«Paśla 13 sutak vyjšaŭ zusim inšy čałaviek. Z cyharetnymi apiokami na tvary i na ciele». Što viadoma pra chłopca, jaki atrymaŭ 5 hadoŭ kałonii za paviedamleńni
Małady chłopiec z Asipovičaŭ byŭ asudžany na 5 hadoŭ kałonii za paviedamleńni ŭ telehramie. Svajaki raskazvajuć, što jaho katavali jašče padčas adsiedki na sutkach.
Illu Dubskamu 24 hady. Pracavaŭ u Rasii, ale ŭ vieraśni 2020 hoda viarnuŭsia ŭ Biełaruś, žyŭ razam z baćkami ŭ Asipovičach. Chłopiec nieadnarazova sudzimy. Traplaŭ za kraty i pa narkatyčnym artykule.
«Na mitynhi jon nie chadziŭ, siadzieŭ doma. Bo ŭ nas vialikaja siamja, i Illa pryhladvaŭ za małodšym bratam», — kažuć svajaki.
Ale ž u listapadzie 2020 hoda chłopca zatrymali — jon pajšoŭ pa cyharety ŭ kramu i źnik. Siamja praz sutki pošukaŭ daviedałasia, što syn u milicyi. Paśla byŭ sud, Illa atrymaŭ 13 sutak.
Jon dzika bajaŭsia siłavikoŭ, navat nie išoŭ na pracu
«Paśla hetych sutak jon vyjšaŭ inšym čałaviekam. Staŭ vielmi zamknionym u sabie. Jaho tam katavali ci što, nieviadoma. Ale jon vyjšaŭ z apiokami ad cyharet, — kaža adzin sa svajakoŭ. — Bačyli na svaje vočy: apioki byli na ciele, na rukach. Byli apioki navat na tvary. Jon spačatku chavaŭ heta, adhadavaŭ baradu, ale kali pačali pytacca, čamu jon nie holicca, Illa pakazaŭ apioki na tvary i paprasiŭ nie kazać pra ich baćkam.
Illa kazaŭ, što heta zrabili pravaachoŭniki, što jaho prymusili ŭ niečym pryznacca. U čym — nie kazaŭ.
Toj čałaviek, jaki vyjšaŭ paśla 13 sutak, — heta nie Illa. Heta zabity i zaciukany čałaviek.
Paśla tych sutak jon dzika bajaŭsia siłavikoŭ. Amal pierastaŭ vychodzić z chaty, navat nie išoŭ na pracu, choć mieŭ prapanovy.
Ale ž niekalki razoŭ siłaviki ŭ cyvilnym sami prychodzili da nas biez usiakich pastanoŭ. Pravodzili ci to vobšuk, ci to ahlad, ci to šukali Illu, ale jaho nie było.
Spačatku baćka byŭ skieptyčna nastrojeny, kazaŭ, što kali syna zatrymali, to tak i treba, značyć było za što. Pryčynaj było toje, što heta nie pieršyja prablemy chłopca ź milicyjaj, raniej jon užo dva razy mieŭ prablemy pa duraści i pa małaletcy, tady Illa realna byŭ sam vinavaty.
Ale paśla baćka ŭstaŭ na jaho bok. Adnojčy navat vystaviŭ «nieviadomych u cyvilnym», jakija pryjšli biez usiakich pastanoŭ, skazaŭ im: «Vy majmu synu psichiku złamali, idzicie adsiul!»
U sakaviku 2021 siłaviki znoŭ pryjšli ź pieratrusam, zabrali Illu. Bolš na volu jon nie vyjšaŭ.
«Vy nie ŭjaŭlajecie, jaki tut cisk i što tut robicca»
«Ciaham miesiaca stała viadoma, za što jaho zabrali. Da hetaha baćkam adkazvali prosta: «Nie vašaja sprava». I pieršy tydzień-dva paśla zatrymańnia syna, baćka namahaŭsia vyśvietlić, dzie Illa, za što zatrymany, jamu adkazvali: vy nie fihurant spravy, nie majem prava davać infarmacyju», — kažuć svajaki.
Spačatku Illu Dubskaha vinavacili pa dvuch artykułach KK: 130 (raspalvańnie varožaści) i 359 (teraryzm). Ale ž sudzili ŭ vyniku za raspalvańnie varožaści i pahrozu hvałtu ŭ dačynieńni da siłavikoŭ.
«Hvałtu nijakaha nie było, — ličać svajaki. — Illu abvinavacili, što jon pisaŭ niejkija paviedamleńni ŭ telehram-čat, zaklikaŭ ludziej vychodzić na vulicy. Taksama, što jon dasłaŭ niejkamu čałavieku ŭ pahonach aŭdyjapaviedamleńnie, što toj «taki-siaki». I toj siłavik spačatku praihnaravaŭ paviedamleńnie, ale kali ŭ Illi zabrali telefon, heta ŭspłyła, zaviali spravu i tolki tady toj siłavik pajšoŭ pisać zajavu.
Paśla Illa pisaŭ u listach, što jaho prymusili pryznacca pad psichałahičnym ciskam. Uvohule, jon pisaŭ takija listy, što ślozy na vačach. Kazaŭ: «Vy nie ŭjaŭlajecie, jaki tut cisk i što tut robicca», «Kali mnie daduć 10 hadoŭ — heta budzie kaniec majho žyćcia, vyjdu ŭ 34 hady, a za śpinaj ničoha niama».
Sud prajšoŭ u Mahilovie. Illa Dubski atrymaŭ 5 hadoŭ kałonii.
«Na sudzie jon trymaŭsia hodna. Vinu nie pryznavaŭ, siabie nie abhavorvaŭ, namahaŭsia adstojvać svaje pravy, — kažuć svajaki. — Mama bačyłasia ź im paśla abviaščeńnia prysudu.
Illa vielmi pryhniečany. Maralna jon zabity, heta vielmi ciažka. Mahčyma, buduć prablemy sa zdaroŭjem, bo navat na pieršym sudovym pasiadžeńni jamu stanaviłasia kiepska, navat rabili pierapynak.
Usio heta ciažka. Vielmi ciažka».
Abarona Illi Dubskaha budzie padavać apielacyju na prysud.
Kab padtrymać chłopca, jamu možna dasłać list ci paštoŭku pa adrasie: Turma №4, Mahiloŭ vuł. Krupskaj 99A, 212011, Dubskamu Illu Siarhiejeviču.
Kamientary