź ich raspracoŭvajecca 60.
«Na žal, zapasy nafty za 45 hod skaracilisia sa 160 młn ton da krychu bolš za 51 młn ton, to bok bolš, čym u try razy. Pry siońniašnim uzroŭni zdabyčy nafty my zabiaśpiečany ŭłasnaj syravinaj jašče na 30 hod, — adznačyŭ jon. — Taki kaštoŭny ciapier dla našaj ekanomiki resurs patrabuje dosyć vialikich finansavych układańniaŭ u jaho pošuk i raźviedku».
Pry hetym navat sam «Biełnaftachim» adznačaje, što biełaruskija radoviščy nafty ciažkadastupnyja.
«Taki kaštoŭny ciapier dla našaj ekanomiki resurs patrabuje dosyć vialikich finansavych układańniaŭ u jaho pošuk i raźviedku», — dadavaŭ i ministr pryrody Andrej Chudyk.
Kolki nafty patrebna Biełarusi?
Dla ŭnutranaha spažyvańnia — kala 5 miljonaŭ ton u hod. Pry hetym ciapier biełaruskija naftapierapracoŭčyja zavody hatovy pierapracavać 8-9 miljonaŭ ton, a potym patencyjna hetaja ličba moža ŭzraści da 12-18 miljonaŭ ton.
Ci zmoža kraina naraścić zdabyču?
«Biezumoŭna, ułasnaja nafta — heta zaŭsiody dobra, heta syravina, heta mahčymaść nie zaležać ad imparcioru, — adznačaje ekanamičny ahladalnik Taćciana Manionak. — Tym nie mienš, treba nahadać, što Biełaruś pakul što kuplaje naftu davoli tanna, bo padatkavy manieŭr u Rasijskaj Fiederacyi nie zaviaršyŭsia. Roźnica pamiž mytami na naftu i naftapradukty daje mahčymaść Biełarusi zarablać».
Pa słovach Manionak, naša kraina padčas usioj svajoj niezaležnaj historyi zarablała na tannaj rasijskaj nafcie. Asabliva ŭ hady dobraj kanjunktury rynka.
«Što da svajoj nafty, to «Biełaruśnafta» imkniecca i vykarystoŭvaje ŭsie mahčymaści, kab pavialičyć zdabyču. Ale ž hety pryrost — 20-30 tysiač ton u hod. My bačym, što zdabyča padrastaje nie takimi tempami, jak kamuści marycca, — adznačaje ekśpiertka. — Pakul składana kazać, što biełarusy mohuć niejak značna padvysić abjomy ŭłasnaj nafty».
Taćciana Manionak adznačaje, što ŭ pavieličeńni abjomaŭ mohuć dapamahčy rasijskija radoviščy, jakija zaraz aktyŭna raspracoŭvaje biełaruskaja kampanija «Janhpur», što niadaŭna nabyła «Purnaftu».
«Miarkujecca, što dzieści da 2025-2026 hoda pavialičyć zdabyču da 1,7 miljony ton u hod. Prykładna stolki siońnia zdabyvaje i «Biełaruśnafta» na terytoryi Biełarusi», — kaža Manionak.
To bok, z dapamohaj zdabyčy ŭ Rasii całkam vierahodna vyjści na 3-3,5 miljony ton u hod. Ale zdabyć i pierapracavać naftu — mała, patrebna jaje jašče pradać. I tut uźnikaje pytańnie z sankcyjami.
«Jak jany buduć pracavać, jak budzie dalej, jak heta adabjecca na ekanomicy, my nie viedajem. Mnohija ukrainskija partniory ŭžo niepakojacca, jak buduć prachodzić raźliki ź Biełaruśsiu, — kaža Manionak. — Tym nie mienš pa ŭskosnych dadzienych možna zrabić vyvad ab tym, što źmienšylisia abjomy pierapracoŭki. Apošnija miesiacy źmianšajucca. I kali Biełaruś budzie šukać šlachi abychodu sankcyj, u lubym vypadku heta novyja vydatki».
Što było b, kali b Biełaruś zdabyvała 8-9 miljonaŭ ton nafty? Ci vyratavała b heta nas?
«Naŭrad ci, viadoma, — ličyć akademičnaja dyrektarka daśledčaha centru BEROC Kaciaryna Barnukova. — 9 młn ton nafty heta 66 miljonaŭ barelaŭ. Kali vykazać zdahadku, što košt nafty $70 za barel, było b dadatkovych $4,6 miljarda ŭ hod abo plus 7% VUP. Sapraŭdy, zdajecca što heta zdolna vyrašyć usie našy prablemy (i heta praŭda tak — u karotkaterminovym pieryjadzie), ale treba razumieć, što heta nie krynica pastajannaha rostu.
VUP by vyras adzin raz na 7% za košt zdabyčy, i dalej prosta zastavaŭsia b na hetym pavyšanym uzroŭni. Pry hetym, viadoma, adstavańnie Biełarusi navat ad niekatorych susiedziaŭ składaje značna bolš, čym 7%. U Polščy, naprykład, VUP na dušu pa parytecie pakupnickaj zdolnaści vyšej na 60%».
Ciapier čytajuć
«Pucin nie viedaŭ, što heta vyljecca ŭ takuju vajnu». Hałoŭnaje ź intervju Łukašenki22
Kamientary