Žychar Mijorskaha rajona atrymaŭ paŭtara hoda kałonii za aniekdot pra Łukašenku i adno abraźlivaje słova
Razhlad kryminalnaj spravy ŭ dačynieńni da vartaŭnika-žyviołavoda Michaiła Lintoŭskaha, jakoha abvinavacili ŭ abrazie prezidenta (art. 368 Kryminalnaha kodeksa), u sudzie Mijorskaha rajona adbyŭsia jašče 27 žniŭnia. Spravu razhladała sudździa Iryna Jaskievič, bok dziaržabvinavačańnia pradstaŭlała namieśnica prakurora Mijorskaha rajona Śviatłana Ramanoŭskaja.
Pavodle abvinavačvańnia, Michaił Lintoŭski 27 sakavika 2021 hoda źniaŭ na telefon videa, u jakim vykarystaŭ u dačynieńni da Łukašenki słova, jakoje «maje niehatyŭnuju acenku i nienarmatyŭnuju formu maŭlenčaha vykazvańnia, jakoje nanosić škodu honaru i hodnaści kiraŭnika dziaržavy, nakiravanaje na padryŭ jahonaha aŭtarytetu, na farmavańnie niehatyŭnaha stereatypu i admoŭnaha vobrazu Łukašenki, u vyniku čaho, publična abraziŭ prezidenta».
Paśla mužčyna apublikavaŭ videa na svajoj staroncy ŭ «Adnakłaśnikach».
Jak raskazaŭ na sudzie ŭčastkovy inśpiektar Andrej Tałapiła, jaki vystupiŭ śviedkam, pra rolik z abrazami na adras Łukašenki jamu paviedamili niekalki miascovych žycharoŭ, jakija pazvanili ŭ milicyju. Pa słovach milicyjanta, u videa było kala 800 prahladaŭ, kali jon vyrašyŭ vyklikać śledča-apieratyŭnuju hrupu dla zatrymańnia Michaiła Lintoŭskaha.
Sam abvinavačany raspavioŭ, što ŭ toj viečar kupiŭ dva piva i pajšoŭ u hości da siastry, dzie jany razam vypivali. Zatym jon pajšoŭ na pracu i raśpivaŭ tam harełku, zatym viarnuŭsia da siastry. Siadzieli i razmaŭlali, što zarobak maleńki, u adpačynak nie adpuskajuć. I tady jon źniaŭ videa na mabilny. U roliku raspavioŭ aniekdot pra Łukašenku, a ŭ kancy abraziŭ jaho, nazvaŭšy debiłam.
Rolik vykłaŭ u «Adnakłaśniki». Paźniej chacieŭ vydalić, pakul nichto nie pahladzieŭ, ale pajšoŭ na pracu i zabyŭsia. Potym pryjechali supracoŭniki milicyi i zatrymali jaho.
U abvinavačanaha jość psichičnyja rasstrojstvy i zachvorvańnie — lohkaja razumovaja adstałaść, a taksama chraničny ałkahalizm.
Sudździa vynies prysud: 1 hod 6 miesiacaŭ pazbaŭleńnia voli z adbyvańniem u kałonii ahulnaha režymu. Abvinavačanaha ŭziali pad vartu ŭ zale suda. Taksama sudździa pastanaviła pryniać miery pa prymusovym lačeńni ad chraničnaha ałkahalizmu.
Ciapier čytajuć
U kadr znoŭ trapiła, jakim pamieram šryfta dla Łukašenki drukujuć vystupy, kab jon bačyŭ11
Kamientary